Morgunblaðið - Sunnudagur - 17.05.2015, Blaðsíða 56

56 MORGUNBLAÐIÐ SUNNUDAGUR 17.5. 2015
Íslenski safnadagurinn er haldinn hátíðlegur í
dag, sunnudag, í samstarfi við Íslandsdeild
ICOM, undir yfirskriftinni: Söfn í þágu sjálf-
bærni. Félag íslenskra safna og safnmanna (FÍ-
SOS) heldur utan um kynningu, safnar saman
dagskrá safna, gerir hana aðgengilega og
dreifir dagskránni til fjölmiðla. Líkt og fyrri ár
verður dagskrá aðgengileg á heimasíðu safn-
manna, safnmenn.is og safnabokin.is.
Markmiðið með deginum er að vekja at-
hygli á faglegu innra starfi safna á Íslandi. Fjöl-
breytt dagskrá er í boði og landsmenn hvatt-
ir til að heimsækja söfn og njóta skemmtunar
og fræðslu fyrir alla fjölskylduna.
Alþjóðlegi safnadagurinn er haldinn ár
hvert hinn 18. maí ICOM og eru þátttak-
endur um 35.000 söfn í 140 löndum.
ÍSLENSKI SAFNADAGURINN
SJÁLFBÆR SÖFN
Frá sýningu í Hafnarborg. Fjölmörg söfn á land-
inu taka þátt í dagskrá Safnadagsins.
Morgunblaðið/Styrmir Kári
Salurinn og Gerðarsafn í bakgrunni.
Morgunblaðið/Árni Sæberg
Menningarhús Kópavogs við Hamraborgina,
Safnaðarheimili Kópavogskirkju og gallerí
listamanna víða um bæ munu iða af lífi og
menningu í dag, laugardag, en þá verður
haldinn Menningardagur í Kópavogi.
Meðal þess sem hægt er að upplifa er sýn-
ingin Birting í Gerðarsafni þar sem samtíma-
listamenn vinna út frá steindum gluggum
Gerðar Helgadóttur, en í tengslum við sýn-
inguna mun Dodda Maggý ásamt Kvenna-
kórnum Kötlu flytja vídeó- og tónlistargjörn-
ing í Kópavogskirkju kl. 16. Í Salnum verður
dagskráin Kóp City Bitch undir stjórn Stein-
eyjar Skúladóttur kl. 18:30.
Allar nánari upplýsingar um dagskrána má
nálgast á kopavogur.is. Aðgangur er ókeypis.
MENNINGARHÁTÍÐ Í KÓPAVOGI
IÐAR AF LÍFI
„Og þá kom stríðið …“ er
yfirskrift sögu- og tónlist-
ardagskrár sem sýnd verð-
ur í Hernámssetrinu í
Hvalfirði í dag, laugardag,
og í Hannesarholti í
Reykjavík dagana 19., 21.,
og 24. maí. Með dagskránni
munu listamennirnir Guð-
rún Ásmundsdóttir sögu-
maður, Alexandra Cherny-
shova sópransöngkona, Ásgeir Páll Ágústson
baritónsöngvari og Kjartan Valdemarsson pí-
anóleikari minnast þess að á þessu ári verða
70 ár frá lokum seinni heimsstyrjaldarinnar
sem kostaði rúmlega 70 milljónir manna lífið.
Í dagskránni segir sögumaðurinn sögur frá
stríðstímanum frá Hollandi, Bretlandi, Rúss-
landi og Íslandi. Inn í sögurnar fléttast lög á
borð við „The White Cliffs of Dover“ og „We
will meet again“. Miðasala er á midi.is og við
innganginn.
