Víkurfréttir - 26.06.2014, Blaðsíða 14
fimmtudagurinn 26. júní 2014 • VÍKURFRÉTTIR14
Ragnheiður Sara Sigmundsdóttir er 21 árs Njarðvíkingur. Hún hefur alltaf verið frekar sterk að eigin sögn en aldrei fundið sig í
neinum íþróttum. Hún slysaðist inn í Crossfit fyrir ekki svo löngu og
hefur ekki litið um öxl síðan. Hún gerði sér lítið fyrir og sigraði sterkt
alþjóðlegt mót í París um síðustu helgi. Hún stefnir að því að skáka
Crossfit-drottningunni Annie Mist en eins heillar atvinnumennskan
hana á erlendri grundu. Hún er ríkjandi Hraustasta kona Íslands og
landsliðskona í ólympískum lyftingum.
Ætlar að ná Annie Mist
Sara byrjaði að mæta í ræktina
fyrir u.þ.b. fimm árum en hún fór
ekki að stunda Crossfit fyrr en í
september árið 2012. Margar æf-
ingarnar eru ansi krefjandi en Sara
segir að Crossfit snúist mjög mikið
um tækni og í raun geti hver sem
er framkvæmt Crossfitæfingar. „Þú
þarft að vinna þig hægt og rólega
upp í íþróttinni til þess að ná langt.“
Sara stefnir sjálf á toppinn í Cross-
fit en þar er Annie Mist Þórisdóttir
ríkjandi drottning. „Auðvitað ætla
ég að ná henni. Stefnan er sett á
heimsleikana á næsta ári. Mark-
miðin verða svo hærri eftir það,“
segir Sara kokhraust en aðeins
þeir þrír bestu frá Evrópu komast
á heimsleikana hverju sinni. Eins
og staðan er núna er Sara nærri því
að vinna sér sæti á heimsleikunum
en hún segist þurfa að bæta sig í
fimleikum. Sér til aðstoðar hefur
hún því fengið Evrópumeistarann
og Keflvíkinginn Heiðrúnu Rós
til þess að þjálfa sig. „Ég hef trú á
því að hún bjargi mér,“ segir Sara
og hlær.
Sara rekur
Crossfit Suður-
nes ásamt Andra Þór
Guðjónssyni kærasta sínum. Þau
hafa komið sér vel fyrir í Sport-
húsinu á Ásbrú og æfa þar af krafti
ásamt fjölda fólks. Leiðin inn
í Crossfit var þyrnum stráð Sara
hún vissi ekki af íþróttinni fyrr en
hún slysaðist til þátttöku. Á sínum
yngri árum stundaði hún sund en
þar fann hún sig ekki. Hún þreif-
aði fyrir sér í öðrum íþróttum en
fótaði sig hvergi. Sara tók þátt á
Boot camp námskeiði þegar hún
var 17 ára og var hæstánægð með
að ná fimm armbeygjum á tánum.
„Mér fannst ég vera svakalega
sterk, eina stelpan sem náði arm-
beygjum á tánum“ segir Sara og
hlær dátt. „Mér fannst leiðinlegt í
sundi þegar ég var yngri og fann
alltaf afsakanir til þess að mæta
ekki á æfingar. Ég hef alltaf verið
mjög sterk en aldrei fundið mig
í neinu áður,“ segir Sara sem þó
fann sig vel í íþróttum í leikfimi
en þar var hún yfirleitt sterkari en
aðrar stelpur.
Í landsliðinu í ólympískum
lyftingum
Nýlega byrjaði Sara að stunda
ólympískar lyftingar og hafnaði
hún í 3. sæti á Norðurlandamótinu
á dögunum. Hún komst í lands-
liðið í þeirri grein eftir að hafa
keppt á aðeins einu móti. Hún hélt
svo til Kýpur skömmu síðar og
hafnaði í 2. sæti á sterku Crossfit-
móti. Síðustu helgi gerði hún sér
lítið fyrir og sigraði alþjóðlegt mót
í Frakklandi þar sem margt öflug-
asta Crossfitfólk í Evrópu mætti til
leiks. „Ég er alltaf að bæta mig. Nú
er það bara að halda fyrsta sætinu.“
Einnig ber Sara titilinn Hraustasta
kona Íslands, en hún sigraði stiga-
keppni Þrekmótaraðarinnar árið
2013. Blaðamaður spyr hvor hún
telji sig standa undir því nafni „Já
ég er líklega ein af þeim,“ segir
hún með trega. „Ég stefni að því að
sigra þessa keppni aftur, vonandi
gengur það.“
Keppnisskapið kom fram í
Crossfit
„Ég er mjög mikil keppnismann-
eskja,“ segir Sara og hlær. Hún vissi
hreinlega ekki af keppnisskapinu
áður en hún fór að stunda Cross-
fit. „Það hjálpar vissulega til þess
að ná árangri en stundum verður
kappið of mikið.“ Það á sérstak-
lega við þegar hún og kærastinn
æfa saman. „Þá missi ég mig
stundum,“ segir Sara en hún þver-
tekur fyrir það að kærastinn eigi
roð í hana. Sara segist æfa tvisvar
á dag og auk þess er hún að þjálfa
Crossfit. Hún æfir ekki eins stíft
um helgar en hvíldin
er mikilvæg í hennar
augum. Andlegt ástand
er einnig mikilvægt í
þessari íþrótt. „Eftir því
sem reynslan verður meiri
þá verður auðveldara að
yfirstíga stressið. Einnig er
mikilvægt að borða vel fyrir
keppni, mataræðið er gífur-
lega mikilvægt,“ en Sara segir
félagsskapinn vera mikinn
styrk, enda styðji félagar hennar
vel við bakið á henni.
