Ægir - 01.04.2002, Blaðsíða 28
28
Æ G I R H E I M S Æ K I R S Æ P L A S T N O R G E
endurskipuleggja mannahald og fara í ýmsar nauð-
synlegar breytingar á skipulagi, húsnæði og fram-
leiðsluþáttum. Við megum heldur ekki gleyma því
að hér erum við að tala um að sameina fyrirtæki und-
ir einn hatt sem hafa áður verið að keppa á markaðn-
um og slíkt þarf að hafa í huga þegar fólk metur
hversu hratt verkefni af þessu tagi geta unnist,” segir
Steinþór.
Mikill ávinningur af innkomunni í Noregi
Steinþór viðurkennir að það hafi ekki aðeins verið
framleiðsluleg lyftistöng að fara inn í verksmiðjurnar
þrjár í Noregi heldur hafi ekki síður náðst inn í Sæ-
plast mjög mikilvæg markaðs- og söluþekking með
þessu skrefi.
„Fyrirtækin hér í Noregi hafa að baki sér áratuga
sögu og uppbyggingarstarf. Hér fáum við gríðarlega
viðbótarþekkingu á kerjasvið okkar og ekki síður er-
um við að bæta við okkur þekkingu á þessari
bryggjuvöru sem við framleiðum hér í Álasundi, þ.e.
flotunum, fenderunum og öðrum slíkum vörum.
Hérna erum við líka komnir að þröskuldi olíuiðnað-
arins og getum nýtt okkur tækifæri á því sviði með
framleiðsluaðferðum okkar. Annað dæmi er túnfisk-
veiðigeirinn sem við fáum þekkingu á í gegnum
verksmiðjuna hér í Álasundi. Sá markaður var okkur í
Sæplasti algjörlega framandi áður. Allt er þetta tengt
sjávarútveginum en við getum sagt að Sæplast sé far-
ið að nýta sér mun fleiri vinkla á markaðnum en áður.
Við erum í dag stærra og breiðara fyrirtæki sem er að
sækja inn á breiðara markaðssvið en áður.”
Heimsmarkaðsstarf kostar mikið fé
– Sæplast er augljóslega orðið mun fjölbreyttara og
stærra fyrirtæki en var fyrir nokkrum árum þegar all-
ir tengdu nafn Sæplasts við eina verksmiðju á Dal-
vík. Er einhver óskastærð í þínum huga á fram-
leiðslufyrirtæki af þessari gerð?
„Nei, ég get ekki sagt það. Sjálfir höfum við okkar
innri markmið um stækkun en fram til þessa höfum
við ekki verið tilbúnir til að ræða þau mál þar sem
orkan hefur öll farið í að ná utan um þann pakka sem
við eigum í dag. Nú má segja að tökin á þeim pakka
séu orðin nokkuð styrk og traust og þá er hægt að
horfa fram á veginn. Til að sinna markaðsstarfi á er-
lendri grundu og út um allan heim þurfum við að
vera af ákveðinni stærð. Sæplast á Dalvík, eins og það
var fyrir þessar breytingar, var alltof lítil eining til að
standa undir öflugu markaðsstarfi á heimsvísu. Með
450 milljóna króna veltu að baki sér var grunnur að
slíku heimsmarkaðsstarfi alltof veikur. Við gerðum
okkur grein fyrir því að ef við ætluðum okkur stærri
hluti í markaðsstarfi og áframhaldandi uppbyggingu
þá varð ekki framhjá því litið að stærra fyrirtæki,
fleiri verksmiðjur og í fleiri heimsálfum væru lykill-
inn að því að sækja fram og ná árangri. Markaðsstarf
kostar gríðarlega peninga og síðan þarf að hafa þolin-
mæði til að bíða eftir því að árangurinn skili sér.
Slíkt getur mælst í árum en skilað sér vel til baka
þegar þar að kemur. Langtímasjónarmið og þolin-
mæði eru þess vegna lykilhugtök í svona starfi,” seg-
ir Steinþór.
Hlutabréfamarkaðurinn
ekki alltaf skilningsríkur
Talandi um þolinmæði er fróðlegt að beina sjónum
að viðhorfi á hinum litla íslenska hlutabréfamarkaði
gagnvart starfi Sæplasts og uppbyggingarstarfi fyrir-
tækja almennt. Steinþór segir einkenni á hlutabréf-
markaðnum á Íslandi að menn krefjist árangurs strax
og jafnvel endurspegli sveiflur í hlutabréfaverði ekki
árangur fyrirækjanna.
„Þróun hlutabréfa í Sæplasti hefur sýnt þetta og
vissulega töldum við sjálfir að okkur tækist á styttri
tíma að slípa saman allar verksmiðjur okkar í vel
smurða vél. Gagnvart markaðnum hefur ekkert ann-
að gerst en að Sæplast hefur orðið sterkara með
hverju árinu sem hefur liðið og hverjum manni ætti
að vera ljóst að það að breyta fyrirtæki á þremur ár-
um úr 450 milljóna króna veltu í 2,5 milljarða er
varla hægt án einhvers konar vaxtarverkja. Ég vænti
þess að á hlutabréfamarkaðnum muni menn fylgjast
náið með hvernig okkur gengur í framhaldinu og
hvernig uppbyggingarstarf okkar mun skila sér.”
Sæplast Canada
Verksmiðja Sæplasts í New Brunswick í Kanada, sem keypt var í maí 1999. Þar starfa 70
manns á vöktum og unnið er að jafnaði fimm daga vikunnar, jafnvel alla daga ef því er að
skipta. Ársvelta verksmiðjunnar er um 700 milljónir króna. Í verksmiðjunni eru framleidd
ker og ýmsar afurðir fyrir kjötiðnaðinn, pallettur, stór akkerisbaujur og fleira. Tæknilega
er verksmiðjan vel búin, t.d. er annar af tveimur ofnum verksmiðjunnar frá árinu 2000.
Sæplast India
Verksmiðja Sæplast í Gujarat á Indlandi. Þessa verksmiðju byggði fyrirtækið frá grunni og
eru starfsmenn nú um 25 talsins og ársvelta er um 40 milljónir króna. Í verksmiðjunni er
ein hverfisteypuvél og sérhæfing verksmiðjunnar snýr að framleiðslu á minni gerðum af
kerjum, þ.e. frá 100 til 600 lítra kerjum.
Sæplast Dalvík
Tæknivæddasta verksmiðja Sæplasts er á Dalvík þar sem uppbygging fyrirtækisins hófst á
sínum tíma. Þar starfa 40 manns við framleiðslu á kerjum, byggingarvörum og trollkúlum.