OG ÞÁ KOM STRÍÐIÐ …
70 ÁRUM SÍÐAR
Alexandra
Chernyshova
Kór Langholtskirkju flytur Jóhannesarpassíuna eftir J.S. Bach á
morgun, sunnudag, kl. 17 í Langholtskirkju undir stjórn Jóns Stef-
ánssonar. Kammersveit Langholtskirkju leikur með og konsertmeist-
ari er Ari Þór Vilhjálmsson. Einsöngvarar eru Benedikt Kristjáns-
son, sem syngur hlutverk guðspjallamannsins og tenóraríur, og
Oddur Arnþór Jónsson, sem syngur Jesú og bassaaríur. Úr röðum
kórfélaga syngur Davíð Ólafsson hlutverk Pílatusar og bassaaríu, en
einnig syngja sópransöngkonurnar Sigríður Ásta Olgeirsdóttir og
Solveig Óskarsdóttir og altsöngkonan Silja Elsabet Brynjarsdóttir
auk þess sem nokkrir kórfélagar fara með smærri hlutverk, en eftir
endurskipulagningu kórsins árið 2009 hefur það verið meginstefna að
kórfélagar syngi einsöngshlutverkin enda margir komnir langt í
söngnámi.
Í tilkynningu frá skipuleggjendum kemur fram að Kór Langholts-
kirkju flutti verkið fyrst árið 1984 og nokkrum sinnum síðan. „En
mikla athygli vakti sviðsetning kórsins á verkinu 1995, en það var í
fyrsta sinn sem slíkt var gert í heiminum svo vitað sé.“
Verkið er byggt á frásögn Jóhannesarguðspjalls af síðustu stund-
unum í lífi Jesú, píslum hans og krossfestingu. „Bach málar sögusvið
atburðanna á einstaklega áhrifaríkan hátt með mögnuðu tónmáli
sínu. Kórinn gegnir lykilhlutverki í dramatískri framvindu frásagn-
arinnar og í þessu verki er að finna marga af glæsilegustu og áhrifa-
mestu kórköflum tónlistarsögunnar,“ segir m.a. um verkið í kynning-
artexta á vef tix.is þar sem miðasalan fer fram, en miðar eru einnig
seldir við innganginn.
Benedikt söng guðspjallamanninn í Mattheusarpassíunni með Kór
Langholtskirkju fyrir rúmu ári við góðar viðtökur. Hann hefur fengið
afburða dóma víða um Evrópu fyrir túlkun sína á verkum Bachs.
Oddur Arnþór er fyrrverandi félagi í Kór Langholtskirkju. Hann
hefur unnið til fjölda verðlauna í alþjóðlegum keppnum. Hann vakti
verðskuldaða athygli í hlutverki sínu sem Rodrigo í uppfærslu Ís-
lensku óperunnar á Don Carlo sl. haust.
JÓHANNESARPASSÍAN EFTIR BACH
Áhrifamiklir
kórkaflar
Benedikt Kristjánsson tenór syngur hlutverk guðspjallamannsins.
Morgunblaðið/Eggert
KÓR LANGHOLTSKIRKJU FLYTUR JÓHANNESAR-
PASSÍUNA UNDIR STJÓRN JÓNS STEFÁNSSONAR.
Menning
Ég heillast ótrúlega mikið af eldfjalla-eyjum á borð við Ísland, Japan ogHavaí. Orkan hér er einfaldlega meiri
en annars staðar, sem stafar örugglega af
hættunni sem fylgir eldsumbrotum. Sam-
tímis finnst mér greinilegt að íbúar landsins
tengjast náttúrunni með sterkum hætti og
sýna henni ákveðna auðmýkt,“ segir Damien
Jalet sem er höfundur þriggja dansverka
sem Íslenski dansflokkurinn frumsýnir
hérlendis undir yfirskriftinni Blæði: obsidian
pieces á Stóra sviði Borgarleikhússins 19.
maí, en uppfærslan er hluti af Listahátíð í
Reykjavík.
Verkin þrjú sem um ræðir eru kventríóið
Les Médusées sem Damien Jalet samdi upp-
haflega fyrir Louvre-listasafnið í París; tvö
brot úr verkinu Babel (words) sem Damien
Jalet samdi í samvinnu við Sidi Larbi
Cherkaoui og loks Black Marrow sem Dam-
ien Jalet samdi í samvinnu við Ernu Ómars-
dóttur, listrænan ráðgjafa Íd.
