Skessuhorn - 17.09.2014, Blaðsíða 16

16 MIÐVIKUDAGUR 17. SEPTEMBER 2014
Í nýju útvegsspili eru ógnanir m.a.
norskir útgerðarrisar, Grænfriðungar
og tíð ríkisstjórnarskipti
Aflakló er nú í hópfjármögnun
á KarolínaFund.is
Aflakló er nýtt sjávarútvegsspil
sem tveir íslenskir hugvitsmenn
standa saman að. Þeir segja að Afla-
kló henti öllum, hvort sem þeir
lítið viti um sjávarútveg eða sjó-
mennsku, eða eru meira kunnugir
því síkvikula umhverfi. Aflakló má
lýsa sem nokkurs konar blöndu af
tveimur vinsælustu spilum Íslands-
sögunnar; Hættuspili og Útvegs-
spilinu, en í spilinu keppast leik-
menn við að byggja upp útgerðar-
veldi sín. Keppast leikmenn við að
byggja upp útgerðarveldi með því
að sigla kringum Ísland, sækja mið-
in og klekkja hver á öðrum. Hægt er
að byggja upp veldi sín á Akranesi,
í Rifi og ýmsum fleiri útgerðarbæj-
um um landið. Á hverju horni leyn-
ast óvæntir gestir, svo sem norskir
útgerðarmenn, Grænfriðungar og
þá valda tíð ríkisstjórnarskipti usla
í landi aflaklónna.
Að spilinu standa hugvitsmenn-
irnir Bjarki Vigfússon og Haukur
Már Gestsson. Þeim til fulltingis er
vöru- og grafískur hönnuður sem
heitir Milja Korpela, en hún hann-
aði spilið. Þeir Bjarki og Hauk-
ur Már starfa sem hagfræðingar og
verkefnisstjórar hjá Íslenska sjáv-
arklasanum. Þeir gefa spilið hins
vergar út sjálfir og hafa unnið að
því í hjáverkum síðastliðna mán-
uði.
Nú stendur yfir svokölluð hóp-
fjármögnun, (e. crowdfunding) á
KarolinaFund.is, á nýja útvegs-
spilinu Aflakló. Hópfjármögnun
þýðir að útgefendur gefa fólki kost
á að forpanta spilið og fjármagna
þannig framleiðslu þess. Ef svo vill
til að ekki náist lágmarksupphæð
(um 900.000 kr.) fá þeir sem höfðu
forpantað eintak framlag sitt greitt
til baka. mm
Útgefendur ásamt hönnuði sínum.
Svona lítur nýja borðspilið út.
Stoltur af því að taka við oddvitastarfinu af Davíð á Grund
Spjallað við Árna Hjörleifsson nýjan oddvita í Skorradalshreppi
Við sveitarstjórnarkosningarnar í
Skorradal á liðnu vori varð með-
al annars sú breyting að Davíð Pét-
ursson á Grund gaf ekki kost á sér
í sveitarstjórnina. Þar hafði hann
setið í 48 ár samfleytt og jafnframt
gegnt oddvitastarfi. Í nýju hrepps-
nefndina var meðal annarra kosinn
nýbúi í Skorradal, Árni Hjörleifs-
son í Horni. Þrjú ár eru síðan Árni
og kona hans Ingibjörg Davíðsdótt-
ir frá Arnbjargarlæk í Þverárhlíð
keyptu Horn sem þá hafði verið um
tíma í eigu Landsbankans. Árni seg-
ist stoltur af því að taka við oddvita-
starfinu af Davíð á Grund og þakk-
látur félögum sínum í hreppsnefnd-
inni að hafa sýnt sér þetta traust.
„Það er ekki hægt annað en dást af
því hvað Davíð virðist hafa fórn-
að sér í starfi fyrir hreppinn. Það er
einstakt að hann hafi rekið sveitar-
félagið á heimili sínu allan þenn-
an tíma. Það fyrirkomulag verður
reyndar ekki áfram hér í hreppnum,
þannig að brotthvarf Davíðs þýð-
ir að þó nokkrar breytingar verða,“
segir Árni. Hann segir að nú sé unn-
ið að því að Skorradalshreppur fái
skrifstofuaðstöðu á Hvanneyri og
ráðinn verði starfmaður sem sinni
brýnustu erindum og liðsinni íbú-
unum á þeim tímum sem skrifstofan
verður opin.
