Dagblaðið Vísir - DV - 18.04.2012, Blaðsíða 24
Skákar einhver
van PerSie?
24 Sport 18. apríl 2012 Miðvikudagur
Wilshere
niðurbrotinn
Miðjumaðurinn ungi hjá
Arsenal, Jack Wilshere, hefur
verið meiddur allt tímabilið
og mun ekki ná að jafna sig
fyrir EM í sumar. Hann seg-
ist á Twitter-síðu sinni vera
niðurbrotinn maður eftir að
hafa fengið fréttirnar. „Þetta
tímabil hefur verið erfitt fyrir
mig andlega. Þetta verður
erfitt þar til ég kemst aftur út
á völlinn. Ökklinn er ágætur
en ég er bara búinn að vera
frá svo lengi að ég mun ekki
ná að koma mér í form fyrir
Evrópumeistaramótið. Ég
á varla orð til að lýsa því
hversu svekktur ég er, en
vonandi gengur strákunum
allt í haginn,“ segir Jack Wil-
shere.
Óánægður
á bekknum
Andy Carroll, framherja
Liverpool, finnst hann
hafa eytt of miklum tíma á
bekknum eftir komu sína
til Liverpool. „Ég hef þá trú
á sjálfum mér að ef ég fæ
að spila leikina þá muni ég
skora,“ sagði hann í viðtali
við fréttamenn eftir bikar-
sigurinn á Everton. „Ég get
ekki skorað mörk ef ég er
alltaf á bekknum og kem
bara inn þegar tíu mínútur
eru eftir af leikjunum. Það
sem ég vil er að byrja leikina
og spila þá eins vel og ég get.
Þegar maður fær svona lítið
að spila þá minnkar sjálfs-
traustið hjá manni,“ segir
Carroll sem hefur þó fengið
mun meiri spilatíma að
undanförnu.
Ákveður
framtíðina
sjálfur
Lewis Hamilton fer vel af
stað á nýju tímabili í For-
múlunni en hann hefur lokið
fyrstu þremur keppnunum í
þriðja sæti. Þrálátur orðróm-
ur hefur verið á kreiki þess
efnis að hann ætli að yfirgefa
McLaren fyrir Ferrari eða
Red Bull sér í lagi þar sem
hann hefur ekki enn skrifað
undir nýjan samning við
McLaren. „Það er enginn að
fara að lokka mig. Það þarf
enginn að reyna það einu
sinni. Það ákveður enginn
nema ég hvert næsta skref
mitt verður. Nú gengur mér
ágætlega á brautinni og vil
einbeita mér að kappakstr-
inum. Hvað gerist svo kemur
bara í ljós,“ segir Ham ilton í
viðtali við Telegraph.
n Sex tilnefndir sem leikmaður ársins n Hvað hafa þeir gert?
Wayne Rooney
Manchester United
Þjóðerni: Enskur Aldur: 26 ára Staða: Framherji Leikir: 30 Mörk: 24
Stoðsendingar: 4
n Enski landsliðsframherjinn byrjaði tímabilið vel en eftir
fíaskóið í Svartfjallalandi átti Rooney erfitt uppdráttar í
október og nóvember. Síðan þá hefur hann aftur á móti
verið óstöðvandi og með fulltingi hans hefur United hrifsað
toppsætið af milljarðaliði Manchester City. Rooney hefur
róast mikið og ekki enn fengið gult spjald eftir atvikið gegn
Svartfjallalandi. Hann beitir kraftinum í staðinn í það að
skora mörk. Hann hefur komið að 28 mörkum United á
tímabilinu og enn fleirum með þriðju síðustu sendingunni
sem hann hefur fullkomnað á tímabilinu.
Robin van Persie
Arsenal
Þjóðerni: Hollenskur Aldur: 28 ára Staða: Framherji Leikir: 34 Mörk: 27
Stoðsendingar: 10
n Það þarf ansi mikið að gerast svo Hollendingurinn Robin
van Persie verði ekki valinn besti leikmaður tímabilsins.
