Frjáls verslun - 01.09.2006, Síða 75

Bjarni Ármannsson, forstjóri Glitnis, er formaður Norsk-íslenska viðskiptaráðsins sem stofnað var 10. mars síðastliðinn að við-
stöddum utanríkisráðherrum landanna, þeim Geir H. Haarde og
Jonas Gahr Störe. Tilgangur ráðsins er að efla viðskipti og efnahags-
samvinnu landanna, meðal annars með því að standa fyrir fræðslu-
fundum og ráðstefnum auk þess að veita upplýsingar um atvinnulíf,
fjárfestingarmöguleika og viðskiptamöguleika í Noregi og á Íslandi.
Meðlimir eru bæði fyrirtæki og einstaklingar í hvoru landi um sig.
Við stofnun Norsk-íslenska viðskiptaráðsins sagði Bjarni Ármannsson
að ráðið yrði drifkraftur í samstarfi landanna í viðskiptum, menn-
ingu, íþróttum og á fleiri sviðum.
Viðskipti milli Íslands og Noregs eiga sér langa sögu en stofnun
viðskiptaráðsins gerist á sama tíma og viðskipti þjóðanna hafa aukist
mjög auk þess sem þau ná yfir fleiri svið. Þá hafa íslenskir bankar og
fjárfestar notið aukinnar athygli í Noregi.
Þátttaka Bjarna Ármannssonar í Norsk-íslenska viðskiptaráðinu
kemur ekki á óvart þegar haft er í huga að Glitnir lítur bæði á Noreg
og Ísland sem sinn heimamarkað.
„Ég tel að í öflugum samskiptum og virku tengslaneti felist mikil
tækifæri ef rétt er á málum haldið og mig langaði til að leggja mitt lóð
á vogarskálarnar,“ segir Bjarni. „Sem formaður get ég stuðlað að öfl-
ugri viðskiptum milli landanna og aukinni samvinnu þeirra á ýmsum
sviðum. Viðskiptaráðið er kjörinn vettvangur fyrir ýmis sameiginleg
hagsmunamál okkar.“
Bjarni segir að fyrsta markmið Norsk-íslenska viðskiptaráðsins sé
að fá fleiri meðlimi og gera það fjárhagslega í stakk búið til að sinna
hlutverki sínu með sóma. „Traust fjárhagsstaða skapar grundvöll fyrir
metnaðarfulla starfsemi og blæs stjórnarmönnum kapp í kinn. Við
réðum nýlega starfsmann í hlutastarf til að sjá um daglegan rekstur
ráðsins. Næsta verkefni er jólasamkoma í bústað íslenska sendiherr-
ans í Osló þangað sem boðið verður ýmsum aðilum úr viðskipta- og
menningarlífi landanna.“
Líkar þjóðir
Áhugi er á að skipuleggja ráðstefnur og fræðslufundi - til að mynda
hádegisverðarfundi - þar sem einn eða fleiri ræðumenn munu fjalla
um áhugavert efni og hvetja til umræðu.
Bjarni segir stefnuna setta á stóran viðburð í febrúar eða mars á
næsta ári þar sem áherslan verður á tengsl Íslands og Noregs á ýmsum
sviðum.
En hverju vill Bjarni koma til leiðar sem formaður Norsk-íslenska
viðskiptaráðsins?
„Ég vil stuðla að bættri ímynd Noregs á Íslandi og að sama skapi
standa fyrir kynningu á Íslandi í Noregi. Öflug upplýsingagjöf liðkar
fyrir öllum samskiptum milli fólks.Við höfum átt frábært samstarf við
sendiherra og starfsfólk sendiráðanna í hvoru landi um sig og væntum
mikils af því í framtíðinni.“
Bjarni segir það auðvelda öll samskipti hve þjóðirnar eru líkar.
„Menning landanna er mjög lík sem endurspeglast meðal annars
í því að margir Norðmenn segja mun auðveldara að vinna með
Íslendingum en til dæmis Svíum, Dönum eða Finnum. Við munum
auðvitað njóta þessa í starfi ráðsins.“
Bjarni Ármannsson. „Sem formaður vil ég stuðla að öflugri viðskiptum
milli landanna og aukinni samvinnu þeirra á ýmsum sviðum.“
NORSK-ÍSLENSKA VIÐSKIPTARÁÐIÐ
Vill stuðla að
bættri ímynd
Noregs á Íslandi
F R J Á L S V E R S L U N • 9 . T B L . 2 0 0 6 75
„Öflug upplýsingagjöf
liðkar fyrir öllum sam-
skiptum milli fólks.“