Morgunblaðið - 04.02.2015, Blaðsíða 4

4 FRÉTTIRInnlent
MORGUNBLAÐIÐ MIÐVIKUDAGUR 4. FEBRÚAR 2015
Helgi Bjarnason
helgi@mbl.is
Flutt voru til landsins 2.758 tonn af
frosnu alifugla-, nauta- og svínakjöti
á síðasta ári. Er það liðlega 1.000
tonnum meira en á árinu á undan og
er aukningin 61%. Mest munar um
fjórföldun í innflutningi nautakjöts.
Mest er flutt inn af úrbeinuðu
kjöti. Þegar það hefur verið um-
reiknað í kjötskrokka og borið sam-
an við innlendu framleiðsluna kem-
ur í ljós að innflutta kjötið hefur náð
um 20% markaðshlutdeild. Erna
Bjarnadóttir, hagfræðingur Bænda-
samtaka Íslands, segir að tollvernd-
in hafi minnkað með því að opnaðir
hafi verið tollkvótar fyrir ákveðnar
vörur.
Ekki sömu kröfur
Erna segir að samkeppnisstaðan
sé skökk. Á meðan gerðar séu gríð-
arlegar kröfur til innlendra fram-
leiðenda varðandi sjúkdómavarnir
og lyfjanotkun flæði hingað kjöt frá
löndum þar sem aðrar framleiðslu-
aðferðir séu notaðar. Nefnir hún að
meira en helmingur kjötsins komi
frá Þýskalandi. Þar sé mesta lyfja-
notkun við kjötframleiðslu í Evrópu.
Hér sé lyfjanotkun aðeins um 1% af
því sem gerist í Þýskalandi.
„Meinum við eitthvað með þeim
kröfum sem við gerum til íslenskra
framleiðenda? Af hverju eru gerðar
meiri kröfur til þeirra en erlendra
keppinauta?“ segir Erna. Hún segir
að hnignun verði í innlendri gæða-
framleiðslu á meðan ekki sé spornað
við þessari þróun.
Aukin eftirspurn
Vandamál innlendu nautgripa-
framleiðslunnar liggur dýpra, það
liggur í því að kúabændur leggja
mikla áherslu á mjólkurframleiðslu
og það dregur í bili úr framboði
nautgripakjöts. Aukin eftirspurn,
ekki síst vegna fjölgunar ferðafólks,
skýrir einnig hluta af auknum inn-
flutningi. Þá eiga sérhæfð holda-
nautabú undir högg að sækja vegna
þess að ekki hafa fengist leyfi til að
kynbæta stofnana. Kúabændur hafa
í fimm ár óskað eftir því að fá að
flytja inn erfðaefni frá Noregi til að
bæta stofninn og skapa betri grund-
völl fyrir þessa búgrein.
Nú hillir undir að slíkt leyfi fáist.
Frumvarp sem heimilar innflutning
erfðaefnis til kynbóta holdanauta-
stofnsins liggur fyrir og verður lagt
fram á Alþingi á næstunni. Jafn-
framt vinnur starfshópur að und-
irbúningi skilyrða sem gerð verða
til þeirra búa sem vilja nýta sér
sæði eða fósturvísa um einangrun
dýranna. Verður vinnan væntanlega
notuð við setningu reglugerðar,
verði frumvarpið samþykkt.
Baldur Helgi Benjamínsson,
framkvæmdastjóri Landssambands
kúabænda, bendir á að verðmæti
þess nautakjöts sem flutt var inn til
landsins á síðasta ári, hingað komið,
hafi verið yfir 900 milljónir kr. Það
sýni hvað sé í húfi. Ef fyrr hefði ver-
ið brugðist við hefði stór hluti þess-
ara verðmæta orðið til hér innan-
lands.
Þótt innflutningsfrumvarpið verði
samþykkt í vor og hægt verði að
hefja notkun innflutts erfðaefnis í
sumar, líða margir mánuðir og ár
þangað til fyrsta kjötið sem fram-
leitt er úr því kemur á disk neyt-
enda. Það verður í fyrsta lagi í lok
árs 2017.
