Ægir - 01.11.2003, Blaðsíða 38

38
Björn Valdimarsson:
Sóknarfæri í ferska fiskinum
„Það er mikill vöxtur í útflutningi á ferskum fiski og sá vöxt-
ur hefur fyrst og fremst verið í Bretlandi og í örfáum öðrum
Evrópulöndum. Með aukinni framleiðslu og betri flutnings- og
geymsluþætti held ég að unnt sé að selja hana víðar en menn eru
að gera í dag.”
Þorsteinn Már Baldvinsson:
Takmarkaður markaður
„Ég tel að markaður fyrir ferskan fisk sé takmarkaður. Mark-
aðurinn er að borga hátt verð fyrir þessa vöru og við erum líka
að greiða allt að 150 krónum á kíló fyrir flutninga á vörunni, en
til þessa hefur hún fyrst og fremst verið flutt á erlenda markaði
með flugi.
Ég er ekki sammála því sem sumir vilja halda fram að mark-
aður fyrir sjófrystan fisk sé að láta undan. Þessi markaður er
sterkur og vel borgandi. Við fengum mjög gott verð fyrir sjó-
frystar afurðir á síðasta ári og á fyrri hluta þessa árs. Það sem
hefur ruglað þennan markað á þessu ári má segja að séu stjórn-
lausar veiðar Rússa. En engu að síður tel ég að markaður fyrir
sjófrystu afurðirnar sé sterkur. Að sama skapi tel ég að markaður
fyrir ferskan fisk sé sterkur, en hann er jafnframt takmarkaður.
Varðandi hlutaskiptakerfi sjómanna, þá hef ég alltaf verið
hlynntur því og tel æskilegt að það verði áfram við lýði. Aftur á
móti er ljóst að það þarf að taka upp ýmis mál í kjarasamning-
um og ég vonast til þess að það muni ganga eftir. Ég tel að sjó-
menn eigi að fá að njóta góðs af þegar vel gengur og verðið er
hátt. En auðvitað er hundleiðinlegt þegar verð lækka, eins og
hefur gerst að undanförnu.”
Konráð Alfreðsson:
20% lækkun launa sjómanna
„Tekjur sjómanna í Sjómannafélagi Eyjafjarðar hafa lækkað
um 20% á síðasta ári vegna lækkandi afurðaverðs. Félagsgjöld í
sjómannafélaginu eru 1% af launum og því hafa tekjur félagsins
lækkað umtalsvert á síðustu mánuðum. Við þetta bætist líka að
sjómönnum sem eiga aðild að félaginu hefur verið að fækka.
Út af fyrir sig sé ég ekki neinn mun á því hvort fiskverð hefur
lækkað eða ekki þegar kjarasamningar eru framundan. Þetta er
spurning um vilja og að menn komi jákvæðir til samningagerð-
ar. Afurðaverðið er að mínu mati ekki afgerandi þáttur í þessu,
það á eftir að fara upp á nýjan leik og lækka síðan aftur, rétt eins
og alltaf hefur gerst.”
Helgi Laxdal:
Þarf að finna lausn varðandi uppsjávarfiskinn
„Vélstjórafélagið er með bundna kjarasamninga til ársloka
2005 og þess vegna þurfum við ekki að leggja á okkur að sitja í
þessu karpi fyrr en þá og fögnum því.
Varðandi laun sjómanna, þá eru þau nánast alfarið orðin tengd
markaðsverðinu. Í síðustu samningum voru fjórar algengustu
tegundirnar, þorskur, ýsa, karfi og ufsi, tengdar við markaðinn.
Ég heyri ekki að sjómenn kvarti svo mikið yfir þessu. Þær teg-
undir sem þurfum hins vegar að finna lausn á varðandi verð-
lagningu er uppsjávarfiskurinn og ég lít svo á að það sé okkar
næsta verkefni.”
Kristján Möller:
Verðum að skapa sátt
„Ég held að eins og hér hefur komið fram, sé ákaflega mikil-
vægt að að menn sjái sjávarútvegsstefnu til tíu til tuttugu ára.
Ég hef stundum sagt, og fyrir því mun ég berjast innan míns
flokks og annars staðar þar sem ég hef tækifæri til, að það er
ákaflega mikilvægt að skapa sem mesta sátt í þjóðfélaginu um
sjávarútvegsstefnu til komandi ára. Þetta gengur ekki eins og
það er núna, en til þess held ég að allir verði að gefa töluvert eft-
ir í sínum ítrustu kröfum, jafnt útgerðarmenn og stjórnmála-
flokkar, þar á meðal minn stjórnmálaflokkur og aðrir. Ég held
að það sé grundvallarastriði næstu ára að skapa þessa sátt, það
má ekki til langs tíma hafa þjóðfélagið á öðrum endanum útaf
höfuðatvinnuvegi þjóðarinnar. Það gengur ekki upp.”
B L A Ð AU K I U M S J Á VA R Ú T V E G Á N O R Ð U R L A N D I
Að loknum framsöguerindum á ráðstefnunni var efnt til pallborðsumræðna, þar sem ýmis mál voru reifuð og fundarmenn
skutu að nokkrum athugasemdum og fyrirspurnum. Við pallborðið voru f.v. Konráð Alfreðsson, formaður Sjómannafélags
Eyjafjarðar, Úlfar Steindórsson, stjórnarformaður Primex, Björn Valdimarsson, markaðsstjóri Þormóðs ramma-Sæbergs,
Valdimar Bragason, bæjarstjóri í Dalvíkurbyggð, Helgi Laxdal, formaður Vélstjórafélags Íslands, og Þorsteinn Már
Baldvinsson, forstjóri Samherja hf.
Hér á síðunni birtast nokkur svör þátttakenda í pallborðinu, auk þess sem birt eru ummæli eins fundargesta, Kristjáns Möller,
alþingismanns í Norðausturkjördæmi.