Skessuhorn - 10.12.2014, Síða 16
16 MIÐVIKUDAGUR 10. DESEMBER 2014
Þórdís Björgvinsdóttir eigandi Blómaverks í Ólafsvík:
„Maður á bara eitt líf og ég vildi láta drauminn rætast“
Skammt fyrir ofan höfnina í Ólafs-
vík er lítil blóma- og gjafavöru-
verslun. Ljósaskiltið með nafninu
Blómaverk lýsir skært eitt síðdeg-
ið í upphafi aðventu. Klukkan er
orðin fimm, myrkur er fallið á. Að-
ventan að hefjast með hátíð ljóssins
í skammdeginu. Við göngum inn.
Þarna er kona að afgreiða viðskipta-
vini. Við bíðum þar til fólkið hef-
ur fengið úrlausn sinna mála. Það
kveður og gengur út. Við tökum af-
greiðslukonuna tali. Það er hún sem
rekur þessa búð. Þann 1. nóvember
síðastliðinn hafði hún gert það í eitt
ár. Konan heitir Þórdís Björgvins-
dóttir.
Líður vel í Ólafsvík
Við höfum rambað inn án þess að
gera boð á undan okkur. Þórdís
verður hissa þegar við segjum henni
að Skessuhorn vilji fá viðtal en felst
fljótt á að segja frá sjálfri sér. „Ætt-
ir mínar liggja í Skagafirði og Svarf-
aðardal en ég bjó í Hafnarfirði þeg-
ar við hjónin fluttum hingað 2002.
Maðurinn minn heitir Stefán Ingvar
Guðmundsson. Hann er sjómað-
ur og starfar sem kokkur um borð
í Rifsara SH. Við kunnum ákaflega
vel við okkur hér í Ólafsvík en Stef-
án er ættaður héðan. Ég vann hjá
sýslumanni Snæfellinga áður en ég
hóf rekstur verslunarinnar Blóma-
verks. Þar á undan hafði ég unnið
á leikskóla, hjá Átthagastofu Snæ-
fellinga og í Pakkhúsinu. Svo var
ég formaður lista- og menningar-
nefndar í Snæfellsbæ í ein átta ár.“
Þórdís og Stefán eiga tvær dæt-
ur og einn son. Báðar dæturnar hafa
hleypt heimdraganum til að sækja
sér menntun fyrir sunnan. „Önn-
ur er að verða tvítug og hin 22 ára.
Sú eldri heitir Soffía Rós. Hún er í
ferðamálafræði við Háskóla Íslands
og vinnur reyndar með náminu í
Blómavali. Yngri dóttirin Kristfríð-
ur Rós leggur stund á íþróttafræði-
nám í Keili á Suðurnesjum. Sonur-
inn Steinþór sem er 18 ára stundar
nám í Fjölbrautaskóla Snæfellinga
líkt og systur hans gerðu.“
Keypti blómabúð
Fólk búsett á landsbyggðinni
stendur oft frammi fyrir erfiðum
ákvörðunum þegar börnin vaxa úr
grasi. Skyndilega er það á eins kon-
ar krossgötum í lífinu. Spurningar
vakna. „Mjög margt fólk ákveður
að elta börnin sín suður þegar þau
halda í frekara nám. Okkur datt það
svo sem í hug. Hins vegar er það
svo að þetta verður spurning hvar
maður ætli að stoppa ef slíkt ferli er
hafið. Hvað ef börnin flytja svo er-
lendis? Á að elta þau þangað?“
Þórdís segist hafa staðið frammi
fyrir svona vali þar sem hún þurfti
að gera það upp við sig hvort yrði
heilladrýgra, að vilja vera eða
vilja fara. „Ég ákvað frekar að láta
drauminn rætast hér í Snæfellsbæ
og opna blómabúð. Ég hafði unnið
í slíkri verslun og við blómaskreyt-
ingar þegar ég bjó fyrir sunnan og
þetta togaði alltaf í mig. Maður á
bara eitt líf og mikilvægt að þora
að taka ákvarðanir í lífinu annars er
hætta á því að maður sjái eftir því
seinna meir. En auðvitað hefur það
svo sem leitað á mann að fara suður.
