Vesturbæjarblaðið - 01.12.2005, Blaðsíða 14

DESEMBER 200514 Vesturbæjarblaðið
VESTURBÆJARBLAÐIÐ leitaði svara
tveggja þingmanna um ýmiss mál
sem brenna á fólki í Vesturbænum.
Þetta eru þeir Ágúst Ólafur Ágústs-
son, þingmaður Samfylkingarinnar
og íbúi á Framnesveginum og Birgir
Ármannsson, þingmaður Sjálfstæðis-
flokksins, en hann býr á Víðimelnum.
Ágúst Ólafur Ágústsson:
- Hvað er brýnast að hrinda í framkvæmd
í skipulagsmálum Vesturbæjar?
„Vesturbærinn er að mínu mati ein af
perlum borgarsamfélagsins. Þetta sést m.a.
á því hversu eftirsóknarvert er að búa hér
og að fólk sem elst upp í Vesturbænum vill
oft líka búa sér framtíðarheimili hér. Við
fluttumst hingað fyrir tæpum þremur árum
síðan og okkur hefur liðið mjög vel í Vest-
urbænum. Þetta er rótgróið hverfi, þar sem
stutt er að sækja alla þjónustu og sjálfum
finnst mér kostur að vera í KR-hverfi.
Margt fjölskyldufólk velur sér auðvitað bú-
setustað m.a. út frá skólum. Vesturbærinn
státar af góðum skólum og ég veit af eigin
raun að hér eru frábærir leikskólar. Vestur-
bærinn er hins vegar með gamla sál sem
ber að virða og þess vegna verður að
vanda vel skipulagsmál hér.
Mjög spennandi verkefni eru framundan
á Slippsvæðinu og við Mýrargötuna. Nú
liggur fyrir áhugaverð skipulagstillaga um
fallegt íbúðarsvæði á svæðinu og þess efn-
is að gamli Slippurinn fari. Samkvæmt til-
lögunni er ætlunin að þar rísi íbúðahverfi
með gönguleiðum um höfnina ásamt marg-
víslegri starfsemi.
Mér finnst þurfa að endurskipuleggja
svæðið þar sem BYKO stendur en í tengsl-
um við íbúðafjölgun á svæðinu þarf vænt-
anlega að stækka Vesturbæjarskóla. Á Lýsi-
slóðinni verður reist hjúkrunarheimili sem
ég tel vera gleðiefni fyrir alla Vesturbæ-
inga. Ég vona bara að húsið verði þannig
hannað að útsýnið nýtist sem flestum sem
þar munu búa.
Reglulega heyrast hugmyndir um land-
fyllingu út frá Eiðisgrandanum og ber að
skoða allar slíkar hugmyndir vel áður en
lagst er í slíkan leiðangur. Ef af slíku yrði
væri um að ræða eitt stærsta skipulags-
verkefni Vesturbæjar í langan tíma.
Mér finnst að það verði að gæta þess að
hugsa skipulagsmál frá mörgum sjónar-
hornum, m.a. frá sjónarhorni fjölskyldu-
fólks þannig að gönguleiðir og útivera
verði aðlaðandi. Elísabet dóttir mín er mik-
ill talsmaður þess að fara á róló þannig að
hún myndi sennilega svara því til að mjög
brýnt sé að fjölga þeim.
Það gleymist hins vegar oft í umræðu um
skipulagsmál að til þess að skipulag verði
gott þarf að hleypa fólki með fagmenntun
og fagþekkingu í umræðuna. Skipulagsmál
eru of mikilvæg til þess að menn ákveði
bara að setja niður heilu hverfin, göturnar
eða stokkana án þess að hafa það hugfast
að það þarf menntun og þekkingu á mála-
flokknum til þess að ná fram bestri niður-
stöðu. Mér finnst mörg skipulagsmistök
blasa við í borginni og má finna ný og göm-
ul dæmi þess.
Þess vegna finnst mér brýnast í skipu-
lagsmálum að umræðan verði fagleg, en
ekki lituð af tímabundnum hagsmunum.“
- Ertu sammála mörgum íbúum Vesturgötu
um að þar eigi að vera einstefna?
