Morgunblaðið - Sunnudagur - 25.10.2015, Blaðsíða 45

25.10. 2015 MORGUNBLAÐIÐ SUNNUDAGUR 45
reiðubúin að taka við flóttamönnum frá Sýrlandi en furðar
sig á hægaganginum. „Margt af þessu fólki sem kemur til
Lesbos er menntað og vel upplýst millistéttarfólk. Einmitt
fólkið sem best væri að fá hingað vegna þess að það hefur
alla möguleika á að laga sig að íslensku samfélagi. Þetta
fólk þekkir heiminn. Hvers vegna að bíða? Hvers vegna
tökum við ekki strax á móti tvö hundruð flóttamönnum?
Neyðin er núna!“
Ætlar að fara aftur
Að mynda frá sólarupprás til myrkurs á Lesbos tekur ekki
svo á, en að sjá neyðina allan daginn tekur á, að sögn
Páls. Kominn í koju kveðst hann hafa verið gjörsamlega
uppgefinn – andlega frekar en líkamlega. „Það er ekki
annað hægt en grenja yfir þessu óréttlæti. Hvers vegna er
farið svona með fólk? Réttindi þess fótum troðin. Það er
skelfilegt að horfa upp á þessa sáru neyð og geta ekkert
gert. Ekki er hægt að ætlast til að venjulegt fólk skilji
þetta, án þess að koma hreinlega á staðinn. Þess vegna
ber mér skylda til að leggja mitt litla lóð á vogarskálarnar
– segja söguna og mynda, til að sýna hvernig þetta raun-
verulega er. Ég dáist að þessum alltof fáu sjálfboðaliðum
sem taka á móti flóttamönnunum, allan sólarhringinn, án
þeirra væri ástandið fyrir þetta blessaða fólk, enn verra.“
Páll er staðráðinn í að fara aftur og ljósmynda flóttafólk
í vetur. Líklega þá á meginlandi Evrópu. „Ég fer eins
fljótt og ég get aftur. Það er verið að skrifa mannkynssög-
una fyrir framan nefið á okkur. Mestu fólksflutningar sem
um getur. Og þeim er hvergi nærri lokið, ástandið á bara
eftir að versna eftir því sem flóttafólkinu fjölgar og veðrið
kólnar. Við getum búið okkur undir enn meiri hörmungar í
vetur. Já, hörmulegan vetur, fyrir þetta fólk, sem er búið
að missa allt og landið sitt líka.“
Þessi fjölskylda hafði tjald meðferðis frá Homs í Sýrlandi.
Alveg búin þessi stelpa frá Damaskus eftir nokkra tíma siglingu yfir Eyjahafið.
Fínn skal maður vera. Sýrlenskur faðir snyrtir skegg sitt, finnur spegill á vespu í miðbæ Mytilene.
Afganskir flóttamenn, ferðamenn, standa í röð í dagrenningu til að láta skrásetja sig í flóttamannabúðum í Mytilene. Bara brot af þeim hópi sem kom þennan sólarhringinn.
Ljósmyndir/Páll Stefánsson