Lögmannablaðið - 01.03.2008, Blaðsíða 11

LÖGMANNABLAÐIÐ – 4 / 2007 > 11
Ekki hefur tíðkast hérlendis að
lögmenn standi upp þegar þeir
ávarpa dómara en sú venja er
viðtekin í engilsaxnesku réttarfari.
Má velta því fyrir sér hvort æskilegt
sé að taka upp þann samskipta máta
við aðalmeðferð máls. Sú regla er
hins vegar viðtekin hérlendis að
lögmenn standi upp þegar dómari
gengur í og úr dómsal. Góður siður
er og að lögmenn kynni sig fyrir
dómara þegar þeir mæta hjá honum
fyrstu skiptin. Þá er stundvísi dyggð
sem lögmönnum, jafnt sem öðrum,
ber að temja sér.
Farsímar og drykkjarvatn
Með tilkomu farsíma koma upp
vandamál vegna hringinga í dómsal
og því áríðandi að lögmenn gæti
þess að slökkva á slíkum tólum áður
en inn er gengið. Auk þess sem
hringingar í dómsal eru ærið
hvimleiðar geta þær truf lað
hljóðupptökur. Í dómsölum stendur
lögmönnum, aðilum og vitnum
drykkjarvatn til boða. Þar sem
nokkuð var farið að bera á því í
Héraðsdómi Reykjavíkur að lög­
menn tækju með sér drykkjarföng í
dómsal var nýlega tekið fyrir slíkt í
dóminum og tilkynning þess efnis
hengd upp í lögmannaherbergi.
Traust á dómstólum
Dómsalur er sameiginlegur vett­
vangur dómara og lögmanna og því
afar brýnt að gagnkvæm virðing ríki
þar milli þessara fagstétta. Þá þykir
rétt að benda á mikilvægi þess að
lögmenn sýni hvor öðrum hæfilega
virðingu í dómsal og til fyrirmyndar
er að þeir takist í hendur að loknum
málflutningi. Undirstrikar það að
ekki er um persónulegt deilumál
milli lögmanna að ræða heldur eru
þeir að þjóna hagsmunum skjól­
stæðinga sinna. Áríðandi er að
þinghöld fari vel fram, gætt sé að
formbundnum samskiptum og þau
hafi þann blæ yfir sér sem nauð­
synlegur er til að skapa traust
almennings á dómstólum. Fara þar
saman hagsmunir dómara og
lögmanna.
Að lokum ber að taka fram að
samskipti lögmanna og dómara
hafa almennt gengið vel og verður
svo vonandi áfram.