Breiðholtsblaðið - 01.08.2006, Side 2
Akstursþjónustan
gerir fólki kleift að
búa lengur heima
Akstursþjónusta eldri borgara
er ætluð fyrir þá íbúa Reykjavíkur
sem eru 67 ára og eldri, búa sjálf-
stætt sem hafa ekki aðgang að
eigin farartæki og eru ófærir um
að nota almenningssamgöngur
vegna langvarandi hreyfihömlun-
ar. Umsókn um akstursþjónustu
eldri borgara skal berast til þjón-
ustumiðstöðva í því hverfi þar
sem umsækjandi býr.
Markmiðið með akstursþjón-
ustunni er að gera eldri borgur-
um kleift að búa lengur heima án
þess að lokast inni á heimilum
sínum. Að öllu jöfnu er um að
ræða akstursþjónustu í læknis-
heimsóknir, skipulagða endur-
hæfingu og félagsstarf sem er til
þess að fallið að rjúfa félagslega
einangrun. Með skipulagðri end-
urhæfingu og skipulögðu félags-
starfi er átt við endurhæfingu og
félagsstarf sem er endurtekið
reglulega yfir ákveðinn tíma og
skipulagt, eins og þátttaka í nám-
skeiðum og starf innan félagasam-
taka.
Hugmyndir um
hverfalögreglu ræddar
Björn Bjarnason dómsmálaráð-
herra hefur skipað starfshóp sem
hefur það verkefni að fara yfir
hugmyndir um eflingu hverfalög-
reglu. Í starfshópnum eru Stefán
Eiríksson, sem er nýr lögreglu-
stjóri höfuðborgarsvæðisins og
fulltrúi ráðuneytisins í hópnum
og auk hans tveir fulltrúar Reykja-
víkurborgar.
Nokkrar umræður hafa farið
fram á undanförnum árum um að
sýnilegri hverfislöggæslu verði
komið á í öllum hverfum borgar-
innar. Skipan starfshópsins nú er
í tengslum við endurskipulagn-
ingu á löggæslu höfuðborgar-
svæðisins í heild. Hugmyndir eru
um að hverfislöggæsla fái fast að-
setur í tengslum við allar sex
þjónustumiðstöðvar borgarinnar
líkt og nú í Grafarvogi og Breið-
holti.
Leikskólagjöld lækka
Borgaráð hefur samþykkt tillög-
ur Vilhjálms Þ. Vilhjálmsonar
borgarstjóra um lækkun leik-
skólagjalda.
Námsgjald sem áður var nefnt
kennslugjald, fyrir öll börn, alla
tíma, í öllum flokkum verður
lækkað um 25% frá og með 1.
september nk. Jafnframt verður
systkinaafsláttur af námsgjaldi
100% með öðru eða fleiri börnum
frá sama tíma.
Borgarráð gerir
tillögu um
leikskólasvið
Borgarráð Reykjavíkur sam-
þykkti fyrir skömmu tillögu
stjórnkerfisnefndar um að stofna
sérstakt leikskólaráð og leikskóla-
svið. Gert er ráð fyrir að leik-
skólaráðið fari með forræði og
ábyrgð málefna barna á leikskóla-
aldri í Reykjavík og þjónustu við
foreldra þeirra.
Með þessum breytingum munu
málefni leikskólans og daggæslu í
heimahúsum færast frá mennta-
ráði til hins nýja leikskólaráðs en
þó gert er ráð fyrir að leikskóla-
ráð og menntaráð muni starfa
náið saman að málefnum barna í
Reykjavík. Leikskólasvið verður
nýtt fagsvið hjá Reykjavíkurborg
og mun fara með framkvæmd
þeirra verkefna, sem heyra undir
nýja leikskólaráðið.
Umhverfisvænir bílar
leigðir
Umhverfissvið Rykjavíkurborg-
ar tók nýlega á eigu átta Kia
Picanto-bifreiðir sem allar eru
knúnar dísileldsneyti. Markmiðið
með þessum bifreiðum er að tak-
marka kostnað þar sem dísilbif-
reiðar eru sparneytnari en þær
sem brenna bensíni en einnig að
sýna fordæmi og að vera til fyrir-
myndar í vistvænum rekstri.
Við ákvörðun um leigu á bílun-
um var stuðst við skilgreiningu
sænsku Vegagerðarinnar á vist-
vænum bílum og leigja einungis
bíla sem fullnægja þeim kröfum.
Bílar umhverfissviðs eru í fjórum
litum, grænir, hvítir, bláir og app-
elsínugulir. Bílarnir verða merktir
með hvatningu til ökumanna um
að aka á sparneytnum bifreiðum.
Bílarnir eyða um 4,4 lítrum á ekna
100 kílómetra og útblásturinn er
116 gr. CO2 á ekinn kílómeter.
ÁGÚST 20062 Breiðholtsblaðið
Útgefandi: Borgarblöð ehf.
Vesturgötu 15 • 101 Reykjavík
Sími: 511 1188 • 561 1594
Fax: 561 1594
Auglýsingasími: 511 1188 • 561 1594 • 895 8298
Netfang: borgarblod@simnet.is
Ritstjóri: Þórður Ingimarsson, Sími: 551 1519 • 893 5904
Netfang: thord@itn.is
Framkvæmda- og auglýsingastjóri: Kristján Jóhannsson
Umbrot: Valur Kristjánsson
Prentun: Prentsmiðja Morgunblaðsins
Dreifing: Íslandspóstur
8. tbl. 13. árgangur
Breiðholtsblaðið er gefið út í 9000 eintökum og dreift
frítt í hvert hús í Breiðholtinu.
