Morgunblaðið - Sunnudagur - 03.05.2015, Blaðsíða 47
3.5. 2015 MORGUNBLAÐIÐ SUNNUDAGUR 47
báðar áttir. Og það er gott að hafa einhvern
sér við hlið í þessu sem maður treystir. Við
komum sitt úr hvorum geira tónlistarinnar
og erum auk þess sem persónur miklar and-
stæður. Við hugsum því hlutina svolítið
öðruvísi og erum því síður en svo alltaf sam-
mála. Sem er bara gott.“
Eivör er ein af þeim sem hægt er að
ímynda sér eftir stutt kynni að maður hafi
þekkt lengi, hún er afslöppuð í samskiptum
og hún skýtur því inn í að foreldrar hennar
hafi stundum gert grín að því að það þyrfti
líklega sterkar vísbendingar um að heims-
endir væri í nánd til að ró hennar raskaðist.
„Ég fer ekki auðveldlega í panik, ég lít
fremur afslöppuðum augum á lífið. Um leið
er ég líka pínulítið utan við mig. Það hentaði
ágætlega þegar ég bjó Íslandi, þið eruð af-
slöppuð líka, en það eru stundum vandræði
á mér í Kaupmannahöfn. Ég kann vel við
Dani en mér fannst svolítið erfitt að venjast
þeim í byrjun. Þeir verða til dæmis brjálaðir
ef maður labbar út á hjólabrautina.“
Ertu ennþá að ganga út á hjólabrautina?
„Já, já, ég geri það og þeir verða alltaf
jafn brjálaðir,“ segir Eivör og hlær.
„Mér fannst ógurlega erfitt að venjast
þessum reglum öllum í Danmörku sem eru
talsvert fleiri en í Færeyjum og á Íslandi og
meiri stífni. Ég er líka með aðra líkams-
klukku þótt ég sé alltaf að skána með stund-
vísi til dæmis.“
Er þá ekkert sem kemur þér úr jafnvægi?
„Jú, það er reyndar þannig með mig að
ég get „snappað“ yfir til dæmis ósanngirni
eða ef það er eitthvað sem misbýður réttlæt-
iskennd minni. Ég er fljót aftur niður, gýs
bara smástund eins og eldfjall.“
Getur „snappað“ yfir óréttlæti
Hvað varðar réttlætiskennd segist Eivör til
dæmis fylgjast vel með því sem er í gangi í
samfélaginu og er til dæmis vel með á nót-
unum hvað réttindabaráttu samkynhneigðra
í Færeyjum varðar.
„Jafnréttismál öll kveikja í mér og í Fær-
eyjum erum við svo miklu aftar á merinni
en þið Íslendingar í málefnum samkyn-
hneigðra. Við erum enn að berjast fyrir at-
riðum sem ættu að vera orðin að sjálfsögð-
um hlutum. Þetta getur æst mig upp úr öllu
valdi! Mér líður eins og ég þurfi að standa
upp og segja eitthvað og hef gert það til
dæmis í Færeyjum. En ég er bjartsýn á
framtíðina hvað varðar þessi málefni í Fær-
eyjum, þetta þarfnast smá úthalds en þetta
kemur.“ Eivör segir að henni dugi þó yf-
irleitt að tjá sig í gegnum sína list.
„Ég reyni að semja út frá því sem ég
upplifi hverju sinni. Ég þarf sífellt að færast
eitthvað áfram og læra nýtt, ég get ekki
verið föst á sama stað í langan tíma.
Kannski er þetta forvitið eðli mitt.“
Í hvernig umhverfi þarftu að vera til að
geta skapað og verið ánægð með þína tón-
list?
„Friður er mér mjög nauðsynlegur. Þegar
ég vinn heima hjá mér þykir mér best að
vinna í lögunum mínum á morgnana. Þá er
kollurinn svo ferskur og nýr og morguninn
felur í sér ákveðna ró. Að vera búin að
semja lag fyrir hádegi er stórkostlegasta til-
finning í heimi. Ég fer líka oft eitthvað þeg-
ar ég er að klára nýtt efni og er ein í ein-
hvern tíma að tína saman hugmyndir í
rólegu umhverfi, til dæmis sumarbústöðum
hér á Íslandi. Ég fór síðast núna til Toscana
á Ítalíu og var þar í lítilli listamannaíbúð en
ég hef alltaf elskað Ítalíu. Til að ná árangri
er svo allra mikilvægast að fylgja sinni eigin
sannfæringu þótt það geti stundum verið
erfitt, en þá trúi ég því að allt gangi að ósk-
um.“
Morgunblaðið/Golli
* „Ég get „snappað“yfir til dæmis ósann-girni eða ef það er eitt-
hvað sem misbýður rétt-
lætiskennd minni. Ég er
fljót aftur niður, gýs bara
smástund eins og eldfjall.“