Tímarit Máls og menningar - 01.04.1946, Qupperneq 63

ÁFANGAR
53
anlandsneyzlan myndi nema ár hvert af liverri tegund búvörufram-
leiðslunnar.
Bændur gera á sama hátt áætlun um það í gegnum sín samvinnu-
félög, hve þeir óski og geti selt mikið af þessum vörum. Komi í ljós
mikið ósamræmi á milli framboðs og eftirspurnar hinna einstöku
vörutegunda, verður það jafnað af þar til gerðri nefnd, t. d. aukin
mjólkursöluleyfi, en dregið úr kjötsöluleyfum, unz jafnvægi væri
náð milli framboðs og eflirspurnar, sem vitanlega tæki nokkur ár.
Hið sama er að segja um þá framleiðslu, sem færi á erlendan
markað. Það verður að beina henni inn á þær brautir, sem líkleg-
astar eru á hverjum tíma að borga sig bezt.
Vitanlega kæmi ekki til mála að úthluta hverjum bónda leyfum
fyrir flestum eða öllum greinum framleiðslunnar. Landinu myndi
verða skipt í framleiðsluhéruð með tilliti til þess, hvaða framleiðsla
væri heppilegust á hverjum stað og leyfunum úthlutað samkvæmt
því.
Þó myndi verða að gera ýmsar undantekningar með tilliti til sér-
stöðu einstakra býla, er ekki gætu átt samleið með öðrum í sama
byggðarlagi.
Nú mun spurt verða: Eigum við einungis að framleiða fyrir inn-
lendan markað?
Því verður ekki svarað á þessu stigi málsins. Ur því verður reynsl-
an að skera. Sem stendur erum við ekki samkeppnisfærir með neina
búvöru á erlendum markaði. En við verðum hiklaust að keppa að
því, að svo megi verða, og það ætti að takast.
Við getum lækkað fóðurkostnað fjárins stórkostlega með aukinni
ræktun. Vísindamenn okkar verða að sigrast á sauðfjársjúkdómun-
um, þar má ekkert til spara, og fjárræktarfræðingar okkar verða að
vinna að kynbótum fjárstofnsins, svo að afurðirnar geti orðið fyrsta
flokks vörur.
Þegar við höfum náð viðhlítanlegum árangri í þessum efnum, get-
um við aukið okkar sauðfjárrækt á ný og tekið að flytja út afurðir
af því tagi í stærra stíl en áður.
Þá verður nautgriparæktin aðallega stunduð í byggðahverfum,
þar sem kúnum verður eingöngu beitt á ræktað land, en sauðfjár-
ræktin verður, sem áður fyrr, aðalatvinnuvegur strjálbýlisins.