 Stóraukinn innflutningur á kjöti  Innflutta kjötið komið með fimmtungs markaðshlutdeild
 Frumvarp sem heimilar innflutning erfðaefnis til kynbóta á holdanautastofnum lagt fram á næstunni
Innflutningur nautakjöts fjórfaldast
Innflutt kjöt*
* Einingar eru í kílóum
2013 2014
Alifuglakjöt
Nautakjöt
Svínakjöt
Aðrar kjötvörur af áðurtöldu
Samtals
929.241
265.990
465.374
48.401
1.709.006
1.066.228
1.047.456
589.563
55.245
2.758.492
Heimild: Hagstofa Íslands, bráðabirgðatölur
Morgunblaðið/Árni Sæberg
Steik Eftirspurn eftir góðu nauta-
kjöti eykst með fjölgun ferðafólks.
Anna Lilja Þórisdóttir
annalilja@mbl.is
Rúm milljón sótti vefinn Tímarit.is
heim á síðasta ári og alls voru þar
skoðaðar tæplega sex milljónir vef-
síðna. Vefsíðan er stafrænt safn
tímarita og dagblaða frá Íslandi,
Færeyjum og Grænlandi, sífellt
bætist í safnið sem er í umsjá Lands-
bókasafns Íslands. Örn Hrafnkels-
son, sviðsstjóri varðveislu og staf-
rænnar endurgerðar þar, segir að
sig hefði aldrei órað fyrir því að síð-
an yrði svona vinsæl þegar henni var
hleypt af stokkunum 2002.
„Meirihlutinn, eða næstum því
tveir þriðju, kemur inn á vefinn frá
leitarvélum og fer þá beint inn á við-
komandi gögn,“ segir Örn. „Hlutfall
þeirra sem koma inn á vefinn með
snjalltækjum er minna en gengur og
gerist og næsta skref hjá okkur er
að huga að því að gera vefinn snjall-
tækjavænni. Það er orðið aðkallandi,
en gæti tekið talsverðan tíma því
þetta er stór gagnagrunnur.“
Innlit frá Kína
Að sögn Arnar eru 4,7 milljónir
skjala á vefnum, en dæmi um skjal
er ein síða í dagblaði. Þá eru þar 950
titlar, flestir á íslenskum dagblöðum
og tímaritum, hitt er frá Grænlandi
og Færeyjum. Meðallengd heim-
sóknar eru fjórar og hálf mínúta, að
meðaltali eru um sex síður sóttar í
hverri heimsókn og á síðasta ári var
hlutfall nýrra notenda um 37%.
„Mogginn er vinsælastur og hefur
alltaf verið á toppnum,“ segir Örn
spurður um hvaða titill sé vinsæl-
astur. Þessu til sönnunar nefnir
hann tölur úr nýliðinni viku þar sem
17.577 heimsóknir voru á vefinn og
þar af flettu 5.994 Morgunblaðinu,
eða rúmur þriðjungur.
Dagblöðin virðast njóta mestrar
hylli, því að á lista á síðunni yfir
mest lesnu titlana er DV og gamla
Dagblaðið í öðru sæti, þá kemur Vís-
ir, Tíminn sálugi er í fjórða sæti og
Þjóðviljinn í því fimmta.
Flestar heimsóknanna eru frá ís-
lenskum IP-tölum, um 80%, en at-
hygli vekur að um 11% heimsókna
hafa undanfarið komið frá Kína. „Ég
kann engar skýringar á því,“ segir
Örn spurður um þennan áhuga Kín-
verja á íslenskum blöðum og tímarit-
um. „Hugsanlega er þetta vegna ein-
hverra tenginga við leitarvélar.“
Einstakt í sinni röð
Örn var einn þeirra sem komu að
stofnun vefjarins í kringum aldamót-
in og segir að sig hafi ekki órað fyrir
því að hann myndi hafa jafnbreiða
skírskotun og raun ber vitni. Hann
segir timarit.is einstakan í sinni röð
á heimsvísu. „Ég hef farið á nokkrar
dagblaðaráðstefnur bókasafna og
þar er fólk sammála um að vefurinn
okkar sé einstakur gagnagrunnur,
sambærilegir vefir erlendis eru yf-
irleitt ekki svona umfangsmiklir. En
hér erum við með öll dagblöð og
tímarit á tilteknu tímabili og nú
vinnum við að því að þétta netið og
fá inn yngri titla. Ég heyri t.d. frá
háskólanemum að þeir nota timarit-
.is mikið við rannsóknir og svo eru
auðvitað margir sem nota hann sér
til skemmtunar. Þegar við byrjuðum
á þessu óraði okkur ekki fyrir að
þetta myndi höfða til svona margra.“
Mogginn hefur
alltaf verið
á toppnum
 Tímarit.is vill snjalltækjavæðast
Morgunblaðið/Ómar
Vinsæll vefur Örn segir hylli tíma-
rit.is hafa komið á óvart.