Vinnuálag og
bæjarpólitík
Árni er Reykvíkingur að uppruna en
fluttist tvítugur til Hafnarfjarðar og
hefur starfað þar lengstan hluta æv-
innar. Hann er rafvirki að mennt og
starfaði um tíma hjá Ísal og einnig
starfrækti hann verktakafyrirtæk-
ið ÁHÁ ásamt fleirum. Það fyrir-
tæki var með mikil og stór verkefni
á tímabili og tugir iðnaðarmanna í
vinnu auk undirverktaka. Það end-
urbyggði m.a. rafstöðvarkerfi Sogs-
virkjunar, í Írafossi, Ljósafossi og
Steingrímsstöð. Á sama tíma var
Smáratorg byggt og aðalstöðvar
Málningar. Árni var einnig á þessum
tíma á kafi í bæjarpólitíkinni í Hafn-
arfirði, var bæjarfulltrúi Alþýðu-
flokksins í átta ár. „Þetta var búið
að vera mikið vinnuálag og svo má
segja að áfallið hafi komið 5. nóvem-
ber 1998. Þá greindist ég með MS
og lamaðist upp undir hendur. Á
þessum tíma var Alexandra Mist
dóttir okkar tveggja ára gömul og ég
notaði barnakerruna eiginlega sem
göngugrind, meðan ég var að þjálfa
mig í að ganga upp á nýtt. Ég var til-
tölulega fljótur að ná mér á strik aft-
ur og er í ágætis formi í dag,“ seg-
ir Árni.
Óskaplega fallegt um-
hverfi
Ingibjörg Davíðsdóttir er seinni
kona Árna og á hann auk dótturinnar
sem þau eiga saman þrjá uppkomna
syni frá fyrra hjónabandi. Ingi-
björg hefur starfað í utanríkisþjón-
ustunni um árabil. Þau Árni dvöldu
í Genf í Sviss í fimm ár og í fjög-
ur ár í Vínarborg í Austurríki. Í vor
fór Ingibjörg til London og starfar
þar næstu árin. Árni er hins vegar í
miklum framkvæmdum í Horni við
að endurbyggja hús og sér fram á
að þær muni standa yfir að minnsta
kosti næstu fjögur árin. „Vínarborg
fannst mér eins og stórt listasafn,
óskaplega falleg borg. Ég kunni
samt ennþá betur við mig í Sviss.
Við ferðuðumst mikið um Alpana
og mér finnst ég núna vera kominn
í álíka umhverfi hérna undir Skessu-
horninu og við Skarðsheiðina. Þetta
er óskaplega fallegt umhverfi hérna
og okkur líður vel hérna í Horni,“
segir Árni. Hann segist hafa verið að
grúska í gömlum blöðum og fund-
ið það út að móðurleggur Ingibjarg-
ar konu sinnar er einmitt frá Horni
en föðurleggurinn til frændfólksins
á Grund í Skorradal. „Það var mjög
skemmtilegt að uppgötva þá teng-
ingu,“ segir Árni.
Jarðarkaupin
drógust á langinn
Árni segir að þau Ingibjörg hafi fyrir
allmörgum árum haft mikinn áhuga
fyrir að kaupa jörð. „Þá var allur
Borgarfjörðurinn undir í þeirri leit.
Það varð ekkert úr jarðarkaupum þá
en þess í stað keyptum við allstóra
eign í Hafnarfirði. Síðan kom bólan
og allt varð vitlaust. Fólki sem starf-
ar fyrir utanríkisþjónustuna er skylt
að eiga lögheimili á Íslandi. Þegar
við leigðum eignina í Hafnarfirði
vildum við ógjarnan skrá lögheim-
ilið á Rauðarárstíg í Reykjavík eins
og margir í utanríkisþjónustunni.
Þess vegna óskuðum við eftir því við
Davíð vin okkar og frænda konunn-
ar á Grund að skrá lögheimilið þar.
Þetta var fyrir fjórum árum eða ári
áður en við keyptum hérna í Horni
af Landsbankanum. Í vetur tilkynnti
Davíð að hann myndi ekki gefa kost
á sér í hreppsnefndina í jafn langan
tíma og hann hafði setið í henni! Ég
var líka að spá í hvort ég gæti ekki
gert það á sömu forsendum, þar sem
ég sat í bæjarstjórn í Hafnarfirði í
átta ár. Þar sem að ég var lítið kynnt-
ur í sveitinni, en allir samt í kjöri, sá
ég ekki ástæðu til þess. Svo kom á
daginn að fólk vildi fá mig í sveitar-
stjórnina og þá þýðir ekki annað en
bretta upp ermar. Það kitlar svo sem
ennþá þessi pólitíski áhugi frá fyrri
tíð og ég hef gaman af félagsmálum.
Það er eins og það sé einhver göm-
ul bylgja í loftinu, Ingibjörg Pálma
á Akranesi, Sturla í Stykkishólmi og
svo ég,“ segir Árni og hlær, en hann
er af 1947 árgerðinni.
