Víkurfréttir - 22.05.2014, Blaðsíða 20

fimmtudagurinn 22. maí 2014 • VÍKURFRÉTTIR20
-Baráttan um Reykjanesbæ 2014 pósturu vf@vf.is
Gunnar Þórarinsson
oddviti Frjáls afls
Hver eru þrjú helstu málefni sem ykkar flokkur leggur
áherslu á fyrir þessar kosningar?
Þegar við rekum heimili þá þurfum við alltaf að hafa tvennt
í huga ef að erfiðlega gengur. Við þurfum að lækka útgjöld
og auka tekjur, það er algjört skilyrði. Þetta er það sem
við leggjum áherslu á í rekstri bæjarins, við viljum lækka
skuldirnar svo við höfum meira aflögu fyrir ýmis verkefni.
Við viljum auka atvinnuna og efla þar með tekjur bæjarins.
Þannig munum við, líkt og heimilin, fá meira í framtíðinni
til þess að ráðstafa fyrir ýmis verkefni eins og fyrir barna-
fjölskyldur og eldri borgara og alls kyns velferðarþjónustu.
Fjármálin hafa verið mikið í umræðunni, hvað hyggist
þið gera í þeim?
Staðan er auðvitað alvarleg hjá bæjarfélaginu. Við hyggj-
umst hagræða í rekstri það er númer eitt. Auk þess þurfum
við að auka tekjur bæjarfélagsins það er ljóst. Þar höfum
við mörg tækifæri. Við þurfum að forgangsraða verk-
efnum, þannig að þau verkefni sem eru nauðsynleg verði
í forgangi en hin sem eru bara æskileg, bíði betri tíma. Það
er eitthvað sem við verðum að huga að. Við verðum að
reka ábyrga fjármálastofnun, þannig að reksturinn sé helst
með einhverjum afgangi eða alla vega sjálfbær.
Atvinnumálin hafa verið fyrirferðamikil, hver er ykkar
stefna þar?
Við viljum stuðla að fjölbreyttu atvinnulífi sem skapar vel
launuð störf og dregur úr atvinnuleysi. Við viljum einbeita
okkur að raunhæfum verkefnum í stað þess að fara út um
víðan völl. Við sjáum fyrir okkur álverið, að það komi.
Það mun auðvitað skapa vel launuð störf í álverinu sjálfu.
Ekki síður störf sem eru afleidd. Ferðaþjónustan er auð-
vitað vaxtarbroddurinn sem við horfum til. Við verðum að
sinna grunnstoðunum í því kerfi og vinna með atvinnu-
lífinu þar, ferðaþjónustunni sjálfri.
Hvað um bæjarstjóramálin?
Við viljum ráða faglegan bæjarstjóra sem hefur þekk-
ingu og reynslu á sviði rekstrar og endurskipulagningu
skulda. Hann á ekki að koma úr röðum bæjarfulltrúa. Við
þurfum að gera vandaðar og raunverulegar fjárhagsáætl-
anir sem styðjast við raunveruleikann, í stað þess að vera
með óraunhæfar væntingar. Þetta eru auðvitað fjármunir
Reykjanesbæjar sem við förum með og við þurfum því að
vanda okkur við þetta og eyða ekki um efni fram.
Hver er ykkar skoðun á íbúalýðræði?
Við viljum auka gegnsæi eins og aðrir. Við sjáum fyrir
okkur að íbúar hafi kost á því að kynna sér efnin jafnóðum
í stað þess að gera það bara á fjögurra ára fresti. Við sjáum
líka fyrir okkur að það sé hægt að auka ýmsar kynningar
til íbúa, hvað varðar kostnað við verkefni og slíkt. Þá sjáum
við líka fyrir okkur grenndarkynningar, þegar um er að
ræða nýja íbúðabyggð eða breytingar á skipulagi, að þær
geti verið kynntar í gegnum þessa nýju tækni sem við
höfum.
Hvernig hefur kosningabaráttan gengið?
Við höfum auðvitað verið með vind í seglin. Ég sem smiður
veit að það er afskaplega mikilvægt að byggja þannig að
grunnurinn sé traustur og innviðir allir. Þetta höfum við
frambjóðendur listans haft að leiðarljósi í þessari baráttu.
