Ægir - 01.04.2003, Blaðsíða 17

17
Æ G I S V I Ð TA L I Ð
ann og því stunda ég núna „heldrimannasportið”
golf og fer í útreiðartúra þegar ég get,” segir Ingi
Björn.
Margir lögðu baráttunni lið
Sjómannadagsráð Akureyrar heiðrar Inga Björn Al-
bertsson á sjómannadaginn 2003 fyrir hans miklu
baráttu á Alþingi fyrir kaupum á björgunarþyrlu fyr-
ir Landhelgisgæsluna. Með þessu vill sjómannadags-
ráð sýna í verki þakklæti fyrir vel unnin störf um leið
og minnt er á hversu mikilvægu hlutverki öflug
björgunarþyrla gegnir í öryggismálum sjómanna-
stéttarinnar.
„Ég verð að viðurkenna að mér kom það skemmti-
lega á óvart þegar ég fékk upphringingu frá Sjó-
mannadagsráði Akureyrar og mér var tilkynnt að
ráðið ætlaði að heiðra mig á sjómannadaginn. Mér
finnst afar vænt um þessa viðurkenningu og er stolt-
ur og þakklátur fyrir að einhver skuli muna eftir bar-
áttunni fyrir kaupum á björgunarþyrlu. En ég minni
líka á í þessu sambandi að ég stóð ekki einn barátt-
unni, þar kom margt fólk að bæði í þinginu og ann-
ars staðar. Meðal annarra lögðu stéttarfélög sjómanna
málinu dyggilega lið sem og aðstandendur sem áttu
um sárt að binda í kjölfar sjóslysa. Og ég var í ágætu
sambandi við menn hjá Landhelgisgæslunni, einkum
ræddi ég málið oft við flugstjórana Pál Halldórsson
og Benóný Ásgrímsson. Þeir voru mér innan handar
allan tímann og mjög hjálplegir. Margir góðir þing-
menn lögðu málinu lið. Sérstaklega minnist ég
Guðrúnar Helgadóttur, fyrrverandi þingforseta og
rithöfundar, Steingríms Hermannssonar, fyrrverandi
forsætisráðherra, og Ólafs Ragnars Grímssonar, for-
seta Íslands og fyrrverandi þingmanns og ráðherra.”
Sakna ekki þingmennskunnar
Ingi Björn segist á síðustu árum hafa fylgst með
Landhelgisgæslunni úr fjarlægð. „Maður óskar þess
auðvitað heitast að þyrlan þurfi sem sjaldnast að fara
á loft. Því miður boðar það alltof oft ógæfu þegar
þyrlan er kölluð út. En við skulum ekki gleyma því
að TF-LIF er gríðarlega mikilvægt öryggistæki sem
hefur nú þegar bjargað mörgum bæði til sjós og
lands,” segir Ingi Björn og telur miður að heyra þær
fréttir frá Landhelgisgæslunni að stofnunin búi við
mikið fjársvelti. „Auðvitað er þetta spurningin um
forgangsröðun verkefna. Í mínum huga á að hugsa
fyrst og síðast um heilsu þegna landsins,” segir Ingi
Björn.
Hann segist eins og hver annar hafa fylgst með
umræðu stjórnmálamannanna fyrir þingkosningarnar
10. maí sl. og hafi hreint ekki saknað þess að vera
utan eldlínunnar. „Já, ég get ekki ímyndað mér ann-
að en að ég sé hættur í pólitík. Ekki nema aldurinn
fari eitthvað illa í mig og mér detti eitthvað í hug
þegar aldurinn færist yfir. En eins og staðan er í dag
hef ég engan áhuga á að fara aftur inn á þing. Ég tel
mig hvergi eiga heima í hinu pólitíska landslagi í
dag,” segir Ingi Björn Albertsson.