Ráðunautafundur - 15.02.1991, Qupperneq 195

-187-
fram af meiri þunga neikvæðir eðliseiginleikar þessara gripa fyrir eiginleikum eins og
frjósemi, hreysti og kjötgæðum. Þess vegna verður greinilega vart vaxandi efasemda
um ávinning af áframhaldi slíkrar blöndunar í ýmsum löndum.
Margt bendir til að athygli okkar ætti fremur að beinast að nautgripakynjum í
nágrannalöndunum þar sem ræktunarstarf er byggt á alhliða vali með tilliti til margra
eiginleika. Samanburðarrannsóknir í Noregi á NRF gripum og blendingum af Friesian
stofnum frá Bandaríkjunum, Bretlandi og Kanada benda raunar til að þeir stofnar hafi
sáralitla eða enga yfirburði í afkastagetu til mjólkurframleiðslu.
Væri innflutningur til blöndunar við íslensku kýrnar áætlaður virðist því flest
mæla með að flutt væru inn frjóvguð egg frá Noregi eða Finnlandi og naut sem til
yrðu við slíkan innflutning yrðu prófuð í samanburði við íslensk naut. Þá er gert ráð
fyrir að leyfi fengist til að nota sæði úr slíkum gripum í landi. Sú reynsla sem þannig
fengist við afkvæmarannsókn á þessum nautum mundi nægja til að meta hver
ávinningur gæti verið af framhaldi slíkrar blöndunar við íslenska kúastofninn. Kæmi
í ljós að slíkur ávinningur væri mikill og augljós fyrir flesta eiginleika yrði vafalítið
valin sú leið í framtíðinni að taka upp skipulega blöndun með viðkomandi kyni.
Kæmi hins vegar í Ijós að ávinningur væri takmarkaður yrði líklega látið staðar numið
og haldið áfram markvissu ræktunarstarfi í íslenska kúastofninum sem á þennan hátt
hefði þá aðeins fengið góða blóðblöndun.
Að síðustu skal vitnað til umræðu frá Heimsráðstefnunni um búfjárkynbætur í
Edinborg á síðasta ári þar sem Kanadamennirnir C. Smith og E.B. Burnside veltu fyrir
sér þróun síðustu tveggja áratuga með sífellt aukinni notkun bestu nauta frá
Bandaríkjunum og Kanada í flestum helstu mjólkurframleiðslulöndum heims. Þeir
varpa fram þeirri spurningu hvort hugsanlegt sé að ræktunar- og framleiðslumarkmið
séu illa skilgreind í þessari búfjárgrein. Þeir virðast hafa miklar efasemdir um að
markmið og framleiðsluaðstæður geti verið það líkar í þessari framleiðslugrein í
mismunandi löndum að slík ræktun sé í raun hið rétta.