Dagblaðið Vísir - DV - 28.02.2014, Blaðsíða 48

Helgarblað 28. febrúar 201440 Sport
S
tundum fór ég 40 sinnum á sal­
ernið á sólarhring. Með hægð­
unum kom mikið blóð og ég
var orðinn virkilega kraftlaus,
fékk járn aukalega og leið alls
ekki vel.“ Þannig lýsir Guðjón Pétur
Lýðsson veikindum sem hann hefur
glímt við frá ársbyrjun 2012, þegar
hann greindist með sáraristilsbólgur.
Veikindin komu strax í kjölfar veru
hans hjá sænska meistaraliðinu Hels­
ingborg, þangað sem hann fór á lán
frá Val í ágúst sumarið 2011 og kom
heim með tvær gullmedalíur, aðra
fyrir sigur í sænsku úrvalsdeildinni og
hina fyrir bikarmeistaratitil.
Sumarið sem fylgdi í kjölfar veik­
indanna var honum erfitt, enda flest­
um ráðlagt að fara sér hægt, svo
mögulegt sé að ná tökum á sjúk­
dómnum. Stuðningsmenn Vals sáu
ekki sama leikmann og slegið hafði í
gegn sumarið áður og sérfræðingar
gagnrýndu hann. Guðjón drekkti sér
í vinnu og skóla, sinnti þó fótboltan­
um áfram en hugsaði sem minnst
um drauminn um atvinnumennsku.
Guðjón Pétur hefur ekki greint frá því
hvað það er sem hrjáir hann fyrr en
nú. Hann orðinn 26 ára og hefur ekki
gefist upp á því sem hann hefur stefnt
að frá unglingsaldri; að verða atvinnu­
maður í knattspyrnu.
Engin lækning til
„Ég fór að finna fyrir verk neðarlega
í maganum, sem fór að ágerast. Kló­
settferðir urðu mjög tíðar á þessum
tíma og á endanum fór ég á spítala.
Þaðan var ég sendur heim, læknirinn
hélt að þetta væri einhver magaveira.
Síðan leið tíminn og mér leið enn verr
ef eitthvað var, svo ég fór aftur til lækn­
is. Þá kom í ljós að þetta var eitthvað
alvarlegra og læknirinn talaði um
bólgur í ristli. Eftir ítarlegri rannsókn,
um miðjan janúar, kom áfallið þegar
ég var greindur með þennan sjúk­
dóm,” segir Guðjón Pétur. Algengast
er að fólk á aldrinum 15–25 ára grein­
ist með sjúkdóminn, og fjöldi þeirra
sem greinist með hann hefur aukist
á síðustu árum. Þyngdartap, blóðug­
ur niðurgangur og slæmir kviðverkir
eru einkenni sjúkdómsins. Ekki er vit­
að hvað veldur sjúkdómnum og þá er
ekki til nein lækning við honum. Hægt
er að fá lyf sem draga úr einkennum,
en bakslag er algengt þegar einhverj­
um bata hefur verið náð.
Guðjón hefur nú ekki fundið fyrir
sjúkdómnum í meira en ár, en hann
fékk tvisvar slæmt bakslag þegar hann
var viss um að hann væri búinn að
ná stjórn á einkennunum. „Ég tek
ellefu töflur á dag og fer í sterasprautu
á tveggja vikna fresti. Þegar ég fékk
bakslag þurfti ég að fara upp á spítala,
þar sem ég var sprautaður með ster­
um á hverjum degi í tvær til þrjár vik­
ur. Þá kemst jafnvægi aftur á og bólg­
urnar hjaðna.“
„Þetta var mitt mál“
Fyrst um sinn fannst Guðjóni sjúk­
dómurinn vera hálfgert feimnismál,
enda erfitt að útskýra tíðar klósett­
ferðir. Hann sagði þó fjölskyldu sinni,
nánustu vinum, þjálfarateymi Vals og
liðsfélögum frá sjúkdómnum áður en
knattspyrnutímabilið hófst. „Ég hafði
enga þörf fyrir að tjá mig um þetta
við aðra, þetta var mitt mál. Það er
kannski fínt núna, mér líður vel og
þetta háir mér ekki,“ segir Guðjón, og
bætir því við að hann líti á sjúkdóm­
inn sem lífsstíl, sérstaklega vegna
mataræðis.
