Lögmannablaðið - 01.06.2008, Blaðsíða 28
28 < LÖGMANNABLAÐIÐ – 4 / 2007
Það er ekki mikið um að íslenskir lögmenn afli sér
lögmannsréttinda erlendis. Lögmannablaðið ræddi
við Katrínu Helgu Hallgrímsdóttur héraðs dóms
lögmann hjá BBA//LEGAL um mál flutningsréttindi
sem hún hefur í New York.
Hvernig kom það til að þú tókst próf til að öðlast
málflutningsréttindi í New York?
Ég var í Chicago í framhaldsnámi og hafði alltaf séð
fyrir mér að ég mundi taka málflutningsréttindi í
Bandaríkjunum að því loknu. Þar sem New York er
fjármálamiðstöð heimsins er langalgengast að erlendir
lögmenn taki prófið þar auk þess sem þar er hægt að
taka prófið án þess uppfylla frekari kröfur en að hafa
lokið tilteknu námi í Bandaríkjunum. Það eru sem sagt
engar kröfur um að hafa unnið í einhvern ákveðinn
tíma í Bandaríkjunum og annað slíkt.
Erfiðasta próf sem ég hef farið í
Hvernig fer undirbúningurinn og prófið fram?
Prófið er haldið tvisvar á ári í febrúar og júlí. Ég fór í lok
júlí og undirbúningurinn stóð því í rúma tvo mánuði.
Það var mikil törn, tímar í 4-6 klst. á dag og svo þurfti
ég að lesa í kannski 6-8 klst. í viðbót. Á þessum tveimur
mánuðum er farið yfir flestar fræðigreinar lögfræðinnar;
réttarfar, refsirétt, samningarétt, erfðarétt, sifjarétt,
stjórnskipunarrétt og svo framvegis. Svo fer líka
dágóður tími í að læra að taka prófið. Prófið skiptist á
tvo daga í 6 klst. hvorn dag, annar dagurinn fer í krossa-
spurningar og hinn dagurinn í ritgerðarspurningar.
Undirbúningurinn var fyrst og fremst mikil vinna, en
prófið er klárlega erfiðasta próf sem ég hef farið í.
Hafa þessi réttindi nýst þér í störfum þínum hér á landi?
Það er hæpið að segja að réttindin nýtist mér beint í
störfum mínum sem lögmaður á Íslandi. En engu að
síður lærði ég heilmikið á þessu og það að vera með
réttindin nýtist mér fyrst og fremst gagnvart erlendum
kúnnum sem þekkja að sjálfsögðu þetta próf og líta á
það sem ákveðinn gæðastimpil.
Ráðstefna í Svíþjóð
Ertu í lögmannafélagi New York?
Já ég er aðili að New York State Bar Association og fæ
fyrir vikið ógrynni af tölvupósti og sniglapósti um hin
ýmsu málefni. En svo sit ég í stjórn Íslandsdeildar „New
York State Bar Association International Law and
Practice Section“, ásamt Ásgeiri Ragnarssyni hdl. sem
er formaður og Einari Páli Tamimi hdl. Hlutverk þess er
fyrst og fremst fyrir lögmannafélag New York sem vill
halda uppi tengslum við Íslendinga með áhuga á
alþjóðalögum, hafa þessi málflutningsréttindi eða hafa
verið í námi í Bandaríkjunum. Þessa dagana tökum við
virkan þátt í undirbúningi að árlegri ráðstefnu sem mun
fara fram í Stokkhólmi í september. Þar verður stíft
fræðsluprógramm í þrjá daga með alls konar skemmtun
inni á milli. Fyrirlestrunum verður í grunninn skipt í
þrennt; fyrirtækjalögfræði (corporate), málaferli
(litigation / arbitration), og svo almennt (general). Að
sjálfsögðu eru allir velkomnir en ráðstefnan er ekki
sérstaklega bundin við lögfræðinga sem hafa verið í
Bandaríkjunum. Ég hvet því alla til að skoða þessa
ráðstefnu vel en það má finna upplýsingar um hana út
frá heimasíðu New York State Bar Association: www.
nysba.org eða hafa samband við mig eða eitthvert okkar
ef menn hafa áhuga á því að mæta.
Málflutningsréttindi
í New york
Katrín Helga Hallgrímsdóttir
Viðtal