Morgunblaðið - Sunnudagur - 19.07.2015, Blaðsíða 20
20 MORGUNBLAÐIÐ SUNNUDAGUR 19.7. 2015
Ferðalög og flakk
Tímaritið Travel+Leisure valdi á dögunum höfuðborg Colorado,
Denver, eina bestu borg Bandaríkjanna til að ferðast til á haustin.
Denver þykir einkar falleg í haustlitunum og jafnvel hvað fallegust í
byrjun október. Haustdýrðarinnar er til að mynda gott að njóta frá
Cherry Creek-hjólastígnum eða á göngu meðfram High Line Canal
eða skreppa enn lengra út í náttúruna í fræga nærliggjandi þjóðgarða
og þá má ekki gleyma að borgin er við rætur Klettafjalla. Þeir sem
vilja halda sig innan borgarmarka ættu að skoða gullfallegan grasa-
garð þeirra; Denver Botanic Gardens.
Þá er Denver fræg fyrir nokkrar bjórhátíðir á haustin ef fólki finnst
ómissandi að taka þátt í októberfest og þykja þær stórskemmtilegar.
Þær eru Denver Októberfest, Denver bjórhátíðin og The Great Am-
erican Beer Festival þar sem boðið er upp á 2.000 bjórtegundir frá
meira en 400 bruggurum. Þá er gaman að skoða brugghús innfæddra
sem eru þónokkur.
LITADÝRÐ OG BJÓR Í DENVER
EKKI HITABYLGJA OG FÆRRI FERÐAMENN
Útlenskt
haust
ÞEGAR HITABYLGJUR ERU YFIRSTAÐN-
AR OG FERÐAMÖNNUM FÆKKAR
GETUR VERIÐ DÁSAMLEGT AÐ
FERÐAST ERLENDIS. EKKI BARA ER
LOFTSLAGIÐ BÆRILEGRA OG MEIRA
PLÁSS TIL ATHAFNA HELDUR ERU
MÖRG SVÆÐI ENN FALLEGRI Í
HAUSTLITUNUM EN Í SKÆRUM SUM-
ARTÓNUM. NOKKRIR STAÐIR ERU
FRAMÚRSKARANDI SKEMMTILEGIR TIL
AÐ EYÐA NOKKRUM DÖGUM Á Á
HAUSTMÁNUÐUM.
Júlía Margrét Alexandersdóttir julia@mbl.is
Toskana-héraðið á Ítalíu kemur gjarnan upp í helstu ferðatímaritum heims þegar
fjallað er um bestu áfangastaði að hausti. Aðalferðamannatíminn er þá liðinn,
það er enn heitt og í loftinu er dásamlegur ilmur af rauðvíni og berjum. Víða má
rekast á hátíðir tileinkaðar vínberjauppskeru og bændastemningu og það er
stórkostlegt að vera á ferðinni í september þegar bændur eru í óðaönn að
framleiða vín sín úr vínberjauppskeru sumarsins.
Af slíkum hátíðum má þar til dæmis mæla með Chianti-hátíðinni sem fer fram
í litla þorpinu Impruneta, litlu þorpi milli Flórens og Chianti-svæðisins en hátíðin
fer fram síðasta sunnudaginn í septembermánuði. Á hátíðinni býðst gestum að
smakka yfir 800 víntegundir og er dans, tónlist og gleði ríkjandi en innfæddir
klæðast sérstökum hátíðarbúningum í miðaldastíl.
Sama gildir um ólífuolíugerðina en til að verða vitni að henni er betra að vera
á ferð í nóvember en á sumum stöðum er boðið upp á að fólk geti tekið þátt í
olíugerðinni. Þrátt fyrir að flestir tengi Toskana-héraðið fyrst og fremst við
ólífuolíu og vín má ekki gleyma kastaníuhnetunum. Þó þær sé flestar að finna á
einkalóðum eru þær svo fallegar að það nægir mörgum að njóta þess. Ef fólk vill
komast nær þeim er tilvalið að fara í ferð til Monte Amiata þar sem hægt er að
finna til dæmis bændabýli sem leyfa fólki að tína hnetur til að eiga.
Á haustin er huggulegt að gista í nokkrar nætur í hinum ævaforna smábæ Fie-
sole og Siena. Vitaskuld á enginn sem heimsækir Toskana-héraðið að láta sjálfa
Flórens framhjá sér fara.
KASTANÍUHNETUR Í TOSKANA
Eitt fallegasta svæði Englands er
gjarnan talið vera Cotswolds, með
sínum fallegu, litlu bæjum og þorp-
um. Á sumrin getur ferðamanna-
fjöldinn virst yfirþyrmandi en á
haustin hefur værð aftur færst yfir
gömlu þorpin, engin hitabylgja sem
slævir og haustlitirnir guðdómlegir.
Það er auðvelt að keyra frá Lond-
on út í Cotswolds-náttúruna, sem
er í um 90 mínútna fjarlægð í vestur
með bíl eða lest.
Rough Guides ferðatímaritið valdi
Cotswolds besta stað Bretlands til
að heimsækja á haustin. Staðurinn
er einkar rómantískur og býður upp
á kyrrð og ró. Þannig má rölta á milli
sveitakráa og lítilla kaffihúsa, gæða
sér á heitu tei og kexi dvelja nætur
hér og þar á litlum gistiheimilum.
Bændamarkaði má finna víða með
fallegum vörum og svo er haustið í
Cotswolds í öllum regnbogans
mögulegum litum.
Meðal skemmtilegra þorpa á
svæðinu má nefna Stanton, Stanway
og Snowhill. Þá er Robinswood Hill
Country Park í Gloucester dásam-
legt útivistarsvæði sem býður oft
upp á ýmsa afþreyingu fyrir börn.
ENSK SVEITARÓMANTÍK