Tímarit hjúkrunarfræðinga - 01.03.2009, Blaðsíða 35

Tímarit hjúkrunarfræ›inga – 1. tbl. 85. árg. 2009 31
Heilsustefna og þátttaka
hjúkrunarfræðinga
Heilsustefna heilbrigðisráðuneytis hefur
nú verið kynnt. Markmið heilsustefnunnar
er ekki eingöngu að fólk nái háum aldri
heldur snýst hún ekki síður um að fólki líði
sem best á meðan það lifir. Í fyrsta hluta
hennar eru sett markmið sem sérstaklega
beinast að börnum og unglingum en einnig
eru þar markmið er varða almenning í
landinu. Þar er enn fremur sérstaklega
bent á að efnahagskreppan, sem nú
gengur yfir samfélagið, mun án efa auka
líkur á ýmsum heilsufarsvandamálum.
Efnahagur fjölskyldna og einstaklinga
hefur áhrif á heilsufar og því afar brýnt
að hleypa af stokkunum aðgerðum
sem fela í sér forvarnir og hafa
heilsueflandi áhrif á samfélagið í heild.
Þar geta hjúkrunarfræðingar lagt lóð á
vogarskálarnar.
Hjúkrunarfræðingar sinna heilsuvernd,
þeir starfa á heilsugæslustöðvum og
geta haft þar forystu á forsendum heilsu
og heilbrigðis. Þeir sinna einstaklingum
frá getnaði til grafar og hafa því einstakt
tækifæri til að vinna að heilsuvernd og
heilsueflingu allra aldurshópa.
Heilsugæslunni er ætlað stórt hlutverk
þar. Framtíð hjúkrunarfræðinga er
í heilsugæslunni. Þeir verða að nýta
þekkingu sína og bjóða hana fram. Einnig
þurfa þeir að nýta sér sóknarfærin og
gefa kost á sér. Sjálfstæð skipulögð
hjúkrunarmóttaka er sóknarfæri og
aukna áherslu þarf að leggja á heilsu­
vernd barna og unglinga, í grunn­ og
framhaldsskólum, ungmenna utan
skóla og aldraða. Sjálfstætt starfandi
hjúkrunarfræðingar innan heilsugæslu
eru dýrmætt tækifæri til nýsköpunar.
Heildræn hugsun í heimahjúkrun aldraðra
gæti verið annað sóknarfæri þar sem
heimahjúkrunin byggist á hugmyndafræði
líknandi meðferðar.
Aukin áhersla á teymisvinnu kom
fram í öllum umræðuhópunum. Telja
hjúkrunarfræðingar að auka þurfi hana á
öllum sviðum.
Menntun og stjórnun
Þá kom fram að menntun hjúkrunar­
fræðinga þarf að taka frekara mið af
breyttum og víðari starfsvettvangi
hjúkrunarfræðinga auk þess sem
hjúkrunarfræðingar starfa í auknum mæli
utan hefðbundinna heilbrigðisstofnana. Því
þarf að byggja námið meira á upplýsingum
og rannsóknum um þörf samfélagsins fyrir
heilbrigðisþjónustu og leggja meiri áherslu
á samráð fleiri hópa sérfræðinga sem þar
starfa. Þá þarf og að ýta undir klíníska
færni og virða þá þekkingu.
Hlutverk hjúkrunarstjórnenda er mikilvægt
á þessum tímum óróa og breytinga. Þeir
þurfa að skapa umhverfi þar sem fléttað er
saman þekkingu, þróun og klíník. Þeir þurfa
að auka möguleika hjúkrunarfræðinga til
að hafa áhrif, deila ábyrgð og hafa samráð
vegna breytinga. Gott upplýsingaflæði
milli aðila er grundvallaratriði eigi að
mynda þéttan og samstiga hóp í ölduróti
fyrirsjáanlegra breytinga.
Hér að framan hefur verið gerð örlítil grein
fyrir þeim umræðum sem fram fóru á
hjúkrunarþinginu. Niðurstöður hópanna
verða nýttar við endurskoðun á stefnu
félagsins í hjúkrunar­ og heilbrigðismálum
en eins og fram hefur komið hafa miklar
breytingar átt sér stað með breyttum
lögum. Ný lög og miklar efnahagslegar
breytingar í samfélaginu gefa ný tækifæri
og vonandi tekst hjúkrunarfræðingum að
nýta sér þau.
Nánari upplýsingar um hjúkrunarþingið er að finna á
heimasíðu félagsins, www.hjukrun.is.
Þátttakendur á þinginu með framsögumenn á fyrsta bekk.
Ágæti hjúkrunarfræðingur!
Verðir þú fyrir atvinnumissi leitaðu þá
aðstoðar Félags íslenskra hjúkrunarfræðinga.
Hjúkrunarfræðingar munu ekki fara varhluta af
ástandinu í þjóðfélaginu. Til þess að standa vörð
um réttindi þín og til þess að stéttarfélagið þitt
geti fylgst með atvinnuástandi hjúkrunar fræð-
inga er mikilvægt að þú hafir samband við
stéttarfélagið hyggist vinnuveitandi þinn gera
breytingar á ráðningarsamningi þínum.