FLE blaðið - 01.07.2010, Blaðsíða 32
af því að það væru meiri möguleikar í endurskoðuninni og gott
starfsnám henni tengt. 15 árum síðar hefði hann farið aftur á
skólabekk og farið í framhaldsnám í fjármálum."
Nú starfið þið hvorug sem endurskoðendur. Hafði starfsálagið
áhrif á það? „Já alveg örugglega. Þau ár sem við störfuðum
bæði á endurskoðunarskrifstofum var vinnuálagið mjög
mikið fyrstu 6 mánuði ársins og má segja að við höfum skipt
helgunum og kvöldunum á milli okkar, annað okkar vann á
laugardegi og hitt á sunnudegi auk þess sem sonur okkar fékk
oft að gista hjá ömmu og afa í miðri viku þegar álagið var mest
svo við gætum bæði unnið á kvöldin. Við hjónin sáumst því
aðallega í dyragættinni heima þegar við skiptumst á vöktum.
Þegar kom að því að sonur okkar átti að hefja skólagöngu þá
ákváðum við að minnka við okkur vinnu til að geta sinnt honum
betur." Kristján hætti í endurskoðuninni og Hrefna minnkaði
starfshlutfall utan háannatíma. Þegar Hrefna ákvað að breyta
um starfsvettvang hafði Kristján starfað utan fagsins í nokkur
ár og þó starfið væri bæði áhugavert og skemmtilegt þá horfði
hún öfundaraugum til þess að eiga svo til alltaf frí um helgar.
Ástæðan fyrir því að Hrefna hætti störfum sem endurskoðandi
var þó miklu frekar áhugi á að breyta til og prófa að starfa
hinum megin við borðið.
Væntingar til námsins? Þegar þau hjónin eru innt eftir því hvort
námið hafi staðið undir væntingum þá taka þau vel undir það.
Kristján segir að þetta hafi verið góður skóli og dýrmæt reynsla
ásamt því að verkefnin hafi verið mjög fjölbreytt. Að mati
Hrefnu stóð námið að mestu undir væntingum þó það hefði
verið örugglega til góða að hafa starfað á endurskoðunarstofu
samhliða náminu og hún telur að starfsnám hefði verið æskilegt
eins og var í lagadeildinni á sínum tíma.
„Við eignuðumst frumburð okkar í lok nóvember á 4. ári og eftir
það skiptum við tímamætingu að hluta til á milli okkar- man að
ég fékk flesta endurskoðunartímana og var mætt þar um leið
og ég losnaði af fæðingardeildinni. Til að létta okkur vinnuna á
4. ári lásum við valfögin utanskóla um sumarið og tókum prófin
áður en haustönnin á 4. ári hófst. Það kom okkur heldur betur
til góða um vorið þegar sonur okkar veiktist og var lagður inn á
gjörgæslu um það leyti þegar prófin voru að byrja. Við vorum
heppin því valfögin voru til prófs í upphafi próftímabilsins á
sama tíma og sjúkrahúsdvöl sonarins."
Þau hjónin hafa mismunandi skoðun á því hvort þau sjái sig fyrir
sér starfandi sem endurskoðendur í framtíðinni. Hrefna játar því
og segist stundum sakna uppgjörsvinnunnar og kikksins sem
því fylgir að klára uppgjör og loka vinnumöppunni. Henni fannst
alltaf skemmtilegast þegar mest var að gera þó vinnuálagið
hafi verið mikið. Starfsvettvangur innri endurskoðunar er að
hennar mati heillandi og er frábært að kynnast því góða starfi
sem unnið er hjá Félagi um innri endurskoðun og einnig hjá
alþjóðlega félaginu IIA. Eiginmaðurinn er þó ekki á sömu
skoðun um að hann fari aftur á starfsvettvang endurskoðunar
þó svo hann viðurkenni að hafa gaman að því að koma að
uppgjörum af og til.
Næsta spurning snéru að því hverjir væru nú helstu kostlr og
gallar starfsumhverfis endurskoðenda að þeirra mati hvað
varðar vinnutíma, álag og samræmingu vinnu við einkalíf.
Að mati Hrefnu eru kostirnir fyrst og fremst skemmtilegt og
fjölbreytt starf. „Auðvitað komu leiðinleg verkefni inn á milli
en maður vissi alltaf að þeim mundi Ijúka og þá tæki eitthvað
skemmtilegra við. Sveigjanlegan vinnutíma hef ég líka metið
sem verulegan kost enda höfum við haft þann háttinn á s.l. 17
ár að ég byrja vinnudaginn kl. 7 á morgnana og hef því verið
laus fyrr á daginn. Reyndar var það svo að þegar Kristján var
hættur störfum á endurskoðunarskrifstofu fór ég oftast aftur í
vinnuna um kl. 17 þegar hann kom heim frá vinnu. Ég hef líka
verið mjög heppin með mína vinnustaði þar sem ég hef átt
mjög góða vinnufélaga og vinnuaðstaða verið mjög góð."
Kristján var sammála þessu og gat þess að vinnutíminn
hafi geta verið nokkuð sveigjanlegur en aftur á móti hafi
vinnuálagið verið fullmikið á ákveðnum tímum rétt eins og í
öðrum störfum.
Hvernig sjáið þið starf endurskoðenda þróast í framtíðinni?,, Það
þarf að skipta endurskoðendum upp í tvo flokka eins og oft
hefur verið rætt um, annars vegar þá sem eru að endurskoða í
reynd og hins vegar þá sem eru í „ráðgjöf" og uppgjörsmálum"
er haft eftir Kristjáni. Hrefna telur að störf endurskoðenda
muni halda áfram að sérhæfast. Á þeim tíma þegar hún var
að byrja í faginu var ekki mikið um að lögfræðingar störfuðu á
stofum og voru því samskipti við skattstofur talsverður hluti af
starfinu. Starfið var því blanda af skattskilum, reikningshaldi og
endurskoðun. Þetta hefur gjörbreyst og á sjálfsagt enn eftir að
þróast til meiri sérhæfingar.
Hvernig er lífið utan vinnunnar hjá ykkur hjónum? „Fjölskyldan
og áhugamálin eru samtvinnuð. Við eigum 2 börn, 22 ára
gamlan son og 13 ára dóttur. Sonurinn æfði fótbolta með
Breiðablik til margra ára og síðan tók dóttir okkar við. Breiðablik
er því okkar félag auk þess sem við erum miklir aðdáendur
Skólahljómsveitar Kópavogs og þess góða starfs sem þar er
unnið. Öll fjölskyldan spilar golf og þykir okkur nauðsynlegt að
hafa golfsettin með í ferðalögum. Við erum heimakær og finnst
fátt betra en að halda okkur innan Kópavogsins."
Að þessum lokaorðum loknum kveður „blaðamaður" og
þakkar þeim heiðurshjónum fyrir ánægjulegt spjall.
Endurskoðandi eins og pabbi - feðgarnir Einar og Friðrik
Máltækið segir að það læra börnin sem fyrir þeim er haft. Skyldi
það vera svo í þeim tilfellum þar sem börn endurskoðenda
hafa farið að þeirra fordæmi og gerst endurskoðendur? Við
tókum feðga í endurskoðendastétt tali til að forvitnast um
þeirra hagi hvað þetta varðar. Á vegi okkar urðu þeir feðgar
Einar Sveinbjörnsson og sonur hans Friðrik Einarsson. Einar er
fæddur árið 1952 og fékk löggildingu sem endurskoðandi árið
1994, árið sem Friðrik var fermdur. Friðrik fékk löggildinguna
fyrr á þessu ári.
32 • FLE blaðið júlí 2010