Dagblaðið Vísir - DV - 09.06.2017, Blaðsíða 69

fólk 45Helgarblað 9. júní 2017
Heppnasta fólk í heimi
Sumir hafa upplifað einstaka heppni eftir ótrúlega óheppni
L
ánið leikur við suma á meðan
ógæfan eltir aðra. Sumir hafa
hins vegar sérstakt lag á að
blanda þessu tvennu saman,
hafa gengið í gegnum mikla
erfiðleika en síðan upplifað ótrúlega
sigra í lífinu. Hér að neðan má finna
skemmtilegar sögur af fólki sem á
það sameiginlegt að hafa upplifað
ótrúlega heppni í lífi sínu. Þekkirðu
söguna af konunni sem vann fjórum
sinnum í lottóinu og manninum sem
lenti sjö sinnum í lífsháska áður en
hann vann 120 milljónir í lottóinu? n
Milljónavinningur
í beinni
Árið 1999, þegar Ástralinn Bill Morgan
var 37 ára, lenti hann í alvarlegu um-
ferðarslysi en þó ekki lífshættulegu.
Læknar gáfu honum lyf eftir slysið,
en heiftarleg ofnæmisviðbrögð urðu
til þess að hjarta hans sló ekki í heilar
fjórtán mínútur. Eftir að hafa legið í
dái í tólf daga vaknaði Bill og hófst
bataferlið í kjölfarið. En gæfa hans
endaði ekki þar. Hann bað kærustu
sinnar, Lisu Wells, og hún játaðist
honum. Nokkru síðar keypti Bill sér
skafmiða og vann splunkunýja bifreið
að verðmæti hátt í þriggja milljóna
króna. Þetta vakti athygli ástralskra
fjölmiðla og í sjónvarpsviðtali um
ógæfuna og gæfuna sem fylgdi á
eftir létu sjónvarpsmenn Bill skafa
skafmiða. Og hvað haldið þið? Bill
vann 250 þúsund ástralska dali, jafn-
virði hátt í 40 milljóna króna á gengi
dagsins í dag.
Vann fjórum
sinnum í lottóinu
Joan R. Ginther er líklega heppnasta kona
heims sé litið til þess að hún hefur fjórum
sinnum unnið þann stóra í lottóinu. Þessi
hrina ótrúlegrar gæfu hófst árið 1993 þegar
hún vann 5,4 milljónir Bandaríkjadala í
lottói í Texas í Bandaríkjunum. Áratug síðar
vann hún tvær milljónir dala, tveimur árum
síðar þrjár milljónir dala og árið 2008 vann
hún tíu milljónir dala. Ekki er vitað með vissu
hvernig Joan fór að þessu en sú staðreynd
að hún er fyrrverandi stærðfræðiprófessor
við Stanford-háskóla hefur fengið ýmsa
til að klóra sér í kollinum. Fann hún út hina
fullkomnu leið til að vinna í lottóinu eða var
þetta bara hrein og klár heppni?
Átti bókað flug
í bæði skiptin
Hollenski hjólreiðakappinn Maarten de
Jonge þakkar væntanlega æðri máttar-
völdum fyrir að vera enn á lífi. Hann átti
bókað sæti í flug MH370 með malasíska
flugfélaginu Malaysian Airlines þann 8.
