Lögmannablaðið - 01.03.2004, Blaðsíða 27

27
Stofnun Félags
kvenna í
lögmennsku:
Helmingur kvenna
í LMFÍ stofnfélagar!
Það var fullt út úr dyrum í húsakynnum LMFÍ
þann 4. mars sl. þegar 70 félagskonur stofnuðu
Félag kvenna í lögmennsku.
Tilgangur félagsins er að efla samstarf og
styrkja stöðu kvenna í lögmannastéttinni og auka
áhrif og þátttöku kvenna í lögmennsku. Félagið
hyggst gera konur í lögmannstéttinni sýnilegri og
halda uppi umræðu og standa vörð um málefni um
hagsmuni kvenna í stéttinni.
Í stjórn hins nýja félags voru kjörnar þær Sif
Konráðsdóttir hrl., formaður, Helga Melkorka
Óttarsdóttir hdl., Kristín Edwald hdl., Margrét
Einarsdóttir hdl. og Svala Thorlacius hrl. Vara-
menn í stjórn eru þær Hjördís Harðardóttir og
Inga Þöll Þórgnýsdóttir.
Sif Konráðsdóttir var að vonum ánægð með
fundarsóknina sem fór fram úr björtustu vonum.
„Við sem vorum í undirbúningshópnum fyrir
stofnun félagsins vorum að vonast eftir 40 til 50
konum og því erum við að vonum kátar. Þetta
sýnir að það var tímabært að stofna félagið og ég
vona að þetta sé til marks um að starfsemi þess
muni verða öflug í framtíðinni,“ sagði Sif.
Guðrún Erlendsdóttir hæstaréttardómari var
kjörin heiðursfélagi en í ræðu sem
hún hélt rifjaði hún m.a. upp að
þegar hún hóf laganám haustið
1956 hafi hún verið litin hornauga
af samnemendum sínum sem og
kennurum sem hafi sumum fundist
óþægilegt að hafa stúlku í tímum.
M.a. hefði kennari, sem kenndi
hluta refsiréttarins, sleppt því að
fara yfir 194. gr. almennra hegning-
arlaga því honum hafi ekki þótt tilhlýðilegt að
skilgreina fullframningu slíks brots í viðurvist
konu! Hún rifjaði einnig upp árin sem hún starfaði
sem lögmaður, 1961-1976, en fólk var ekki vant
því að sjá konu í því starfi. Hún hafi jafnvel verið
titluð sem „herra hæstaréttarlögmaður“ í málflutn-
ingi í Hæstarétti og iðulega verið ávörpuð þannig
af körlum sem komu á skrifstofuna: „Þakka þér
fyrir væna mín, en má ég nú tala við lögmanninn“.
Guðrún rifjaði ennfremur upp að það liðu 24 ár frá
því konur öðluðust rétt til embættisnáms, náms-
styrks og embætta þar til fyrsta konan útskrifaðist
sem lögfræðingur. Það var Auður Auðuns en næstu
30 árin bættust aðeins fimm konur í hópinn, þær
Rannveig Þorsteinsdóttir, Auður Þorbergsdóttir,
Ragnhildur Helgadóttir, hún sjálf og Hólmfríður
Snæbjörnsdóttir. Eftir það hafi farið að rætast úr en
árin 1967-1976 hafi 28 konur útskrifast úr lög-
fræði, 1977-1986 hafi 70 konur útskrifast og í dag
séu konur meira en helmingur þeirra sem stunda
laganám.
L Ö G M A N N A B L A Ð I Ð