Morgunblaðið - Sunnudagur - 01.03.2015, Blaðsíða 30
Matur
og drykkir
Rauðrófur í allt
*Eitt ódýrasta hráefni sem fæst hérlendis erþar að auki meinhollt en það eru rauðróf-urnar góðu sem eru frábærar í salöt svo eitt-hvað sé nefnt. Kílóverðið er undir 100 krón-um. Gott er að hafa í huga að þegar rauðrófaer soðin skal sjóða hana með hýðinu í heilulagi því annars tapar hún bæði bragði og lit.
Eftir suðu má skræla hana og skera í litla bita í
salat og bæta við káli og feta- eða geitaosti.
O
kkar góðu vinir Elva Brá Aðalsteinsdóttir og
Ólafur Hólm komu heim til okkar í sunnu-
dagshádegisverð,“ segir Sigrún Þorsteins-
dóttir, gjarnan nefnd eftir síðunni sinni og
einu elsta matarbloggi landsins; Café Sigrún en Sigrún er
nemi í klínískri sálfræði við Háskóla Íslands en hún er
með MSc-gráðu í heilsusálfræði frá London.
Hún og eiginmaður hennar Jóhannes Erlingsson buðu
þeim og börnum þeirra heim, eitt var að vísu lasið en sjálf
eiga þau tvö börn svo þetta var sannkallað fjölskylduboð.
Sigrún er forfallin áhugamanneskja um hollan mat og
bættar lífsvenjur og hádegisverðurinn var því að sjálfsögðu
meinhollur en ljúffengur með eindæmum.
„Segja má að leiðir okkar hafi legið saman frá því árið
1995 þegar Jóhannes var í ballett með Elvu og svo aftur
árið 2001 þegar ég kynntist Elvu í gegnum sálfræðinámið.
Svo bjuggum við hlið við hlið í eitt ár í London þegar Elva
var í sínu mastersnámi og við Jóhannes í okkar. Þau eru
höfðingjar heim að sækja og er ávallt gaman að koma í
kræsingar til þeirra. Borðið hjá þeim svignar alltaf undan
kræsingunum og þau eru bæði listakokkar. Það er líka
ákaflega gaman að fá þau í mat enda skemmtilegt fólk
með afbrigðum,“ segir Sigrún um gesti sunnudagsins.
Er öðruvísi stemning að hafa hádegisverðarboð heldur
en til dæmis kvöldverð?
„Við hittumst yfirleitt á þessum tíma út af börnunum.
Það er engum til gagns né gamans að börn séu þreytt við
matborðið. Hér áður fyrr hittumst við á kvöldin en höfum
fært hittinginn aðeins og það hentar öllum vel, börnin eru
fersk, lystin góð og engin tár.“
Hvað hafðirðu í huga þegar þú settir saman matseðilinn?
„Hann byggist á nokkrum uppskriftum úr matreiðslubók
eftir mig sem kemur út í haust og svo vel völdum upp-
skriftum af vef cafesigrun.com. Ég var undir áhrifum frá
mat sem við höfum verið dugleg að prófa eftir 10 ára bú-
setu í miðborg London, innblásin af mat frá Miðjarðarhaf-
inu og Mið-Austurlöndum.“
Maturinn féll vel í kramið og börnin voru dugleg að
smakka allt og Sigrún segir þau bestu dómarana. „Líb-
anska papriku- og hnetumaukið sem kallast Muhammara
kláraðist upp til agna og svo er hummusinn alltaf sígildur
og passar með öllu. Ostakakan stóð heldur ekki í neinum
og nýmalaður espresso hjá Jóhannesi rann ljúflega niður.“
Sigrún segir að þau hjónin séu líka dugleg að halda
sushi-boð en það sem henni þyki allra skemmtilegast að
útbúa séu kökur, hún segist elska kökur. Sigrún segir að
þegar hún bjóði heim geti munað miklu að útbúa matseðil
snemma og skipuleggja sig fram í tímann, bæði innkaup og
undirbúning til að minnka stress. Flest megi útbúa með
dagsfyrirvara og óþarfi að gera allt á síðustu stundu.
Hvert er eftirminnilegasta matarboð sem hún hefur
haldið?
„Ég hugsa enn til þess með hryllingi þegar ég sá um
matinn í þrítugsafmæli vinar okkar þar sem ég bauð upp á
vefjur, snittur og sushi. Ég útdeildi verkefnum og afmæl-
isbarnið átti að sjá um að „velta“ grjónunum til en þau eru
mjög viðkvæm. Afmælisbarnið hrærði duglega, vel og
lengi, ég var upptekin í öðru, og grjónin enduðu eins og
gúmmíboltar. Það var smá panikk því grjónin í sushi-gerð
taka mesta tímann í undirbúningi og lítill tími til stefnu.
Það var brunað út í búð, grjón soðin, velt til og þegar
fyrsti gesturinn hringdi dyrabjöllunni, rúllaði ég síðustu
rúlluna. Þegar ég ætlaði að fá mér einn bita um miðnætti
var allt búið, hver einasti biti og samt var ríflega áætlað.
Svo er mér minnisstætt þegar ég var að aðstoða í eld-
húsinu í hestaferð einni og útbjó kökur á hálendinu, út-
lendingum til mikillar undrunar og gleði. Það má útbúa
góða köku við öll tækifæri, meira að segja þó að ekkert
rafmagn sé til staðar! Þau voru vön hestaferðum en ekki
vön kökum á hálendi Íslands, úr alfaraleið.“
Morgunblaðið/Eggert
BÖRN OG ALLIR MEÐ
Hádegisverðarboð bestu vinanna
SIGRÚN ÞORSTEINSDÓTTIR OG JÓHANNES ERLINGSSON HÉLDU SANNKALLAÐAN FJÖLSKYLDUHÁDEGISVERÐ
Á HEIMILI SÍNU Á ÁLFTANESI OG BUÐU UPP Á HOLLAR OG LJÚFFENGAR VEITINGAR.
Júlía Margrét Alexandersdóttir julia@mbl.is
Sigrún Þorsteinsdóttir byrjaði mjög ung að deila með lesendum inter-
netsins hollum uppskriftum og hefur gert í um 12 ár.
Frá vinstri: Embla Hlökk Jóhannesdóttir, 5 ára, gestgjafinn sjálfur,
matgæðingurinn Sigrún Þorsteinsdóttir og nemi í klínískri sálfræði,
Freyja Hólm, 9 ára, Elva Brá Aðalsteinsdóttir sálfræðingur, Una
Hólm, 6 ára, Ólafur Hólm tónlistarmaður, Jóhannes Erlingsson,
vörustjóri og leiðsögumaður, og Nökkvi Styr Jóhannesson, 3 ára.
Einn pattinn var veikur, Einar Hólm, 3 ára.
Heimasætan Embla Hlökk bíður þolinmóð eftir því að borðhald hefjist.