„Aldrei hef ég verið frægur fyrir
að borða hollt, en svo sem ekki óhollt
heldur. Eftir að ég greindist þurfti ég
að umbylta mataræðinu og var mjög
heppinn að gera samning við Happ.
Þar fékk ég matarkörfu fyrir hvern dag
og það hjálpaði mér að komast af stað.
Svo þegar mér fannst ég vera kominn
með stjórn á sjúkdómnum, þá var ég
sjálfur farinn að finna hvaða matur
hentaði mér. Í dag drekk ég mikið af
ávaxtaþeytingum, drekk lítið af mjólk
og borða brauð í litlu magni.“
Frá 3. deild í úrvalsdeild
Ferill Guðjóns í fótboltanum er
nokkuð sérstakur. Hann ólst upp á
Álftanesi og spilaði með UMFB í yngri
flokkum. Hann færði sig svo í Hauka í
2. flokki og spilaði sinn fyrsta meist­
araflokksleik fyrir Hauka árið 2006,
18 ára. Sá leikur endaði hins vegar
ekki vel, Haukar töpuðu og Guðjón
fékk rautt spjald eftir að hafa komið
inn sem varamaður. Eftir tímabilið
færði hann sig til Breiðabliks, þar
sem hann fékk ekki tækifæri og skipti
því yfir í Stjörnuna um mitt sumar.
Þar lék hann í eitt ár, þangað til hann
skipti aftur yfir í Álftanes sem lék þá
í þriðju deildinni. Þangað fór hann á
miðju tímabili til að finna gleðina við
knattspyrnuiðkun á nýjan leik, eftir að
hafa átt lítilli velgengni að fagna hjá
Stjörnunni. Frá Álftanesi lá leiðin aft­
ur í Hauka, sem fóru upp í úrvalsdeild
sumarið 2009 og Guðjón var lykil­
maður í liðinu.
Haukar féllu þó aftur eftir eitt ár
meðal þeirra bestu, en Guðjón spil­
aði vel og var fenginn til Vals. Þar spil­
aði hann tvö tímabil, en það var eftir
fyrra tímabilið sem hann veiktist. Fyrir
rúmu ári fór hann síðan aftur í Breiða­
blik, þar sem hann lék nærri alla leiki
liðsins í deild, bikar og Evrópukeppni
auk þess að skora sjö mörk í öllum
keppnum.
Úr hetju í skúrk
„Helsingborg hafði áhuga á að fá mig
og ég sagði yfirmanni íþróttamála frá
minni stöðu. Hann sýndi mér mikinn
skilning og þeir hafa verið í reglulegu
sambandi við mig. Það var ákveðið
ferli komið af stað með mín mál, en
ég stöðvaði það áður en það fór eitt­
hvað lengra þegar ég fékk sjúkdóms­
greininguna. Það var nokkuð öruggt
að ég hefði farið eitthvað út í þessum
janúarmánuði, hefði þetta ekki kom­
ið upp.“
Í kjölfarið tók við mjög erfitt tímabil
hjá Val, þar sem hann í raun breyttist
úr hetju frá tímabilinu í áður í skúrk,
sem var kennt um lélegt gengi liðsins.
Fáir vissu þó hver ástæðan var,“ segir
Guðjón. Hann kom því skýrt til skila
við þjálfara sína að hann yrði ekki
valinn í liðið nema hann ætti það skil­
ið. „Ég hef oft þurft að glíma við erfiða
hluti og það er stundum bara gott að fá
smá högg í andlitið. Þá er bara að koma
sér á fætur aftur og halda áfram. Það er
ekkert annað í boði,“ segir Guðjón.
Plan B
„Þegar ég greindist sagði læknirinn
við mig að ég þyrfti að fara að huga að
öðrum valmöguleikum í lífinu, svo ég
hefði einhverja varaáætlun ef allt færi
á versta veg. Ég fékk dellu fyrir því að
gera upp íbúðir, skráði mig í nám. Nú
er ég búinn með bóklega hlutann í
húsasmíði og hef gert upp fjórar íbúð­
ir. Námið gerði það að verkum að ég
kynntist efnilegum smiðum sem hafa
hjálpað mér og fengið sjálfir reynslu
í leiðinni,“ segir Guðjón, en hann lét
ekki skólann nægja, því hann fór að
vinna samhliða námi og fótboltanum.