mars árið 2014. Vélin, sem var á leið frá
Kúala Lúmpúr til Peking, hvarf af ratsjám
og veit enginn, enn þann dag í dag, hver
örlög vélarinnar urðu. Alls voru 239 manns
um borð í vélinni. Maarten breytti hins
vegar bókun sinni á síðustu stundu þar
sem hann vildi komast hjá því að vera yfir
nótt í Peking. Fjórum mánuðum síðar átti
Maarten einnig bókað flug með Malaysian
Airlines sem var á leið frá Amsterdam til
Kúala Lúmpúr. Þetta var flug MH17, en vélin
var skotin niður yfir Úkraínu með þeim af-
leiðingum að 298 manns fórust. Aftur hafði
Maarten breytt bókuninni á síðustu stundu
þar sem hann fann ódýrara flug. Maart-
en gerði ekki mikið úr þessu í viðtali við
hollenska fjölmiðla eftir að þetta spurðist
út. „Það sem kom fyrir allt þetta saklausa
fólk er hryllilegt, ég á mína sögu og vil halda
henni fyrir mig sérstaklega þar sem hún er
ekkert í samanburði við harmleikinn sem
svo margir eru að ganga í gegnum núna.“
Maðurinn sem neitaði að deyja
Króatíski tónlistarkennarinn Frane Selak hefur átt skrautlega ævi; hann hefur unnið
í lottóinu, dottið út úr flugvél, lifað af flugslys og alvarlegt lestarslys. Árið 1962 lenti
hann í alvarlegu slysi þegar hann var á leið í lest frá Sarajevo til Dubrovnik. Lestin fór
út af sporinu og steyptist ofan í ísilagða á. Sautján manns létust í slysinu en Selak
tókst við illan leik að komast í land, þjáður af ofkælingu og handleggsbrotinn. Aðeins
einu ári síðar datt hann út úr flugvél ásamt nítján öðrum þegar dyr á vélinni opnuðust
skyndilega. Nítján manns létust í slysinu en það var Selak til happs að hann lenti
á heysátu. Árið 1966 missti ökumaður rútu, sem Selak var farþegi í, stjórn á henni
með þeim afleiðingum að hún endaði úti í á. Fjórir létust í slysinu. Árið 1970 kom upp
eldur í bifreið hans. Selak tókst að koma sér út úr bílnum áður en eldurinn læsti sig
í eldsneytistankinn með þeim afleiðingum að hann sprakk í loft upp. Þá varð hann
fyrir strætisvagni í miðborg Zagreb árið 1995 en slapp án alvarlegra meiðsla. Ekki
löngu síðar vann hann 120 milljónir króna í lottói. „Ég hef aldrei sagt að ég hafi verið
heppinn að komast lífs af úr þessum slysum. Ég var hins vegar óheppinn að lenda í
þeim,“ sagði Selak eitt sinn í viðtali.
Lifði af tvær
kjarnorkusprengjur
Á tímum seinni heimsstyrjaldarinnar var
Japaninn Tsutomu Yamaguchi starfsmaður
Mitsubishi og þurfti oft að ferðast starfs
síns vegna. Einn örlagaríkan dag árið 1945
var Yamaguchi sendur til Hiroshima en svo
óheppilega vildi til að bandaríski herinn
varpaði kjarnorkusprengju á borgina þenn-
an sama dag, þann 6. ágúst. Yamaguchi
slasaðist í sprengingunni en lifði af. Hann
var feginn að komast heim til fjölskyldu
sinnar í Nagasaki eftir að ósköpin dundu
yfir, en skyndilega reið annað áfall yfir. Þann
9. ágúst var kjarnorkusprengju varpað á
Nagasaki en aftur komst Yamaguchi lífs
af. Eftir þetta varð hann ötull talsmaður
gegn kjarnorkuvopnavæðingu stórvelda
heimsins. Yamaguchi lést í hárri elli þann 4.
janúar árið 2010, 93 ára að aldri.
Blindur fær sýn
Árið 1980 varð óvenjulegt atvik sem
fær lækna og aðra sérfræðinga enn til
að klóra sér í kollinum. Málið varðar
hinn þá 62 ára gamla Edwin Robinson
sem búsettur var í Maine í Bandaríkj-
unum. Robinson hafði verið blindur
og heyrnarlaus í níu ár eftir að hafa
orðið fyrir höfuðmeiðslum. Þennan
örlagaríka dag árið 1980 var Edwin
staddur utandyra þegar gerði slæmt
veður. Það gekk á með þrumum og
eldingum og segir sagan að Edwin
hafi orðið fyrir einni. Hann er sagður
hafa legið meðvitundarlaus í tuttugu
mínútur áður en hann rankaði við sér
og staulaðist aftur heim. Þar lagðist
hann til svefns en þegar hann vaknaði
var hann kominn með heyrnina og
hluta sjónarinnar aftur.
Heppni Ef lífið væri keppni í heppni myndi þetta fólk bera sigur úr býtum.