Peningamál - 01.02.2002, Blaðsíða 56
PENINGAMÁL 2002/1 55
Janúar 2001
Hinn 10. janúar sendi Búnaðarbanki Íslands hf. frá
sér fréttatilkynningu um að bankanum hafi borist
tilkynning frá Fjármálaeftirlitinu þann 5. janúar.
Fram kemur að Fjármálaeftirlitið telji nauðsynlegt að
rannsaka frekar viðskipti Búnaðarbankans hf. og
Hlutabréfasjóðs Búnaðarbankans með hlutabréf í
Pharmaco hf. tímabilið frá 7. júní 1999 til mars 2000.
Fram kemur það mat Fjármálaeftirlitsins að Búnaðar-
bankinn hf. og Hlutabréfasjóður Búnaðarbankans
hafi búið yfir trúnaðarupplýsingum umrætt tímabil.
Hinn 24. janúar greip Seðlabanki Íslands inn í við-
skipti á millibankamarkaði með gjaldeyri eftir að
gengisvísitala íslensku krónunnar hafði stigið hratt
eftir að markaðurinn var opnaður kl. 9:15. Seðla-
bankinn seldi Bandaríkjadali fyrir 2,06 ma.kr. sem
varð til þess að ró komst á markaðinn.
Hinn 26. janúar var undirritaður samningur á milli
Seðlabanka Íslands og þýska bankans DePfa Europe
um lánsheimild að fjárhæð 250 milljónir Bandaríkja-
dala. Mun lánssamningurinn auka svigrúm Seðla-
bankans til aðgerða á gjaldeyrismarkaði.
Febrúar 2001
Hinn 7. febrúar sendi bandaríska matsfyrirtækið
Moody's í New York frá sér frétt þar sem tilkynnt er
að fyrirtækið hafi staðfest lánshæfismat sitt fyrir
Ísland. Í fréttinni segir Moody's að horfur um láns-
hæfismatið séu taldar stöðugar í nýrri skýrslu fyrir-
tækisins um Ísland. Þessi niðurstaða endurspeglar
verulega bætta skuldastöðu opinbera geirans og stað-
festu stjórnvalda í hagstjórn sem lagt hefur grunn að
öflugum hagvexti, stöðugleika og miklum lífskjara-
bata á liðnum árum. Umfangsmiklar skipulags-
breytingar á síðasta áratug hafa falið í sér styrkingu á
fjármálum hins opinbera, aukið frjálsræði á fjármála-
og vörumarkaði, aukna fjölbreytni í framleiðslu og
útflutningi, bætta stjórn fiskveiða og frjálslyndari
viðhorf til erlendrar fjárfestingar. Moody's varar á
hinn bóginn við því að miklum hagvexti hafi fylgt
alvarlegt ójafnvægi í þjóðarbúskapnum sem gæti
grafið undan efnahagslegum stöðugleika á komandi
tíð.
Lánasýsla ríkisins tilkynnti um niðurstöður útboðs á
RIKB 07 0209. Um er að ræða ný óverðtryggð ríkis-
bréf, kúlubréf, sem bera ekki vexti og falla í gjald-
daga þann 9. febrúar 2007.
Hinn 13. febrúar var tilkynnt að í framhaldi af
kaupum Kaupþings hf. og samstarfsaðila á meiri-
hluta hlutafjár í Frjálsa fjárfestingarbankanum hafi
verið ákveðið að hætta starfsemi Markaðssviðs
Frjálsa fjárfestingarbankans hf.
Mars 2001
Hinn 16. mars fór fram útboð á ríkisvíxlum hjá Lána-
sýslu ríkisins. Var þetta síðasta útboðið sem féll undir
samning varðandi nýtt aðalmiðlarakerfi með ríkis-
víxla og viðskiptavakt með þá á eftirmarkaði.
Frá 23. mars til 27. mars þurfti Seðlabanki Íslands
ítrekað að selja Bandaríkjadali fyrir krónur með það
að markmiði að verja vikmörk íslensku krónunnar.
Alls voru seldir dalir fyrir 6,8 ma.kr. Helsta ástæða
óróans var óvissa um niðurstöður aðalfundar Seðla-
bankans sem auglýstur hafði verið 27. mars.
Hinn 27. mars undirrituðu Seðlabanki Íslands og
forsætisráðherra yfirlýsingu um breytingar á fyrir-
komulagi stjórnar peningamála á Íslandi sem tóku
gildi 28. mars 2001. Í stað þess að miða peninga-
stefnuna við að halda gengi krónunnar innan vik-
marka mun Seðlabankinn hér eftir miða hana við að
halda verðbólgu sem næst 2½% með ákveðnum þol-
mörkum. Ríkisstjórnin veitir Seðlabankanum fullt
svigrúm til að beita stjórntækjum sínum í því skyni
að ná verðbólgumarkmiði sínu.
Samhliða tilkynningu um breytta peningamálastefnu
tilkynnti Seðlabankinn um 0,5 prósentustiga vaxta-
lækkun í endurhverfum viðskiptum við lánastofnanir.
Annáll fjármálamarkaða
Janúar 2001 – janúar 2002