Lögmannablaðið - 01.03.2005, Blaðsíða 27

27L Ö G M A N N A B L A Ð I Ð
Fréttir frá félagsdeild
ÁRSHÁTÍÐIN
Nú er árshátíðin á næsta leyti og lög-
menn sjálfsagt búnir að láta snyrta hár
sitt og skegg fyrir þá miklu hátíð, nú
eða láta líma á sig gervineglur, lita
hárið, fara í húðhreinsun, brjósta-
stækkun, fitusog og söngtíma. Þetta er
a.m.k. það sem við á skrifstofunni
erum að fást við þessa dagana en ekki
verður upplýst hver er að gera hvað!
Árshátíðin verður haldin á Hótel Sögu
að þessu sinni. Skemmtiatriði verða í
höndum Arnar Árnasonar leikara og
væntanlega mun djassband lögmanna troða upp
eins og síðast. Sálin hans Jóns míns mun leika
fyrir dansi í lokin og vonandi heppnast hátíðin
vel eins og venjulega.
LÖGMANNALISTINN
Á heimasíðu lögmannafélagsins er LÖG-
MANNALISTINN en þar gefst almenningi
kostur á að leita að lögmanni eftir málaflokkum.
Eins og fyrr hefur komið fram er listinn nú á níu
tungumálum og bæklingi hefur verið dreift víða
sem kynnir þjónustuna á öllum þessum tungu-
málum en hann hefur auk þess fengið all nokkra
kynningu í fjölmiðlum. Þeir lögmenn sem vilja
kynna sér hvernig listinn virkar er bent á að fara
á heimasíðu félagsins. Lögmenn
greiða aðeins kr. 1600,- fyrir hvern
yfirflokk sem þeir eru skráðir fyrir
svo kynningin á þjónustu þeirra er
ekki kostnaðarsöm. Talning á heima-
síðu félagsins sýnir að undanfarið
hafa yfir 8000 manns heimsótt hana á
mánuði og flestir eru í leit að lög-
manni.
NÁMSKEIÐ VORANNAR
Námskeið vorannar eru tólf talsins að
þessu sinni og eru þau auglýst á öðrum
stað í blaðinu. Sem endranær er reynt að blanda
saman fræðslu og skemmtun og nú þegar hafa tvö
námskeið í síðari flokknum verið haldin. Skotfim-
inámskeið var haldið í byrjun þorra en það endaði
með gríðarlega spennandi skotkeppni. Allir kom-
ust þó lífs af. Böðvar Guðmundsson rithöfundur
hélt stutt námskeið um vesturfarana í febrúar sem
var mjög fróðlegt. Tvö námskeið hafa nú þegar
verið haldin fyrir starfsfólk lögmannsstofa, annað
í símsvörun og hitt í skjalavörslu en fagnámskeið
vetrarins verða um gerð örorkumats, skipti dánar-
búa, stjórnskipulag hlutafélaga, alþjóðlegan
einkamálarétt, undirbúning málshöfðunar og sam-
runa fyrirtækja. Tvö áður auglýst námskeið hafa
verið flutt til um daga vegna óviðráðanlegra
aðstæðna en vonandi hefur það ekki komið að sök.
Eyrún Ingadóttir
ELLEFTA grein Mannréttindasáttmála Evrópu er við-
fangsefni 21. Norrænu málflutningskeppninnar en í
júní n.k. munu 6 íslenskir laganemar úr HÍ keppa í
málflutningi í Eystri Landsrétti og Hæstarétti Dana.
Málið varðar danskan garðyrkjumann sem skyldaður
er til aðildar að stéttarfélagi. Þegar félagsgjöld eru
hækkuð í tengslum við stuðning stéttarfélagsins við
tiltekinn stjórnmálaflokk, er garðyrkjumanninum nóg
boðið og leitar úrlausnar Mannréttindadómstólsins.
Þessi atvik eru að sjálfsögðu tilbúningur en eiga sér
hliðstæðu í dönsku máli sem nú er rekið fyrir Mann-
réttindadómstólnum. Í fyrra var málflutningskeppnin
haldin í Reykjavík en þá fór íslenska liðið með sigur
af hólmi í þessari keppni 12 málflutningsklúbba frá
öllum Norðurlöndum. Var það í fyrsta sinn sem
íslenska liðið komst í úrslit. Keppnistungumálin eru
danska, norska og sænska.
Norrænir laganemar flytja mál
um neikvætt félagafrelsi
Ove Bring prófessor færir Sif Konráðsdóttur hrl.,
formanni Club Lögberg þakkir í Hæstarétti í júní
2004. Elisabet Fura-Sandström dómari við
Mannréttindadómstól Evrópu og hluti íslenska
sigurliðsins í bakgrunni.