Lögmannablaðið - 01.06.2015, Blaðsíða 20
20 LÖGMANNABLAÐIÐ TBL 02/15
LAGADAGUR
V. Örmálstofur
Í ÁR VAR bryddað upp á þeirri nýjung
að bjóða upp á fjögur styttri erindi, er
vörðuðu ólík málefni, í einni málstofu.
Hverjum framsögumanni voru
úthlutaðar 15 mínútur og í kjölfar hvers
erindis var boðið upp á spurningar úr
sal. Þóra Hallgrímsdóttir, sérfræðingur
við lagadeild Háskólans í Reykjavík, var
í hlutverki stjórnanda og fórst það afar
vel úr hendi.
Upplýsingaöryggi í
tölvuskýinu
Yfirskrift fyrsta erindisins var „Upp
lýsinga öryggi í skýjunum“ og var
framsögumaður Erla S. Árnadóttir
hrl. Hún vék fyrst að því hvað fælist
í hugtakinu „tölvuskýjaþjónusta“. Í
framhaldinu fjallaði hún um vörslu
upplýsinga í tölvuskýinu með hliðsjón
af ákvæðum persónuverndarlaga en í
tölvuskýinu eru gögn vistuð með það
að markmiði að nýta auðlindina á sem
hagkvæmastan hátt. Gögn kunna því
að vera vistuð á einum netþjóni í dag
og öðrum á morgun. Gögn eru einnig
vistuð mjög nálægt gögnum annarra
og eykur það á mikilvægi þess að
ábyrgðaraðilar móti öryggisstefnu, geri
áhættumat og ákveði öryggisráðstafanir.
Svo vel vildi til að nokkrir starfsmenn
Persónuverndar voru viðstaddir og lögðu
sitt lóð á vogarskálarnar í umræðum sem
spunnust að erindi loknu.
Google gleymir engu
Næst steig á stokk Elín Blöndal lög
fræðingur Háskóla Íslands, og fjallaði
um birtingu nafna í dómsúrlausnum sem
birtar eru á netinu. Slík birting byggist
á grundvallarreglum um opin þinghöld
en sjónarmið um vernd einkalífs og
persónuvernd leiða til þess að gæta
verður varúðar þegar kemur að birtingu
nafna eða annarra persónuauðkenna.
Að mati Elínar verður ekki séð að
löggjafinn hafi með fullnægjandi hætti
tekið afstöðu til þess hvernig rétt sé
að haga dómabirtingum á vefnum og
reglur dómstólaráðs veita dómstólum
svigrúm til mats. Í erindinu kom einnig
fram að ekki er fullt samræmi á milli
reglna dómstólaráðs annars vegar og
Hæstaréttar hins vegar um nafnbirtingu
í dómsúrlausnum.
Að erindinu loknu spunnust
talsverðar umræður, m.a. um hvort
gera eigi greinarmun á því hvort dómar
séu birtir á pappír eða á vefnum. Elín
taldi mikilvægt að greina þar á milli,
enda vægju möguleikar á að samkeyra
upplýsingar þungt í okkar fámenna
samfélagi.
Hvað heftir höftin?
Eftir að fundarmenn höfðu nýtt stutt hlé
til að teygja úr sér, tók til máls Jóhannes
Karl Sveinsson hrl. Hann fjallaði um
hvaða lagalegu álitamál væru uppi
varðandi tilvist og losun gjaldeyrishafta.
Ráðamenn hafa boðað að liður í
losun þeirra sé álagning útgöngu eða
stöðugleikaskatts en ekkert hefur verið
frekar gefið upp um útfærslu eða hlutfall
skattsins.
Spurningar munu vakna um lögmæti
skattlagningarinnar enda ólíklegt að
hagsmunaaðilar muni taka slíkum
fyrirætlunum þegjandi og hljóðalaust.
Munu þær eflaust koma til kasta
dómstóla sem hingað til hafa verið
tregir til að fallast á ólögmæti slíkrar
skattlagningar.
Jóhannes Karl vitnaði til þess að við
mat á lögmæti slíks skatts megi ekki
eingöngu líta á fjárhæð skattsins, heldur
Jóhannes Karl Sveinsson.. Erla S Árnadóttir.