Tímarit Máls og menningar - 01.06.1969, Blaðsíða 46
Tímarit Máls og menningar
ennþá sama eggið, eftir að það hefur verið lagt í eggjaskera og skorið í
sneiðar af strengjunum. Hver sín sneiðin. Liggjum þétt en ósamtengjanleg.“
„Karlmenn! Á daginn sigrið þið heiminn, en á nóttunni grátið þið við
hrjóst okkar kvennanna og heyrið hjörtu sjálfra ykkar slá djúpt í barmi
okkar. Þið eruð skapaðir til að dást að okkur, líkaminn fyrir líkama okkar,
hugurinn fyrir huga okkar. Aðeins alþýðumaðurinn, sem elskar konu sína í
sveita síns andlitis, konu sína og börn, — hann skilur þetta, — skilur, að
við erum eins og vinin í eyðimörk án endimarka.
Anna, hvenær kemur önnur bók frá þér. „Kona Lots“ var alveg listaverk.
Ég finn þetta allt saman inni í mér, en ég get bara ekki sagt það eins og þú.“
„Uss, ég skrifaði þetta bara út úr leiðindum. Þetta átti aldrei að verða neitt.
Valur er svo sjaldan heima, og krakkarnir eru orðnir stálpaðir, svo ég varð
að finna mér eitthvað til dundurs.“
„Já, bókin er ágæt. Mér datt aldrei í hug, að hún hugsaði svona um mig.“
„eeeee, heyrðu Baldi. Er það skoðun þín, að til séu tvennskonar lög; lög
náttúrunnar, sem byggja, í fyrsta lagi á sjálfvirku orsakasambandi, í öðru
lagi á náttúruvali; og hins vegar lög mannanna, sem algjörlega séu sköpuð
af þeim?“
„Það veit ég ekkert um. Þú varst alltaf með þessar vangaveltur hér áður
fyrr. Ertu ekki hættur enn?“
„Allt er í heiminum afstætt.“
„Ég er löngu hættur að velta þessu fyrir mér, og stendur á sama um það
allt saman. Hitt veit ég, að lög eru lög og ef tveir menn heimta sama hlutinn,
verður annar að víkja. Þau eru til að vernda manninn gegn sjálfum honum.
Lögin eru miskunnarlaus gagnvart þeim, sem bíður lægri hlut. Og svoleiðis
verður það að vera, annars færi allt í vitleysu. Og þar að auki er enginn ...“
„Uss, Baldi minn, uss ...“
„Hvað er þetta? Jæja þá.“
„Hérna, Hannes, þú afsakar, þótt ég spyrji þig. Hvernig hefur sonur þinn
það?“
„Já, það var mikið talað um það á sínum tíma. Hvernig ...“
„Baldi...“
„Sonur minn? Það væsir ekki um hann.“
„Já, það er sem ég hef alltaf sagt, það væsir ekki um menn í fangelsi. í
rauninni eru menn miklu betur settir fyrir innan grindurnar en fyrir utan
þær.“
36