Við viljum treysta grunninn og því verðum við að lækka
útgjöld bæjarins, sérstaklega með lækkun skulda og þar
með vaxtagjöldin. Við hvetjum auðvitað kjósendur til þess
að taka þátt í að skapa þetta heilbrigða samfélag sem við
viljum byggja á þannig að reksturinn batni. Með því að
kjósa Á-listann Frjálst afl, þá verður þetta að veruleika.
Kristinn Þór Jakobsson
oddviti Framsóknar
Hver eru þrjú helstu málefni sem ykkar flokkur leggur
áherslu á fyrir þessar kosningar?
Það er auðvitað að koma atvinnumálunum í gang. Með
því að koma þeim í gang þá fáum við þessa velferð sem
við öll viljum. Húsnæðismálin, það er í bígerð lagagerð
á Alþingi varðandi húsnæðismál þar sem sveitarfélögin
geta gengið inn í. Svo eru það umhverfis- og skipulagsmál.
Við viljum gera sorpeyðinguna ódýrari með því að flokka
betur sorpið. Hún er sú dýrasta á landinu hér í dag.
Fjármálin hafa verið mikið í umræðunni, hvað hyggist
þið gera í þeim?
Við þurfum að leysa til okkar allar eignir innan Eignar-
haldsfélagsins Fasteignar og fá betri vaxtakjör. Það eru
óhagstæðir vextir sem hvíla á þeim lánum, það bjóðast
mun betri vextir á markaði í dag. Við viljum koma þessum
atvinnumálum í Helguvík í gagnið, þá leysum við úr
ábyrgðum og kvöðum sem hvíla á bænum vegna hafnar-
innar. Við höfum fundið holu í aðfangakeðju Reykjanes-
bæjar þar sem við getum sparað alla vega 40-60 milljónir
á ári, með mjög góðri fjárfestingu.
Atvinnumálin hafa verið fyrirferðamikil, hver er ykkar
stefna þar?
Eins og ég hef sagt þá er það að koma Helguvík í gagnið.
Við verðum að nýta okkur tækifæri á Suðurnesjum, þar
sem er alþjóðlegur flugvöllur og fengsæl fiskimið í ná-
grenninu. Við þurfum að koma upp öflugri fiskvinnslu
og við höfum sett af stað hugmynd um fiskiþorp og
tengingu við ferðaþjónustuna þar sem hugsanlega gæti
verið vaxtarbroddur. Síðan er Geopark ómæld stærð í
ferðaþjónustu. Það eru síaukin tækifæri fyrir Suðurnesin
að blómstra í ferðaþjónustu og atvinnumálum.
Hvað um bæjarstjóramálin?
Flokkarnir hafa verið að rugla saman bæjarstjórakosn-
ingum og bæjarstjórnarkosningum. Við erum í bæjar-
stjórnarkosningum. Við göngum óbundin til kosninga.
Við viljum ráða bæjarstjóra á faglegum grunni og standa
vel að því.
Hver er ykkar skoðun á íbúalýðræði?
Framsókn í Reykjanesbæ var frumkvöðull að ung-
mennaráðinu. Við styðjum t.d. stofnun öldungaráðs. Við
viljum að íbúalýðræði verði virkt í gegnum hverfaráð, þar
sem haldnir eru 1-2 fundir á ári í hverfunum þar sem farið
er yfir verkefni og fjárhagsáætlun. Við viljum hætta þessu
eintali á íbúafundum, við viljum fara í alvöru íbúalýðræði.
Hvernig hefur kosningabaráttan gengið?
Við höfum sett saman alveg einstaklega öflugan hóp.
Svokallaðan fléttulista, þann fyrsta og eina í 20 ára sögu
Reykjanesbæjar, og þó víðar væri leitað. Við höfum öfluga
málefnaskrá sem við höfum unnið í samvinnu við íbúa og
hópinn líka. Við viljum meiri og betri Reykjanesbæ fyrir
okkur öll.
Árni Sigfússon
oddviti Sjálfstæðisflokks
Hver eru þrjú helstu málefni sem ykkar flokkur leggur
áherslu á fyrir þessar kosningar?