Allmiklar breytingar
Árni segir að það verði spennandi að
kynnast betur fólkinu í sveitinni og
störfunum í sveitarstjórninni. „Þetta
er í raun alveg nýtt fyrir mig, að því
leyti að það er allt annað að starfa
hérna í sveitarstjórn en í bæjarstjórn
í Hafnarfirði. Það verða líka allmikl-
ar breytingar hérna núna með því
að ráða starfsmann sveitarfélags-
ins og opna skrifstofu þar sem fólk
getur leitað eftir þjónustu. Það er
mikil þörf á þessu, ekkert síður fyr-
ir eigendur þeirra 600 sumarbústaða
sem eru í hreppnum, en íbúana sem
eru rúmlega 50. Fyrsta erindið sem
ég þurfti að sinna var einmitt vegna
rotþróar við einn sumarbústaðinn,“
segir Árni. Spurður hvort það muni
ekki reynast erfitt að reka svo lítið
sveitarfélag sem Skorradalshrepp
segir hann að trúlega sé það svo en
það eigi eftir að koma betur í ljós.
Hvað áætlaðar framkvæmdir í sveit-
arfélaginu varðar segir hann að það
verði að berjast fyrir bættum sam-
göngum í sveitinni. „Núna í ár feng-
ust tvær milljónir frá Vegagerðinni
til að lagfæra veginn og gera hann
greiðfæran austur og suður fyr-
ir vatnið fremst í dalnum. Þetta er
öryggisleið ef að til dæmist til gróð-
urelda kæmi. Svo verðum við að
beita okkur fyrir því að haldið verði
áfram að leggja bundið slitlag á vegi
í hreppnum.“
Ljósleiðaralögn stóra
verkefnið
Árni segir að nú að undanförnu hafi
verið unnið að því að koma upp
vöktunarkerfi með eftirlitsmynda-
vélum við aðkomuleiðirnar fimm í
Skorradal. Þetta sé gert til að tryggja
öryggi íbúanna og eigendur sumar-
húsa fyrir gripdeildum. Kerfið sé til-
búið og hafi reynst vel, en ólokið sé
að koma fyrir skiltum og einnig eigi
eftir að ganga frá samningum um
vöktun og tengja það eftirliti lög-
reglu. „Stóra verkefnið hjá okkur
næstu árin verður svo lagning ljós-
leiðara um hreppinn. Þetta er brýnt
hagsmunamál fyrir íbúana. Krafan
er orðin svo mikil um góð fjarskipti
og netsamband. Okkur skilst að það
sé hreinlega þannig að unglingarn-
ir fáist ekki með í sumarhúsin nema
netsamband sé gott. Væntanlega fer
það einnig að telja inn í fasteigna-
verð gæði netsambands. Það má al-
veg reikna með því.“
Miklar framkvæmdir
í Horni
Eins og áður segir keyptu þau Árni
og Ingibjörg Horn fyrir þremur
árum af Landsbankanum. Þá voru
húsakynni ekki í góðu ástandi og
hefur Árni að undanförnu haft ær-
inn starfa við að endurnýja innrétt-
ingar í íbúðarhlutanum sem er í
gömlu endurgerðu fjárhúsunum. Í
Horni er líka 120 fermetra hesthús
og hefur Árni einnig á prjónunum
að innrétta hlöðuna fyrir vinnustofu
og gallerí. Hann hefur stundað list-
málun í alllangan tíma og ennþá
eru listaverkin hans innpökkuð í
hlöðunni og bíða þess að gallerí-
ið verði til með tíð og tíma. Blaða-
maður býsnast yfir því að varla muni
nú Árna endast ævin í að vinna einn
að þessari stóru framkvæmd. „Nei,
ef ég ætla mér að fá þetta í gagnið
áður en langt um líður þá verð ég
að fá mannskap. En þetta er mjög
spennandi verkefni og ég uni mér
mjög vel í þessu stórkostlegu um-
hverfi undir Skessuhorni. Ekki er ég
síst stoltur af því að fjallið skuli vera
í okkar landareign. Við erum svolít-
ið í hrossum hérna, erum með um
tuttugu hross hjá okkur eins og er
en eigum þau reyndar ekki öll. Ég
sé ekki að ég verði hérna með búfé,
en kannski ég fái mér íslenskar land-
námshænur þannig að ég geti talist
til alvöru bænda,“ segir Árni bros-
leitur að endingu.
þá
Árni Hjörleifsson við bæjardyrnar heima í Horni.
Horft heim að húsunum í Horni í Skorradal. Langt ofar, falið í þokunni, trónir svo
Skessuhornið sem tilheyrir jörðinni, eitt helsta kennileiti héraðsins.