Óhætt er að segja að Black Marrow sé
lykilverk kvöldsins, enda tekur það um 50
mínútur í flutningi. Verkið sömdu Jalet og
Erna við frumsamda tónlist Bens Frosts fyr-
ir Chunky Move, einn helsta nútímadans-
flokk Ástralíu, sem sýndi það á Alþjóðlegri
Listahátíð í Melbourne 2009. Verkið birtist
hér í nýrri mynd, sérstaklega útfært fyrir og
í samvinnu við Íd. „Við Erna ákváðum að
búa til nýja útgáfu af verkinu. Bætt hefur
verið við nýjum senum meðan leikurum, sem
voru í upphaflegu sýningunni, hefur verið
sleppt. Þannig hefur verkið fengið meira ab-
strakt yfirbragð,“ segir Jalet og tekur fram
að sköpunar- og aðlögunarferlið hérlendis
hafi verið mjög spennandi og gjöfult. „Dans-
verki má líkja við ný föt. Þegar maður fær
nýjan hóp til að dansa verk sem annar hópur
hefur flutt þá geta fötin verið of víð eða of
þröng. Þess vegna þarf að aðlaga flíkina eða
verkið að nýjum flytjendum. Í höndum dans-
ara Íd hefur verkið þroskast og er orðið
marglagaðra en það var áður. Við höfum
fundið nýja leið til að vinna með leikmynd-
ina, sem er spennandi.
Ég er afskaplega ánægður með dansara
Íd, enda gefa þeir sig allir í sköpunina. Hóp-
urinn hefur aldrei verið betri og ég er mjög
þakklátur fyrir það. Þau koma mér ánægju-
lega á óvart á hverjum einasta degi í einbeit-
ingu sinni og áhuga á verkinu, en það er
ekki eitthvað sem hægt er að stjórna eða
panta,“ segir Jalet, en þetta er í þriðja sinn
sem hann vinnur með Íd. Árið 2010 frum-
flutti Íd á Stóra sviði Borgarleikhússins
Transaquania – Into Thin Air sem Jalet
samdi í samvinnu við Ernu og Gabríelu Frið-
riksdóttur, en verkið var sjálfstætt framhald
verksins þeirra Transaquania – Out of the
Blue sem Íd sýndi í Bláa lóninu árið 2009.
Krefst 300% einbeitingar
Aðspurður hvað honum þyki mikilvægast í
fari dansara segir Jalet sannfæringuna vera
lykilatriði. „Því markmið dansarans á sviðinu
er að sannfæra áhorfendur um það sem
markmiðið er að miðla. Auðvitað er mikil-
vægt að dansarar búi að góðri tækni,“ segir
Jalet og fer ekki dult með að hann geri
miklar tæknilegar kröfur til dansara sinna.
„Dansararnir þurfa að hafa mjög mikið út-
hald auk þess sem þeir verða að geta hafið
ÍSLENSKI DANSFLOKKURINN FRUMSÝNIR BLÆÐI: OBSIDIAN PIECES Í BORGARLEIKHÚSINU
„Dans leið til að tengja
við guðlegan kraft“
BLACK MARROW EFTIR DAMIEN JALET OG ERNU ÓMARSDÓTTUR ER LYKILVERK Í DANSDAGSKRÁ SEM ÍD FRUM-
SÝNIR 19. MAÍ UNDIR YFIRSKRIFTINNI BLÆÐI: OBSIDIAN PIECES. JALET RÆÐIR HÉR UM TILURÐ VERKSINS.
Silja Björk Huldudóttir silja@mbl.is
„Okkur Ernu [Ómarsdóttur] finnst spennandi þegar dansaranir ná að vera líkt og í leiðslu, en slíkt
er aðeins hægt með mikilli sannfæringu og ótrúlegu úthaldi,“ segir Damien Jalet.
Ljósmynd/Bjarni Grímsson