Lögmannablaðið - 01.12.2014, Blaðsíða 16
16 LÖGMANNABLAÐIÐ TBL 04/14
UMFJÖLLUN
Félag kvenna í lögmennsku 10 ára
VORIÐ 2004 VAR Félag kvenna í
lögmennsku (FKL) stofnað til að efla
samstarf og auka áhrif og þátttöku
kvenna í lögmennsku. Stofnfundurinn
var fjölmennur þar sem samankomnar
voru um helmingur kvenna í
lögmannastétt. Forvígiskonur FKL
vildu gera konur sýnilegri og virkari
innan Lögmannafélags Íslands (LMFÍ),
stuðla að fjölgun kvenna í lögmennsku
og mynda tengslanet. Þá var talið
mikilvægt að halda uppi umræðu um
hagsmunamál kvenna í stéttinni og
áhugi var á að láta rannsaka brottfall
kvenna úr lögmannastétt og ástæður
þess. Stofnun félagsins ber m.a. að skoða
í ljósi þess árið 2004 voru konur einungis
22% félagsmanna eða alls 147 í LMFÍ en
aðeins tíu árum áður, árið 1994, höfðu
konur verið 11% félagsmanna eða alls
43. Til ársins 2004 höfðu einungis átta
konur setið í aðalstjórn LMFÍ í 93 ára
sögu þess og ein kona verið formaður.
Stofnun FKL
Undirbúningsnefnd að stofnun FKL
skipuðu þær Berglind Svavarsdóttir,
Guðrún Björg Birgisdóttir, Helga
Melkorka Óttarsdóttir, Hjördís Harðar
dóttir, Kristín Edwald, Oddný Mjöll
Arnardottir, Sif Konráðsdóttir, Vala
Valtýsdóttir og Þorbjörg I. Jónsdóttir. Á
stofnfundi í mars 2004 var fyrsta stjórn
félagsins skipuð. FKL varð þá strax um
vorið aðili að félagsdeild LMFÍ og hefur
allt frá upphafi átt farsælt samstarf við
starfsmann deildarinnar.
Tengslafundir FKL
Þegar við stofnun FKL var ljóst að þörf og
áhugi væri á að efla félagstengsl kvenna
í lögmennsku. Voru léttir hádegisfundir
nokkuð tíðir á fyrstu starfsárum félagsins,
ýmist óformlegir eða með ákveðið
umfjöllunarefni. Á slíkum hádegisfundi
2005 kynnti t.d. Hrafnhildur Stefánsdóttir
lögmaður skýrslu stjórnvalda um aukinn
hlut kvenna í yfirstjórnum fyrirtækja
sem bar heitið „Aukin tækifæri í forystu
atvinnulífsins“ en hlutfall kvenna í
stjórnum fyrirtækja á Íslandi var þá
nokkuð lakara en meðaltal Norður
landanna. Frá árinu 2010 hefur reglulega
verið efnt til óformlegra tengslafunda.
Jafnframt hefur konum í lögmennsku
verið boðið til ýmissa stofnana og
fyrirtækja þar sem ákveðið efni hefur
verið til umræðu. Sem dæmi má nefna
að þannig héldu yfir sextíu konur til
Hæstaréttar Íslands í nóvember 2013
og að því loknu í móttöku til lögmanna
Laugavegi 3. Þá bauð LOGOS FKL
til móttöku í febrúar 2014 og mættu
hátt í 60 konur. Erindi héldu Unnur
Gunnarsdóttir, forstjóri Fjármálaeftirlitsins
og Helga Melkorka Óttarsdóttir, hrl. og
framkvæmdastjóri LOGOS. FKL hefur
einnig leitast við að fá til sín góða gesti
á aðalfundi félagsins. Sem dæmi má
nefna héldu Eva Margrét Ævarsdóttir
og Helga Lára Hauksdóttir lögfræðingar
og stofnendur Roadmap ehf. erindi um
ávinning af samfélagsábyrgð og góðum
stjórnarháttum á aðalfundi 2014.
Ráðstefnur og stærri
viðburðir FKL
Fyrsta starfsár FKL hófst með því að
FKL stóð, í samstarfi við LMFÍ, fyrir
opnum morgunverðarfundi þar sem
framsögu hafði Elisabet FuraSandström,
dómari við Mannréttindadómstól
Evrópu og fyrrum formaður sænska
lögmannafélagsins. Erindi hennar
bar yfirskriftina „Different but equal
– when will we get there? Women in
the judiciary, success or failure, joint
liability? Some thoughts about how
to survive as a female professional”.
Þá tók formaður FKL jafnframt þátt í
pallborði á málþinginu „Konur, völdin
og lögin”, þar sem aðalfyrirlesari var
breski lögmaðurinn Cherie Blair, og
flutti erindi á ráðstefnunni „Konur og
völd“, sem haldin var á Bifröst 2005 um
hvort að lög væru raunhæft tæki til að
færa efnahagsleg völd til kvenna.
Frá tíu ára afmælishátíð Félags kvenna í lögmennsku. Á hátíðinni voru þrír heiðursgestir: Frú Vigdís Finnbogadóttir
fv. forseti Íslands, Ingibjörg Benediktsdóttir fv. hæstaréttardómari og Þórunn Guðmundsdóttir hrl., fv. formaður LMFÍ.