Morgunblaðið - Sunnudagur - 25.10.2015, Blaðsíða 28

28 MORGUNBLAÐIÐ SUNNUDAGUR 25.10. 2015
Matur og drykkir
E
ftir að hafa slasast illa á vélsleða fyrir tveimur árum
hefur Hallgrímur Sigurðarson ekki getað staðið í eld-
húsinu og matreitt ofan í gesti 1862 Nordic Bistro í
Hofi. Á þó enn hlut í staðnum en síðasta vetur, þeg-
ar hann vantaði verkefni, ákvað Hallgrímur að láta gamlan
draum rætast og hefur opnað tvo nýja veitingastaði við Ráð-
hústorgið á Akureyri. Sá þriðji verður að veruleika innan tíð-
ar. „Þótt ég geti ekki staðið í eldhúsinu er ég fínn við tölv-
una,“ segir framkvæmdastjóri staðanna þriggja glaðbeittur.
Hallgrímur stofnaði fyrirtæki um reksturinn og inn í það
rann veitingastaðurinn Kung Fu við torgið. Hann var færður
um set og heitir nú Kung Fu Express, þar sem sushi-réttir
eru í boði, einkum og sér í lagi til að grípa með sér þó einnig
sé hægt að tylla sér niður og borða á staðnum. T-bone steik-
hús var opnað þar sem Kung Fu var áður í Brekkugötu 3,
djásnið í krúnu þeirra Hallgríms. Þriðji staðurinn verður
Kráin R5 microbar, við Ráðhústorg 5.
„Ég hef lengi gengið það með í maganum að opna alvöru
steikhús; þar sem steikurnar eru aðalatriði en ekki bara í
boði með einhverju öðru. Hér er steikin númer eitt, tvö og
þrjú. Við erum með grís, kúkling, lamb, hrefnu, lax og hum-
ar en nautið er vissulega í aðalhlutverki. Við keyptum okkur
kolaofn og ég segi stundum að á honum sé bara einn takki:
kokkurinn! Þar er allt grillað á viðarkolum og við notum
bara kjöt sem hefur þegar meyrnað mjög vel.“
Staðurinn tekur um 50 manns í sæti og segir Hallgrímur
það lúxusvandamál hve mikið hefur verið að gera.
„Við völdum rólega daga til að opna staðina,“ segir hann
og hlær. „Kung Fu Express 17. júní þegar voru sex þúsund
manns hér fyrir utan gluggann og steikhúsið um verslunar-
mannahelgina þegar voru líklega 16 þúsund á torginu.“
Mikill fjöldi veitingastaða hefur sprottið upp á Akureyri á
síðustu árum. „Ég held að fá 20 þúsund manna samfélög í
heiminum geti státað af jafn frábærri flóru veitingastaða og
Akureyri. Ég hef flakkað um allan heim og í bæjum af þess-
ari stærð er oft bókasafn og bensínsjoppa en þá er það jafn-
vel upptalið í aðalgötunni!“
En er þá markaður fyrir alla þessa staði nyrðra?
„Nei, varla,“ segir Hallgrímur hreinskilinn. „Eitthvað verð-
ur örugglega undan að láta yfir mögrustu mánuðina þegar
lítið sem ekkert er að gera í bænum. Það er erfitt að halda
skipinu á floti þegar staðirnir eru fullir af starfsfólki en nán-
ast engir gestir. Þeir túristar sem eru á ferðinni á rólegasta
tímanum vilja þrátt fyrir allt fá fulla þjónustu og þar stang-
ast á hagsmunir gesta og eigenda.“ Gesturinn verði hins veg-
ar alltaf að njóta vafans, segir hann.
Hallgrímur segist ekki vera í samkeppni við sjálfan sig á
torginu, staðirnar þrír séu það ólíkir. „Fyrir mér er þetta al-
veg svart og hvítt; annaðhvort fær maður sér sushi eða góða
steik. Þar verða því ekki árekstrar, að minnsta kosti ekki á
kvöldin. Og ef maður ætlar sér út í þetta brjálæði er eins
gott að gera það á þessum stað. Hér í kring er fullt af hót-
elum og gistiheimilum, mikil fjölgun ferðamanna kallar á
auka þjónustu í mat og drykk og ef maður ætlar að vera í
þessum bisness er best að vera þar sem fólkið er.“
Hann hefur unnið mikið sjálfur við að innrétta staðina
ásamt fjölskyldu og vinum. „Mér mun þykja vænt um marg-
ar spýturnar, sérstaklega barborðið á R5. Það var ekkert
grín að saga þann bút,“ segir Hallgrímur, en timbrið þar inni
er allt rekaviður frá Birni bónda á Valþjófsstöðum á Mel-
rakkasléttu. Upphaflega hugmyndin með R5 microbar var að
þar yrðu til 100 bjórtegundir og „af því ég hef lengi haft
gaman af því að dreypa á viskíi, 100 viskítegundir og 100
tegundir af léttvíni. Semsagt, 300 titlar. Það er enn bara
draumur en þó takmark! Rosalega dýrt en sjálfsagt ekki vit-
lausari hugmynd en hver önnur …,“ segir Hallgrímur.
Morgunblaðið/Skapti Hallgrímsson
ÓTRÚLEG FLÓRA VEITINGASTAÐA Í 20 ÞÚSUND MANNA BÆ
Ræður ríkjum
við Ráðhústorgið
HALLGRÍMUR SIGURÐARSON, MATREIÐSLUMEISTARI Á AKUREYRI, KVEÐST EFAST UM AÐ Í NOKKRU ÖÐRU
20 ÞÚSUND MANNA SAMFÉLAGI Í VERÖLDINNI SÉ ÖNNUR EINS FLÓRA VEITINGASTAÐA OG ÞAR Í BÆ.
HANN LEGGUR SIG FRAM Í ÞEIM EFNUM; Á NÚ ÞRJÁ VEITINGASTAÐI VIÐ RÁÐHÚSTORGIÐ!
Skapti Hallgrímsson skapti@mbl.is
Lax, lax og
aftur lax
Hallgrímur gefur hér góð ráð varðandi réttinn á mynd-
inni af Kung Fu Express:
„Hvernig sjóðum við sushigrjón? Veljið stutt og feit
sushigrjón í næstu búð. Skolið grjónin mjög vel þar til öll
sterkja er runnin af þeim, getur tekið a.m.k. 5 mínútur,
og leggið í pott. Látið vatn fljóta u.þ.b. þumlung yfir, fáið
upp suðu og lækkið síðan í minnsta hita í u.þ.b. 5 mín-
útur. Hellið soðnum grjónunum í plast eða viðarfat og
notið aðeins trésleif við að marinera grjónin með 1
hluta sushiediki, ½ hluta sykri og ¼ hluta salti, öllu
blandað saman áður en hellt er yfir grjónin og þau látin
ná stofuhita. Setjið grjónin ekki í kæli.
Makirúllur eru með noriblaðið utan um, nigiri eru
grjónakoddar og úthverfar rúllur eru oft kallaðar calif-
orniarúllur. Hér lékum við okkur að þessum þremur
tegundum með laxi. Gaman getur verið að leika sér ör-
lítið með chili í stað wasabi til að fá „hitann“. Ein leið til
að leika sér með sósu er að blanda vandaðri chilisósu í
japanskt majónes. Um að gera að gera nokkur „mistök“
í rúllunum til að geta prófað aftur og aftur!“