„Ég var að sinna strák sem er ein­
hverfur og fatlaður að nokkru leyti.
Hann var kominn á þann aldur að
hann vildi búa sjálfur, og ég aðstoð­
aði hann við það ásamt öðrum.
Þrjár nætur í viku gisti ég hjá hon­
um, það þarf að líta eftir honum allan
sólarhringinn því hann er einnig
flogaveikur. Í raun gat ég sofið flestar
nætur, en þetta tók á því þetta var
enginn djúpsvefn,“ segir Guðjón, en
síðasta sumar var sérstaklega stremb­
ið, þó vel gengi í fótboltanum. Auk
þess að vinna í næturvinnu nokkrar
nætur í mánuði vann Guðjón hörð­
um höndum að því að koma íbúðar­
húsnæði í stand, sem hann gerði upp
frá grunni eftir að hafa rifið allt út úr
því. Breiðablik gekk vel á öllum víg­
stöðvum og fór langt í Evrópukeppn­
inni. Meðal annars ferðaðist liðið til
Andorra og Kasakstan.
„Er í raun alveg ruglaður“
„Nú er fótboltinn kominn í fyrsta
sætið. Strákurinn sem ég vann með
er kominn á heimili þar sem boðið er
upp á sólarhringsþjónustu og hann
þarf því ekki lengur á mér að halda.
Náminu er lokið, ég kláraði bóklega
hlutann nú fyrir jólin, svo nú get ég
einbeitt mér að því að æfa fótbolta og
vinna í íbúðunum samhliða því,“ segir
Guðjón og viðurkennir að álagið hafi
verið of mikið.
„Þetta var mjög strembið, ég er
í raun bara alveg ruglaður. Þetta
var alltof mikið sem ég lagði á mig,
kærastan mín var ekki alltaf mjög
sátt og ég hafði kannski bara ein­
hvern hálftíma lausan á sólarhring.
Ég kýs að líta bara á þetta sem já­
kvæða reynslu, sem nýtist mér lengi.
Veikindin munu líklega alltaf verða til
staðar, bólgurnar geta komið hvenær
sem er ef ég passa mig ekki. Ég vona
að það finnist lækning við þessu,
læknarnir mínir hafa sagt að það geti
gerst í framtíðinni. Þangað til verð ég
að tækla þetta sjálfur.“ n
nGuðjón Pétur stefnir á atvinnumennsku
Sjúkdómurinn
eyðilagði
næstum
ferilinn
Rögnvaldur Már Helgason
rognvaldur@dv.is Sami sjúkdómur
og Fletcher fékk
Darren Fletcher,
leikmaður
Manchester
United, er ný-
byrjaður að spila
aftur eftir rúmlega
tveggja ára hlé
sem hann neyddist
til að taka eftir
að hafa greinst með sáraristilbólgur.
Fletcher leyndi sjúkdómnum í nokkurn
tíma og gekkst undir aðgerð vegna hans.
Hann er nú þrítugur og sjúkdómurinn
hefur nánast gert út um feril hans.
Tvöfaldur meistari í Svíþjóð
Undir lok fyrra tímabilsins hjá Val var Guðjón lánaður til Helsingborg í Svíþjóð, sem
vantaði skapandi leikmann í hópinn fyrir lokasprettinn í deild og bikar. Þar spilaði hann
sjö leiki, fjóra í deild og þrjá í bikarnum, flesta sem varamaður. Liðið stóð uppi sem
sænskur deildar- og bikarmeistari og ǴGuðjón þótti hafa staðið sig vel. Helsingborg sýndi
honum áfram áhuga og fleiri lið spurðust fyrir um hann. Sjúkdómurinn gerði út af við alla
drauma, og Guðjón spilaði áfram með Val tímabilið á eftir.
„Veikindin
munu
líklega alltaf
verða til staðar
M
y
n
d
s
ig
tR
y
g
g
u
R
a
R
i