„Áður en við fjölskyldan fluttum í Vestur-
bæinn bjuggum við í Þingholtunum þar
sem margar einstefnugötur er að finna. Þar
hefur reynslan almennt séð verið góð. Ég
tel að íbúar á viðkomandi svæði eigi að
hafa mikið um það að segja hvernig um-
ferðinni er háttað um þeirra hverfi, þó að
auðvitað verði alltaf að líta til hagsmuni
borgarinnar allrar. Ég tel því að einstefna á
Vesturgötunni gæti átt vel við.“
- Þegar (eða ef) flugvöllurinn í Vatnsmýr-
inni hverfur, á þar að rísa eingöngu íbúða-
byggð, eða hvernig sérðu fyrir þér uppbygg-
inguna. Hvernig er hagkvæmast að tengja
framtíðarbyggð í Vatnsmýrinni byggðinni í
miðbænum, þ.e. Kvosinni?
„Verði byggt í Vatnsmýrinni þá þætti
mér eðlilegt og rökrétt að þar yrði lifandi
framhald af miðbænum. Þar ætti íbúða-
byggðin að vera þétt eins og t.d. í Þingholt-
unum og göngugötur og torg. Verslun og
kaffihús þarf að geta þrifist þar ásamt
blómlegri atvinnustarfsemi og þekkingar-
þorpi. Þingholtin og Kvosin eru án efa eitt
eftirsóknarverðasta hverfi landsins og það
sýnir að margir vilji búa þétt í borgarsam-
félagi þar sem nálægðin við verslanir,
skemmtistaði, leikhús, kaffihús, veitinga-
staði er mikil. Skipulagning Vatnsmýrarinn-
ar gefur okkur einstakt tækifæri á skipu-
lagningu heils hverfis. Tengingin við Öskju-
hlíðina, Hljómskálagarðinn, Tjörnina, Há-
skólann og fjöruna býður upp á ótal mögu-
leika. Það mætti einnig byggja á ákveðnum
stöðum í Vatnsmýrinni nokkuð duglega
upp í loftið verði af byggð þarna.“
- Er rétt að úthluta KR því svæði sem nú
standa skemmur SÍF á? Ef ekki hvernig
sérðu fyrir þér framtíðaruppbyggingu fyrir
KR?
„Það þarf að huga að frekari uppbygg-
ingu KR og tryggja félaginu það svæði sem
þörf krefur til að hægt sé að standa fyrir
öflugri íþrótta- og tómstundastarfsemi. KR
er einn af máttarstólpum Vesturbæjarins
og stolt. Skemmur SÍF eru hins vegar í
einkaeign og þar af leiðandi er nauðsynlegt
að ná samkomulagi um eignina áður en
lengra er haldið. Ég get vel ímyndað mér
að í framtíðinni verði þarna annað að finna
en þessar skemmur.“
- Hefur þú trú á að það sé rétt stefna að
opna þjónustumiðstöðvar í hverfum Reykja-
víkur, eins og t.d. Vesturgarð við Hjarðar-
haga? Hverjum þjóna þessar hverfismið-
stöðvar helst?
„Já, mér finnst það og það hefur reyndar
sýnt sig að almenn ánægja hefur verið með
slíkar þjónustusmiðstöðvar víða um borg-
ina og þær hafa verið nýttar vel af borgar-
búum. Það er mikilvægt að nærsamfélagið
sé eflt og boðleiðirnar séu einfaldaðar. Við
eigum ekki að hafa alla stjórnun miðstýrða
eins og Sjálfstæðismenn gerðu þegar þeir
voru í meirihluta í borgarstjórn og þeir
gera enn í landsmálunum, ekki síst í
menntamálum.
