Þjóðlíf - 01.04.1988, Blaðsíða 42

MENNING
Súld leikur fyrir 15 þús. áheyrendur á alþjóðlega djassfestivalinu í Montreal sumarið
1987.
Súld var stofnuð sem tríó haustið 1986 af
þeim Steingrími, Szymon og Stefáni Ingólfs-
syni bassaleikara. Tryggvi Hubner gítarleik-
ari starfaði með sveitinni í rúmt ár en nú
hefur Lárus H. Grímsson hljómborðsleikari
leyst hann af hólmi. Bíða aðdáendur Súldar
spenntir að heyra hvaða áhrif Lárus hefur
haft á tónlist hljómsveitarinnar en hann hef-
ur verið mörg undan farin ár við nám í elek-
trónískri nútímatónlist í Hollandi. Þá segja
þeir að hugsanlega verði gítarleikara bætt í
hópinn.
„ Það er óvenjulegt við tónlist plötunnar að
þar er blandað saman elektrónískri tónlist
hljómborðsins við hreinan (accoustic) tón
fiðlunnar. Rafbassa á móti náttúrulegum
ásláttarhljóðfærum Stcingríms", segir Szym-
on. „Eg forðast að nota nokkra auka hljóð-
effekta í fiðluspilinu, leik eingöngu á óraf-
magnaða gamla fiðlu“ —.
Þið komið úr ólíkum áttum, Szymon með
sinn klassíska bakgrunn úr sinfóníuhljóm-
sveit, Lárus úr elektrónískri músík, Stein-
grímur m.a. indverskum músíkþreifingum
o.s.frv. Hvað sameinar ykkur í Súld?
„Sennilega er það bæði ánægjan sem við
höfum af því að sameina ólíka reynslu í tón-
listinni og svo er það mjög krefjandi fyrir
okkur sem tónlistarmenn", svara þeir.
„Fyrir mig fullnægir Súld ákveðinni tjáning-
arþörf, því í sígildri tónlist nýt ég ekki sama
frelsis og þegar ég leik djass“, segir Szymon.
Steingrímur segist hafa skynjað það þegar í
upphafi að í Súld gæfist möguleiki á að skapa
eitthvað ákveðið og brjótast jafnframt út úr
hefðbundnum djassleik. „Við viljum vinna á
agaðan hátt að því að þróa okkar tónlist",
segir hann.
Ekki er gerlegt fyrir meðlimi Súldar að
ætla sér að lifa á því hér á landi að leika
eingöngu þessa músík og því hafa þeir í ýmis
önnur horn að líta en segjast þó koma oft
saman og æfa mjög stíft. „Hljómsveitin ætti
að geta dafnað og þroskast ef við fáum tæki-
færi til að leika á nokkrum tónleikum hér
Lárus Halldór Grímsson
hljómborðsleikari
Lárus, sem er fæddur árið 1954, vakti
fyrst athygli sem hljómborðsleikari í
rokksveitinni Eik á áttunda áratugnum.
Hann nam viðTónlistarskóla Reykjavíkur
í mörg ár en hélt árið 1979 til Hollands þar
sem hann hefur verið við nám og störf í
elektrónískri nútímatónlist og hljóðkönn-
un í Utrecht. Lárus leikur bæði á flautu og
hljómborð og hefur þegar skapað sér
nafn fyrir tónsmíðar og samið tónlist fyrir
kvikmyndir, ballett og leikhús.
innanlands á hverju ári og farið utan í tón-
leikaferðir einu sinni eða tvisvar á ári“, segir
Steingrímur. „Súld er komin til að vera og
við höfum mikla trú á því sem við erum að
gera. Við ættum þá að geta þróað ennfrekar
okkar eigin stfl ef okkur tekst að halda vel
saman“.
Szymon er varakonsertmeistari Sinfón-
íuhljómsveitar íslands og inni ég hann eftir
því hvort fólki finnist skrítið að viðurkennd-
ur fiðlumeistari í sígildri tónlist sé líka að
spila nútíma djasstónlist. „Fólk hefur tekið
þessu vel, held ég,“ svarar hann. „Bæði ung-
ir sem þeir eldri hafa lýst yfir ánægju sinni
með það sem við erum að gera í Súld. Svo
eru Islendingar svo vanir því að fást við
marga hluti í einu að þetta þykir ekkert til-
tökumál en vissulega er tónlist Súldar gjör-
ólík hinni svokölluðu klassísku tónlist".
„I Súld erum við að fást við margt fleira en
heyra má á nýju plötunni", segir Steingrím-
ur. „Síðasta sumar fluttum við t.d. verk eftir
Szymon hjá Musica Nova sem er nokkurs
konar tilraunamúsík byggð á óvæntum upp-
ákomum og hyggjumst við gera meira af
slíku. E.t.v. eigum við eftir að gera plötu
með þess konar tónlist“.
„Það óvænta og óundirbúna í tónlist hefur
alltaf verið ríkur þáttur í djassi“, segir Szym-
on. „Þetta kemur best fram þegar tónlistar-
menn hittast og djamma saman. í Súld höf-
um við þó alltaf ætlað okkur fyrst og fremst
að skapa hljómsveitinni sinn eiginn stfl. Við
viljum ekki vera að endurtaka það sem aðrir
hafa gert“.
„Hljómsveitin hefur fengið tækifæri til að
leika nokkrum sinnum í sjónvarpi en hún er
enn svo ný af nálinni að margir vita lítið sem
ekkert af því sem við erum að gera“, segir
Steingrímur.,, Þegar við lékum á tónleikum
til styrktar byggingu tónlistarhúss um dag-
inn, komu margir til okkar á eftir og lýstu yfir
hrifningu sinni en spurðu jafnframt af hverju
ekkert hefði heyrst til okkar fyrr...“ „Já,
menn vcftu undrandi á að hljómsveit af þessu
tagi væri til á íslandi“, segir Szymon. „Senni-
lega hefur svona hljómsveit aldrei starfað
fyrr á íslandi“.
Fyrirhugað er að haldinn verði útgáfu-
konsert þegar Bukoliki kemur út á næstu
dögum. En hvað merkir Bukoliki?
„Það er dregið af heiti verks eftir mig“,
segir Szymon. „Nafnið sjálft hefur enga sér-
staka merkingu á pólsku en vísar til pólskra
þjóðsagna og er ætlað að minna á pólsk áhrif
í verkinu".
„Eg vil bæta því við“, segir hann, „að við
unnum að upptökum í hljóðverinu við ein-
staklega góðar aðstæður. Platan var unnin á
100 tímum en við fengum allan þann tíma
sem við þurftum og vorum lausir við þetta
stressaða andrúmsloft sem oft vill fylgja stú-
díóvinnu. Því gátum við einbeitt okkur að
því að skapa þá tónlist sem við viljum að
komi út úr samstarfi okkar, af bestu gæðum
án nokkurrar utanað komandi truflunar.
Slík vinnubrögð eru mikilvæg fyrir tónlist
okkar í Súld“.
Ómar Friðriksson.
42