Lögmannablaðið - 01.12.2014, Blaðsíða 28

28 LÖGMANNABLAÐIÐ TBL 04/14
Á LÉTTUM NÓTUM
Odeon útileikhúsið, suð­ vestan í
Akrópolishæðinni, var byggt árið 161 e.
Kr. og tekur 5000 manns í sæti. Fyrir enda
þess var byggður þriggja hæða veggur,
framhlið leikhússins með bogagluggum,
en þetta leikhús var eyðilagt af Herúlum
árið 267 e.Kr. Það var endurbyggt sem
útileikhús og tónleikastaður árið 1950 og
hefur verið vinsæll tónleikastaður síðan.
Hafa margir af þekktustu listamönnum
heims komið þar fram, s.s Maria Callas,
Luciano Pavarotti og Plácido Domingo,
og einnig Frank Sinatra, Diana Ross og
Elton John.
Hinn forni hæstiréttur
Gengið var að Areopagus, hinum forna
hæstarétti Aþenu á Akropolis, klettahæð
þar sem dómar voru upp kveðnir í
sakamálum og einkamálum hið forna
og rekur sögu sína aftur fyrir 5 öld f.
Kr. Nokkrir gengu á hæðina, en þar eru
engin mannvirki, heldur var dómstóllinn
undir beru himni. Fræðsla Þóru um sögu
Akrópólis var sérlega áhugaverð, og
þá ekki síst þátturinn um arkitektúr
bygginganna þar sem allir hlutir hafa
verið úthugsaðir fyrirfram af ótrúlegri
verkfræðilegri þekkingu og mikið
lagt upp úr hvers kyns myndrænum
skreytingum.
Síðdegis fimmtudaginn 25. september
var farið í rútu til Sounion á syðsta
odda Attíkuskagans, um 70 km. suður
af Aþenu og skoðaðar rústir af hofi
Poseidons. Mikil saga er tengd þessum
stað og þarna nýtur útsýnis yfir Aegeus
hafið til Pelopsskagans, sem forðum var
notaður sem fanganýlenda. Um kvöldið
snæddum við kvöldverð í siglingaklúbbi
rétt fyrir utan Aþenu.
Fræðandi fyrirlestrar um
grískt réttarkerfi
Föstudaginn 29. september var farið í
heimsókn til Lögmannafélags Aþenu
þar sem við fengum kynningu á gríska
réttarkerfinu. Gríska dómskipunin
er í grunninn þríþætt og skiptist í
einkamálaréttarfar, sakamálaréttarfar
og stjórnsýsluréttarfar. Hægt er að áfrýja
málum af öllum stigum til millidómstigs
en Hæstiréttur dæmir einungis í málum
er varða stjórnarskrá landsins. Í Aþenu
starfa um 22.000 lögmenn og árlega
bætast við um 500 nýir lögmenn úr
þeim þremur háskólum í Grikklandi
sem útskrifa lögfræðinga. Fram kom
hjá talsmönnum félagsins að þeir teldu
jafnvel nóg að tveir skólar útskrifuðu
lögfræðinga og voru hissa á því að á
Íslandi væru fjórir háskólar að útskrifa
lögfræðinga. Atvinnuleysi er nokkurt
meðal nýútskrifaðra lögfræðinga
og algengt að þeir vinni kauplaust
á lögfræðistofum til þess að öðlast
starfsreynslu en þeir þurfa 18 mánaða
praxís áður en þér fá lögmannsréttindi.
Í Grikklandi skipta lögmannsréttindin
ekki í hdl. og hrl. heldur eru lögmenn
gjaldgengir á öllum dómstigum. Fengum
við síðan stutt en mjög greinargott erindi
um gríska réttarskipan og þróun hennar
til þessa dags. Í lokin skoðuðum við
bókasafn félagsins, sem er stórt og mikið
en sérkennilegt var að virða fyrir sér öll
þessi fræðirit á hinu framandi gríska
letri.
Við héldum síðan í heimsókn til
KG Law firm, lögfræðistofu Kyrikiades
Georgopoulos sem er ein stærsta og
virtasta lögfræðistofa Grikklands með
rúmlega 80 lögmenn. Stofan vinnur
töluvert fyrir gríska ríkið, er með mörg
af stærstu fyrirtækjum Grikklands og
stór alþjóðafyrirtæki s.s. Coca Cola
og Mc Donalds. Stofan sinnir allt frá
smærri málum einstaklinga og upp í
milljarðaágreining stórfyrirtækja. Þá
hefur stofan unnið við fjölda mála
vegna „hvítflibbaglæpa“ sem upp hafa
komið í kreppunni i Grikklandi. Auk
þess hefur stofan unnið álitsgerðir
fyrir Evrópusambandið og verið aðili
Bjarni G. Björgvinsson í sögustund í Delfí, sem var annar af mikilvægustu
helgistöðum Grikkja til forna, helgaður guðinum Apollon. Þar var talin vera var
miðja heimsins og véfréttin, sem andaði að sér gufum af slöngunni Pýþon og
fylltist spásagnaranda, hafði aðsetur sitt. Auk Bjarna sést í Ragnhildi
Benediktsdóttur, Önnu Mjöll Karlsdóttur , Ingu Margréti Skúladóttur og Inga
Tryggvason.