Þar á ég mínar kæru æskuvinkonur
og ættingja. Stundum finnst manni
langt að aka á milli Snæfellsbæjar
og höfuðborgarsvæðisins, kannski
jafnvel einu sinni í viku. Sérstaklega
í læknaerindum. En dætur okkar
koma nú alltaf heim hingað vestur
í fríum. Nú bíðum við spennt eft-
ir jólafríinu.“
Gengið afar vel
Verslunin sem Þórdís opnaði var
rótgróin í Ólafsvík. Hún tók ein-
faldlega við henni af Guðmundu
Wiium sem hafði rekið hana áður.
„Við fengum lyklana og máluðum
fram á morgun og opnuðum síðan
daginn eftir. Það var 1. nóvember
í fyrra. Það er búið að ganga mjög
vel. Ég hef fengið afskaplega góðar
viðtökur fólks alls staðar frá af Snæ-
fellsnesi, hvort heldur er hér í Snæ-
fellsbæ, Grundarfirði, Stykkishólmi
eða úr sveitinni.“
Það er gaman að fylgja Þórdísi á
meðan hún sýnir verslunina sína.
Greinlegt er að búðin er henni
hjartans mál. Áhuginn geislar af
henni. Þórdís er í samstarfi við vin-
konu sína Brynju Bárðardóttur
blómaskreyti. Hún rekur blóma-
og lífsstílsbúðina Möggubrá í bláu
húsunum í Skeifunni í Reykjavík.
Áður var hún Brynja brautarstjóri
blómaskreytingabrautar Landbún-
aðarháskólans. „Brynja fékk styrk
til þess að þróunarverkefnis sem
kallast „Vistvæn efni og endurnýt-
ing í blómaskreytingum.“ Þetta eru
til dæmis svokallaðir Oasis-kubbar
sem notaðir eru í blómaskreytingar.
Þeir eru ekki umhverfisvænir. Hún
er nú að vinna að umhverfisvænna
efni til þess að nota í skreytingar og
kransa. Hún er algjör snillingur á
sínu sviði. Maður þarf að hugsa um
umhverfið og spá í þessa hluti.“
Verslun og listagallerí
Þórdís hefur staðið fyrir námskeið-
um í blómaskreytingum í Snæ-
fellsbæ. „Sjálf hef ég farið á mörg
námskeið í gegnum árin, alveg frá
því ég var tvítug. Nú síðast í gær-
kvöldi var ég með námskeið í að-
ventuskreytingum í Átthagastof-
unni. Einnig hafa Skagaskessur,
sem eru þær Guðfinna Rósants-
dóttur og Ásthildur Ósk Ragnars-
dóttir búsettar á Akranesi, kom-
ið tvisvar hingað til Ólafsvíkur og
haldið námskeið í kertaskreyting-
um, skilta- og púðagerð. Ég þrífst
best ef það er eitthvað um að vera.
Mér finnst mikilvægt að fólk hafi
eitthvað við að vera. Það lífgar uppá
tilveruna. Fólk verður svo miklu
ánægðara og hamingjusamara.“
Það eru ekki einungis blóm í
þessari verslun. Þórdís er líka með
ýmsa gjafavöru og málverk. Flestar
myndirnar eru eftir Vigdísi Bjarna-
dóttur leiðsögu- og myndlistarkonu
sem er fædd og uppalin í Ólafsvík.
Hún býr á Álftanesi og vann um
áratugaskeið á skrifstofu forseta Ís-
lands. „Málverkin hennar eru af-
skaplega falleg. Mörg með mótív-
um héðan úr Ólafsvík og af Snæ-
fellsnesi. Mér þykir ákaflega gaman
að blanda því við blóma- og gjafa-
vöruverslunina að vera með hálf-
gert gallerí samhliða. Það lífgar
upp á verslunina, skapar fjölbreytni
og skreytir hana mikið. Ég er líka
með ótrúlega fallegar myndir eft-
ir Örnu Dögg Tómasdóttur héðan
úr Ólafsvík. Svo er maðurinn minn
að stunda ljósmyndun í frístundum
og selur sínar myndir hér í versl-
uninni. Þessu til viðbótar er ég svo
með vörur frá Marlín Birnu. Hún
er bæði að selja fisk úti í Lundún-
um og er hönnuður.“
Hún opnar glerskáp og dregur
fram fallega ermahnappa í öskjum.