Persie gjörsamlega bar Arsenal-liðið á herðunum drjúgan
hluta tímabilsins og hefði ekki verið fyrir mörkin hans væri
Arsenal líklega að berjast um sæti í Evrópudeildinni en
ekki Meistaradeildinni. Aðeins hefur dregið úr marka-
skorun Persie að undanförnu en það var nú líka kominn
tími til að aðrir færu að leggja í púkkið hjá liðinu. Með tíu
stoðsendingum sínum hefur Persie komið að 37 mörkum
hjá Arsenal á tímabilinu og einfaldlega verið bestur.
Sergio Aguero
Manchester City
Þjóðerni: Argentínskur Aldur: 23 ára Staða: Framherji Leikir: 30 Mörk: 21
Stoðsendingar: 7
n Argentínumaðurinn stendur heldur betur undir kaup-
verðinu. Hann er orðinn það mikilvægur fyrir Manchester
City að sóknarleikur liðsins er oft hægur og fyrirsjáanlegur
þegar hann er ekki með. Það ræður nær enginn varnar-
maður við kraft, tækni og útsjónarsemi Aguero þegar
hann er heill en Mancini hefur aðeins verið að nota hann
meiddan að undanförnu. Hann er búinn að skora 21 mark
og gefa 7 stoðsendingar og koma þannig að 28 mörkum
hjá City. Hann hefur ekki verið jafnafgerandi og Rooney og
Persie en á svo sannarlega heima á listanum.
David Silva
Manchester City
Þjóðerni: Spænskur Aldur: 26 ára Staða: Miðjumaður Leikir: 32 Mörk: 6
Stoðsendingar: 13
n Það hefur slokknað rækilega á spænska undrinu David
Silva eftir áramót. Hann virðist þreyttur eftir að Mancini
lét hann spila nánast hverja einustu mínútu fyrir jól.
Hann var þó allra manna bestur fyrri hluta tímabilsins og
var hreinlega óstöðvandi. Silva skoraði sex mörk og gaf
þrettán stoðsendingar en þær tölur ná tæplega að lýsa
þeim gæðum sem Silva sýndi inni á vellinum fyrri hluta
móts. Hann á enga möguleika á að verða valinn sá besti
á þessu tímabili en hann á fyllilega skilið að vera á meðal
þeirra sex bestu.
Joe Hart
Manchester City
Þjóðerni: Enskur Aldur: 24 ára Staða: Markvörður Leikir: 34 Varin skot: 90
Hlutfallsmarkvarsla: 76 prósent Haldið hreinu: 14
n Markvörður hefur ekki verið valinn sá besti í ensku
úrvalsdeildinni síðan 1978 þegar Peter Shilton bar af í
liði Nottingham Forest. Því miður á Hart líklega engan
séns í Persie í ár en enski landsliðsmarkvörðurinn á það
þó svo sannarlega skilið. Hart er búinn að vera frábær á
tímabilinu og hefur haldið hreinu oftast allra markvarða.
Hann hefur haft góða vörn fyrir framan sig og því ekki
fengið jafnmörg skot á sig og aðrir markverðir til dæmis í
botnbaráttunni en hann hefur þó hlutfallslega varið flest
skot allra í ensku úrvalsdeildinni.
Scott Parker
Tottenham
Þjóðerni: Enskur Aldur: 31 árs Staða: Miðjumaður Leikir: 27 Stoðsendingar: 1
Tæklingar unnar: 104
n Steli Parker titlinum verður hann annar leikmaður
Tottenham í röð sem valinn er bestur af leikmönnum
deildarinnar en Gareth Bale fékk þessi verðlaun í fyrra.
Parker flutti sig til Tottenham fyrir tímabilið og hefur þar
sýnt og sannað að hann á heima í toppliði. Óeigingjörn
vinna hans í skítverkunum inni á miðjunni en einstök og
til fyrirmyndar. Hann er með flestar unnar tæklingar á
tímabilinu og skilar boltanum vel frá sér. Parker verður nú
ekki valinn sá besti á tímabilinu en hann er aftur á móti
eini hreinræktaði miðjumaðurinn á listanum.