Þessar þjónustumiðstöðvar færa þjón-
ustuna út í hverfin og samþætta margs
konar félags- og velferðarþjónustu fyrir
íbúana ásamt starfsemi ólíkra hagsmuna-
hópa. Þessi starfsemi mun þróast áfram og
vel er hægt að hugsa sér að Vesturgarður
verði í vaxandi mæli miðstöð menningar-
starfs í Vesturbænum og verði hvati fyrir
félagsstarf og uppákomur í hverfinu.“
- Sem þingmaður Reykjavíkur og Vestur-
bæjar, hvernig þjónar þú best íbúum þess
svæðis?
„Mér finnst eðlilegt að þingmenn líti á sig
sem þingmenn þjóðarinnar fyrst og fremst.
Ég hef því beitt mér í málum sem ég tel
varða alla landsmenn burtséð frá því hvar
þeir búa. Það er auðvitað líka þannig að
margir veigamestu málaflokkarnir svo sem
heilbrigðismál og menntamál snerta lands-
menn alla.
Ég hef hins vegar beitt mér í málum sem
varða marga íbúa Vesturbæjar, t.d. með
því að tala fyrir gjaldfrjálsum leikskóla,
sem yrði gríðarleg kjarabót fyrir fjölskyldu-
fólk, bættu heilbrigðiskerfi, aðbúnaði eldri
borgara og bættum kjörum þeirra. Ég hef
viljað lækkað matarverð með skattalækk-
unum og barist fyrir afnámi fyrningarfrests
í kynferðisafbrotum gegn börnum og viljað
að lagaákvæði gegn heimilisofbeldi verði
sett. Ég vil að frelsi fólksins sé sem mest og
staðið að fjölmörgum þingmálum sem auka
það ásamt gegnsæju og réttlátu samfélagi.
Svona mætti lengi telja en með því að
hugsa um hagsmuni heildarinnar mun ég
þjóna íbúum Vesturbæjar best,“ segir
Ágúst Ólafur Ágústsson, varaformaður
Samfylkingarinnar og Vesturbæingur.
Birgir Ármannsson:
- Hvað er brýnast að hrinda í framkvæmd
í skipulagsmálum Vesturbæjar?
„Vesturbærinn er eitt þéttbýlasta svæði
borgarinnar og svigrúm í skipulagsmálum
því minna en víða annars staðar. Vestur-
bæingar þurfa auðvitað á því að halda að
samgöngur til og frá hverfinu séu greiðar
og jafnframt er rétt að skoða hvort landfyll-
ingar og breytt nýting svæðisins í kringum
höfnina og Örfirisey getur skapað nýja
möguleika fyrir aukna íbúðabyggð. Hug-
myndir borgarstjórnarflokks sjálfstæðis-
manna um Eyjabyggð eru svo að mínu mati
spennandi framtíðarsýn þegar horft er
lengra fram í tímann.“
- Ertu sammála mörgum íbúum Vesturgötu
um að þar eigi að vera einstefna?
„Ég held að það sé alltaf ástæða til hlusta
á sjónarmið íbúa varðandi einstefnuakstur
og þess háttar og taka mið af óskum þeirra
þegar unnt er. Umferðin um Vesturgötu er
auðvitað mikil og áhyggjur íbúa skiljanleg-
ar í því ljósi. Borgaryfirvöld verða hins veg-
ar að taka mið af fleiri þáttum sem lúta að
heildarskipulagi umferðarmála á viðkom-
andi svæði. Einstefnuakstur um eina götu
hefur auðvitað áhrif á umferð um næstu
götur, umferðarhraða og þess háttar og ég
hef ekki forsendur til að meta hvort ein-
stefna á Vesturgötu sé endilega rétta leiðin
í því ljósi.“
- Þegar (eða ef) flugvöllurinn í Vatnsmýr-
inni hverfur, á þar að rísa eingöngu íbúða-
byggð, eða hvernig sérðu fyrir þér uppbygg-
inguna. Hvernig er hagkvæmast að tengja
framtíðarbyggð í Vatnsmýrinni byggðinni í
miðbænum, þ.e. Kvosinni?