Ómar Friðriksson
omfr@mbl.is
„Við stefnum á að byrja jarðvinnu á næstu vikum,“ segir
Gísli Steinar Gíslason hjá fasteignaþróunarfélaginu Stólp-
um um framkvæmdir sem hefjast fyrir vorið við byggingu
fjölbýlis- og verslunarhúsnæðis á svonefndum Hörp-
ureitum 1 og 2 við Austurbakka.
Byrjað verður á að reisa bílakjallara með 120 stæðum
en umhverfis- og skipulagsráð borgarinnar hefur nú til
umfjöllunar umsókn Landstólpa þróunarfélags ehf. um
leyfi til að hefja framkvæmdir við bílakjallarann. Þetta er
fyrsta uppbyggingin sem ráðist er í á Hörpureitunum frá
því að að lokið var við byggingu Hörpu. Uppbyggingin á
reitum 1 og 2 fer fram á lóðinni við hlið Tollhússins á milli
Geirsgötu og Tryggvagötu.
Þar eru nú bílastæði fyrir 198 bíla en eins og fram
hefur komið verður væntanlega lokað fyrir þau þegar
framkvæmdir hefjast.
Áður en hafist verður handa við byggingu bílakjall-
arans þarf að grafa upp fornminjar á svæðinu og skrásetja
þær að sögn Gísla sem segir verið að semja við verktaka
um að taka það verkefni að sér. Yfirlit liggur fyrir frá
Borgarsögusafni Reykjavíkur yfir minjar á þessum reit-
um og eru þær að sögn Gísla annars vegar gamlir pakk-
hússgrunnar og svo sjóvarnargarður sem liggur í gegnum
lóðina. Gamla steinbryggjan sem hlaðin var nokkru fyrir
aldamótin 1900 liggur hins vegar fyrir utan byggingarreit-
ina.
4-6 sex hæðir og 30 þúsund fermetrar
Í fyrra var gengið frá kaupum Regins hf. á öllu versl-
unar- og þjónusturými sem byggt verður á reitum 1 og 2.
„Þeir eru komnir með okkur í verkefnið að þróa góðan og
sterkan verslunarkjarna, sem mun vinna mjög vel með
miðbænum,“ segir Gísli. Um er að ræða þriggja ára verk-
efni og verða byggingarnar fjögurra til sex hæða, með 80
íbúðum auk verslunar- og þjónustuhúsnæðis. Að bílakjall-
aranum meðtöldum verða byggingarnar samtals 30 þús-
und fermetrar. Gísli segir að verið sé að leggja lokahönd á
hönnun allra bygginganna og svæðisins á reitunum, sem
verði fljótlega kynntar opinberlega.
„Við brjótum þetta mikið upp þannig að bygging-
arnar falli vel inn í umhverfið og ásýndin sé mjög létt.
Þetta er viðkvæmur reitur og við reynum að vanda sem
best til verka þannig að þetta falli vel að umhverfinu.“
Jarðvinna hefst brátt
á lóðinni við Tollhúsið
 Skrá fornminjar  Byggja síðan 120 stæða bílakjallara
Morgunblaðið/Árni Sæberg
Uppbygging Framkvæmdir hefjast brátt á Hörpureitum 1 og 2 þar sem í dag eru bílastæði fyrir tæplega 200 bíla.