„Þessir ermahnappar eru með lax-
aroði. Þetta er nú jólagjöf sem sjó-
menn ættu að fá,“ segir Þórdís og
brosir við.
Mengunarlaus kerti í
kjölfar sjúkdóms
Viðtalið tekur óvænta stefnu þeg-
ar Þórdís sýnir okkur sérstök hand-
gerð kerti sem framleidd eru á Ír-
landi. „Þetta eru lífræn kerti sem
við hjónin flytjum sjálf inn. Mörg
kerti innihalda mikið af eiturefn-
um sem sleppa út í umhverfið við
bruna. Fólk er kannski að velta fyr-
ir sér mengun úti til dæmis af völd-
um eldgossins en gerir sér svo ekki
grein fyrir því að það er með miklu
meiri mengun inni hjá sér út frá
kertum sem geta gefið frá sér svip-
aða mengun og púströr á bíl. Til
langs tíma er það mjög skaðlegt,
sérstaklega fyrir börn og þá sem eru
ekki heilir til heilsu,“ segir Þórdís
alvarlegri í bragði.
Hún útskýrir þetta nánar: „Ástæð-
an fyrir því að við fórum að hugsa út
í þetta er að Kristfríður Rós dótt-
ir okkar veiktist alvarlega fyrir
tveimur og hálfu ári af mjög sjald-
gæfum sjúkdómi sem kallast Le-
mierre-syndrome. Hún fékk mjög
mikla hálsbólgu. Í um viku var tal-
ið að hún væri með einkyrnings-
ótt. Kristfríður Rós var að lokum
lögð inná Barnaspítala Hringsins.
Þar lá hún var í rúmar 6 vikur og
fékk mikið pencilíni í æð vegna sýk-
ingar. Hún stafaði af bakteríu sem
við erum öll með í hálsi. Þessi bakt-
ería fór af stað, fjölgaði sér stjórn-
laust og olli blóðtappa í bláæðum.
Hún fékk blóðtappa í hálsi og lung-
un urðu eins og gatasigti. Lækn-
arnir greindu hana með Lemierre-
syndrome. Henni var vart hugað líf
um tíma en hún náði samt heilsu
aftur. Þetta var í apríl 2012. Krist-
fríður Rós fór ekkert í skólann eft-
ir páskafrí en kláraði samt fullt hús
eininga á önninni. Læknarnir sögðu
að hún myndi aldrei aftur spila fót-
bolta sem hún hafði gert áður en
hún veiktist. Þeir ráðlögðu henni að
fara í golf. Í dag er hún komin í sitt
besta form. Hún gafst aldrei upp,
hefur algerlega jafnað sig, sárin í
lungunum hafa gróið. Í dag stund-
ar hún nám í einkaþjálfun og styrkt-
arþjálfun hjá Keili á Suðurnesjum.
Eftir þetta fórum við að hugsa um
svona þætti eins og mengun inni á
heimilinu. Þar af leiðir að við fund-
um þessi hreinu kerti.“
Ýmsar gjafavörur og í bakgrunni málverk af tjaldi eftir Vigdísi
Bjarnadóttur frá Ólafsvík.
Verslunin er vistleg með blómum, gjafavörum og myndlist á
veggjum.
Málverk af kríu eftir Örnu Dögg Tómasdóttur.
Þórdís í verslun sinni. Aftan við hana er málverk af baldursbráabreiðu og Ólafsvík eftir Vigdísi Bjarnadóttur.
Verlsunin Blómaverk í síðdegismyrkrinu á aðventu.