„Flugvöllurinn mun fara á endanum en
ég tel ekki raunsætt að vænta þess að það
gerist á allra næstu árum. Þegar hann fer
er hins vegar mikilvægt að fyrir liggi skýrar
hugmyndir um nýtingu svæðisins. Þetta er
stórt svæði sem býður upp á marga mögu-
leika persónulega get ég séð fyrir mér
stækkun Háskólasvæðisins út frá núver-
andi svæði skólans og íbúðarbyggð út frá
núverandi byggð í Skerjafirði og á austur-
hluta svæðisins. Mér finnst mikilvægt að
varðveita Öskuhlíð og Nauthólsvík sem úti-
vistarsvæði og sama skapi þætti mér æski-
legt að hægt væri að byggja upp miðbæjar-
starfsemi í sem bestum tengslum við Kvos-
ina. Breikkun Hringbrautar auðveldar það
ekki en mér finnst mikilvægt að finna ein-
hverja lausn í því sambandi.“
- Er rétt að úthluta KR því svæði sem nú
standa skemmur SÍF á? Ef ekki hvernig
sérðu fyrir þér framtíðaruppbyggingu fyrir
KR?
„KR gegnir gríðarlega mikilvægu hlut-
verki fyrir okkur Vesturbæinga, ekki síst
börnin og unglingana, og nauðsynlegt að
félagið hafi svigrúm til frekari uppbygging-
ar. Það liggur beint við að skoða SÍF-lóðina
í því sambandi, en það hafa líka komið
fram athyglisverðar hugmyndir um land-
fyllingar út frá Skjólunum, þar sem hugsan-
lega væri hægt að koma upp æfingaað-
stöðu fyrir félagið. Byggðin í Vesturbænum
er afar þétt og því er mikilvægt að skoða
nýjar lausnir af þessu tagi til að tryggja KR
nauðsynlegt svigrúm. Borgin þarf að taka
tillit til óska félagsins í því sambandi og
jafnframt er samráð við íbúa viðkomandi
svæða nauðsynlegt.“
- Hefur þú trú á að það sé rétt stefna að
opna þjónustumiðstöðvar í hverfum Reykja-
víkur, eins og t.d. Vesturgarð við Hjarðar-
haga? Hverjum þjóna þessar hverfismið-
stöðvar helst?
„Ég tel að það geti verið skynsamlegt að
samræma þjónustu borgarinnar í einstök-
um hverfum innan þjónustumiðstöðva.
Það er jákvætt í sjálfu sér að færa þjónust-
una nær borgarbúum og bjóða upp á fjöl-
þætta þjónustu á sama stað. Það sem verð-
ur að passa í þessu sambandi er það að
raunveruleg hagræðing eigi sér stað og
þjónustumiðstöðvarnar verði ekki bara
viðbót við borgarkerfið, því það getur bæði
aukið kostnað og búið til enn einn millilið
milli borgarans og þeirra sem taka ákvarð-
anir innan kerfisins.“
- Sem þingmaður Reykjavíkur og Vestur-
bæjar, hvernig þjónar þú best íbúum þess
svæðis?
„Verkefni mín á þingi eru yfirleitt þess
eðlis, að þau snerta landsmenn óháð bú-
setu. Það á bæði við lagasetningu þingsins
almennt en líka þau verkefni sem ég hef
helst sinnt, sem eru mest á sviði efnahags-
og skattamála annars vegar og réttarfars-
og stjórnskipunarmála hins vegar. Þar af
leiðandi er ég ekki mikið í kjördæmapoti.
Það er helst á sviði samgöngumála sem við
þingmenn Reykjavíkur þurfum að vera á
vaktinni. Í því sambandi má nefna að sú
ákvörðun að ráðstafa hluta af söluandvirði
Símans til Sundabrautar er jákvætt mál,“
segir Birgir Ámannsson, þingmaður Sjálf-
stæðisflokksins. ■
Þingmenn búsettir í
Vesturbænum sitja fyrir svörum
Ágúst Ólafur Ágústsson, þingmaður
Samfylkingarinnar .
Birgir Ármannsson, þingmaður
Sjálfstæðisflokksins.