Mig langar til þess að íbúar íhugi hvaðan við komum.
Hvernig var staðan fyrir 10 árum? Hvernig var hún í um-
hverfismálum, menntamálum, hvað með atvinnumálin,
voru hér einhver pláss fyrir aldraða? Hver er staða heilsu-
gæslunnar? Við viljum styrkja heilsugæsluna og tryggja
að íbúar þurfi ekki að bíða í daga eða vikur eftir því að
fá heilsugæslu, því það er óþolandi. Við viljum styrkja
Hafnargötuna með betri bæjarstemningu og byggja á
þessari reynslu sem við höfum.
Fjármálin hafa verið mikið í umræðunni, hvað hyggist
þið gera í þeim?
Oft tala menn um það að eignir bæjarins séu allar seldar
en við erum enn í dag það sveitarfélag sem á mestar eignir.
Við erum með miklar skuldir en þær ætlum við að greiða
niður á sex árum, það getum við gert en það er vel innan
þeirra marka sem okkur eru sett. Fyrst og fremst ætlum
við að gera það án þess að auka skatta. Við getum einnig
haldið uppi góðri þjónustu án þess að auka gjöld á íbúa.
Atvinnumálin hafa verið fyrirferðamikil, hver er ykkar
stefna þar?
Ég held við getum notað orðið fjölbreytni. Við erum búin
að vera að vinna að því að byggja upp atvinnulífið eftir að
stærsti vinnuveitandi okkar fór. Auðlindagarðurinn úti á
Reykjanesi og sömuleiðis fiskeldið þar, einnig heilsuvöru-
verksmiðja sem er þar. Auk þess má nefna gagnaverin og
Keilir og hans uppbygging. Svo eru það öll stóru verkefnin
í Helguvík. Það er fjölbreytni en við þurfum vel launuð
störf fyrir almenning. Við erum ekki að byggja bara upp
einhver störf fyrir nokkra stóra atvinnurekendur.
Hvað um bæjarstjóramálin?
Ég er reiðubúinn að vinna áfram sem bæjarstjóri hér.
Ég er þakklátur fyrir þann stuðning sem ég fæ. Ég er
ánægður með það að uppbygging okkar í framtíðarsýn og
markvissri vinnu, hún fær stjórnsýsluverðlaun fyrir fagleg
vinnubrögð. Ég er afar sáttur með það.
Hver er ykkar skoðun á íbúalýðræði?
Ég held að fólk þekki það sem við höfum verið að gera
inni á heimasíðu bæjarins. Þar bjóðum við fólki að taka
þátt í ákvörðunum og þar má sjá hvernig við erum að
auka íbúalýðræði. Þar erum við með hugmyndir okkar
og höfum lagt fram tillögur og samþykkt tillögur. Við
erum með tillögur sem miða að því að fólk geti kosið
frekar. Núna erum við með skemmtilegar tillögur er
varða grunnskólana þar sem taka má þátt í rafrænum
kosningum um matarmálin. Við erum mjög hlynnt því
og teljum að framtíðin séu rafrænar kosningar um mjög
marga skemmtilega hluti.
Hvernig hefur kosningabaráttan gengið?
Mér finnst alltaf gott að hafa góða fótfestu í botninum.
Við finnum mikinn stíganda og erum spennt fyrir fram-
haldinu. Óneitanlega held ég að það sé mjög sérstakt
ástand hérna hjá okkur sjálfstæðismönnum. Við erum
búin að byggja upp á svo mörgum sviðum og ná svo
miklum árangri. Við erum í innsiglingunni og með ríkis-
stjórn sem er að vinna með okkur núna. Hvað gerist, þá
rofnar samstaðan. Það er í gegnum prófkjör sem haldið er
þar sem Gunnar Þórarinsson býður sig fram í 1. sæti en
fellur í 5. sæti. Hann nær ekki bindandi kosningu og er
boðið að taka 6. sætið sem er baráttusætið okkar, en hann
hafnar því og fer í nýtt framboð. Það er auðvitað mjög sér-
stök staða og ég bið íbúa að hugleiða það. Nú er þó stefnan
bara upp og áfram.
xDxÁ
xB
ODDVITARNIR SVARA