Að gera gott
hverfi betra
S T U T T A R
B O R G A R F R É T T I R
A llt að 400 manns komu til starfa við fegrunarátak Reykjavíkur-borgar í Breiðholti 22. júlí sl. Margir voru mættir þegar starfs-dagurinn hófst kl. 11.00 að morgni og fleiri fólk var að bætast
við nær allan daginn. Þá eru ótaldir allir þeir sem nýttu daginn til þess
að laga til á lóðum sínum og bæta umhverfi hýbýla sinna í Breiðholti.
Fegrunarátakið fór vel af stað í Breiðholtinu og er nú fram haldið í öðr-
um hverfum borgarinnar.
En ekki er nóg að taka burt rusl sem fýkur um hverfi og byggðir. Ein-
nig þarf að huga að mannvirkjum hverskonar, bæði þeim er eru í opin-
beri eigu og einnig einstaklinga. Gangi opinber aðili á borð við Reykja-
víkurborg á undan með þeim hætti sem nú hefur orðið mun það verða
hvatning til einstaklinga, fólksins í hverfunum að huga að eigum sínum
og mannvirkjum með sambærilegum hætti. Með því gerir borgin og
íbúarnir í sameiningu góð hverfi enn betri. Breiðholtið er engin undan-
tekning að þessu leyti. Fegrunarátakið var upphaf vakningar um að
gera gott hverfi betra.
Ekki bílastæðavandi
B reiðholtið er ekki þjakað af bílastæðavanda. Góð bílastæði eruumhverfis stærstu þjónustumiðstöðina í hverfinu í Mjóddinni ogalvarlegur vandi vegna skorts á bílastæðum er tæpast fyrir hendi
við aðra staði þar sem fólk kemur saman. Þá eru víðast hvar nokkuð
rúmgóð bílastæði við hýbýli fólks hvort sem um er að ræða fölbýli eða
einbýli þótt undantekningar á því kunni að finnast.
Bílaeign almennings hefur meira en tvöfaldast frá því Breiðholtið
var byggt. Skipulag hverfisins var frá byrjun miðað við að veita þess-
um þarfasta þjóni mannsins í upphafi 21. aldar umtalsvert rými. Í því
fólst ákveðin framsýni og þótt skoðanir geti verið og séu skiptar um
nauðsyn bílaeignar getur tæpast nokkur dregið í efa þá kosti sem rými
fyrir einkabíla í úthverfi á borð við Breiðholtið hefur í för með sér.
Landfræðileg staða Breiðholtsins, fjarlægð þess frá öðrum hverfum
og umferð til og frá hverfinu kallar á umtalsverða bílaeign. Fólk ferðast
tæpast fótgangandi úr Breiðholtinu í önnur borgarhverfi. Hverfið
stendur einnig fremur hátt í borgarlandinu sem útlokar hjólreiðar að
verulegu leyti nema þá innan þess sjálfs eða jafnvel innan hverfishlut-
ann þriggja. Göngu- og hjólreiðastígar eru fremur hluti af möguleikum
fólks til útivistar og gerðum þess í frítíma en að um alvöru samgöngu-
æðar sé að ræða. Það er erfitt að búa í hverfi á borð við Breiðholtið án
bíls eða bíla. Skipuleggjendur þess hafa á sínum tíma tekið tillit til
þeirrar staðreyndar.
Afstaða til almenningssamganga
Í slendingar hafa aldrei litið á almenningssamgöngur sem raunveru-legan samgöngumáta heldur aðeins nauðsynlega þjónustu vegnaþeirra sem einhverra hluta vegna geta ekki átt bíl eða stjórnað hon-
um, einkum ungmenna sem ekki hafa náð aldri til þess að taka öku-
próf og eldra fólks sem kann ekki eða kýs ekki að aka bifreið. Sú kyn-
slóð sem aldrei tók ökupróf er nú óðum að hverfa og mun meira er um
að eldra fólk ferðist akandi á einkabílum en áður og er það einn þátt-
urinn í vaxandi bílaumferð.
Þessi afstaða landsmanna til almenningssamganga kemur vel fram í
því að átak sem gert var til þess að efla þennan samgöngumáta á höf-
uðborgarsvæðinu í heild sinni virðist hafa mistekist með öllu. Ástæða
þess að ekki tókst betur til þótt nokkuð væri í lagt felst einkum í þess-
ari afstöðu fólksins. Borgaryfirvöld og borgarbúar verða á hinn bóginn
að spyrja sig þeirra spurningar á næstu árum hvort umhverfið þoli
langt um meiri not einkabíla en nú er orðið. Álagið á samgöngumann-
virki er þegar orðið umtalsvert þótt það sé engan veginn sambærilegt
við það sem gerist í stærri borgum í nágrannalöndum okkar eða fjar-
lægari lönd. Samgöngumálin snúast einnig um vaxandi mengun. Þess-
ar spurningar snúa að íbúum Breiðholtsins eins og öðrum, ekki síst
vegna þess að þeir búa í umhverfi sem er skipulagt til þess að ferðast
um á einkabílum og aðrir kostir ekki auðveldir í því efni.