Finnur jafnan happapening á
flugvöllum
Sara hefur lent ítrekað í því að
finna smámynt á flugvellinum
þegar hún fer erlendis að keppa.
„Þetta er frekar ótrúlegt en ég trúi
ekki mikið á svona hjátrú, enda
fann ég í fyrsta skipti ekki pening
þegar ég fór til Frakklands, og þá
vann ég,“ segir hún og hlær. Sara
fór ekki með miklar væntingar
til Frakklands en hún hafði það
markmið að komast á verðlauna-
pall. „Ég ákvað bara að gefa allt í
botn þrátt fyrir að aðrar stelpur
þarna væru hugsanlega betri en
ég.“ Allt virtist ganga upp á mótinu
og Sara fagnaði sigri eins og áður
segir.
Stefnir í atvinnumennsku
Crossfitheimurinn er stór á heims-
vísu og íþróttin er ört vaxandi. Nú
er svo komið að Íslendingar eru
að koma sér á kortið sem atvinnu-
menn í Crossfit, en þangað stefnir
Sara. Hún er þegar komin á samn-
ing hjá stórum fæðubótaefnafram-
leiðanda sem sér um að styrkja
hana í keppnum erlendis. Íslensku
stelpurnar vekja jafnan athygli á
erlendri grundu og keppa oftast
sín á milli um sigra á alþjóðlegum
mótum. Þrjár þeirra eru þegar
komnar í atvinnumennskuna, en
ein þeirra er sú sem hafnaði í öðru
sæti á eftir Söru í Frakklandi á
dögunum. „Það er stefnan á næsta
ári að komast í atvinnumennsk-
una, það er bara þannig.“ Það er
óneitanlega sérstakt að konurnar
frá litla Íslandi séu í heimsklassa í
Crossfit. „Þeir segja að það sé eitt-
hvað í vatninu á Íslandi. Þetta er
alveg magnað en vinsældirnar hafa
aukist gríðarlega eftir að Annie
Mist sigraði á Heimsleikunum,“
segir Sara að lokum.
-íþróttir pósturu eythor@vf.is
Hraustasta kona
landsins er meðal
þeirra bestu í
Crossfit-heiminum
Fjölskylduíþrótt við Mánagrund:
Fjögur úr sömu fjölskyldu keppa á Landsmóti
■uLandsmót hestamanna fer fram við Hellu um næstu helgi. Fjórir
einstaklingar úr sömu fjölskyldunni munu keppa fyrir hönd Hesta-
mannafélagsins Mána; systkinin Ásmundur Ernir, Jóhanna Margrét
og Signý Sól Snorrabörn og Stella Sólveig Pálmarsdóttir, unnusta
Ásmundar. Signý Sól keppir í fyrsta sinn en hin hafa keppt töluvert
oftar. Á myndinni er hópurinn ásamt foreldrum systkinanna, Snorra
Ólafssyni og Hrönn Ásmundsdóttur. Sjónvarp Víkurfrétta tók viðtal
við þau sem frumsýnt verður á ÍNN kl. 21:30 í kvöld.
Krísa í Grindavík?
- Óskar Pétursson skammast sín fyrir spilamennskuna hjá Grindvíkingum
■uÞað er óhætt að segja að Grind-
víkingar hafi ekki staðið undir
væntingum í 1. deild karla í fót-
boltanum. Liðið var grátlega
nærri því að komast upp í Pepsi-
deildina í fyrra og í ár var búist við
þeim gulklæddu sterkari til leiks.
Þeir hafa einungis sigrað einn leik
af sjö þetta sumarið og sitja sem
stendur í næstneðsta sæti deildar-
innar og fallið blasir við. Grind-
víkingar eru að sjálfsögðu ekki af
baki dottnir en þeir hafa séð það
svartara. Markvörðurinn Óskar
Pétursson hefur háð margar fall-
baráttur í gegnum árin en hann
viðurkennir að Grindvíkingar séu
alls ekki í neinni óskastöðu.
„Það er hálfgerð krísa í Grindavík.
Þetta er afleit byrjun og það hefur
allt fallið á móti okkur. Við erum
þó fyrst og fremst búnir að spila illa
og ekki hægt að afsaka það,“ segir
Óskar hreinskilinn. Hann segir að
liðið hafi mætt tilbúið til leiks en
eitthvað virðist vera að hrjá leik-
menn. „Ég held að menn hafi mætt
tilbúnir í þetta mót. Það tekur á
þegar illa gengur, menn eiga erfitt
með að glíma við þetta. Við þurfum
að snúa blaðinu við, sýna karakter
og hífa okkur upp töfluna.“ Grind-
víkingar hafa sest niður og rætt
gengi liðsins. „Það var fyrst gert
eftir tapið í fyrsta leik. Okkur fannst
strax sem um krísu væri að ræða
þá,“ segir Óskar en hann horfir þó
á björtu hliðarnar. „Núna er ekkert
annað í stöðunni en að reyna að
finna gleðina á ný.“
Ætlum að gera hið ómögu-
lega og fara upp
Þeir sem fylgjast með fótbolta á Ís-
landi kepptust við að spá Grindvík-
ingum öruggu sæti í Pepsi-deild-
inni að ári. Grindvíkingar eru með
gríðarlega sterkan hóp og Óskar
veit af því.
„Það er skrítin tilfinning að vera
með besta hópinn í deildinni, að
mínu mati, og vera í næstneðsta
sætinu. Það er eitthvað að þegar
staðan er þannig. Við þurfum að
finna hvað er að og laga það ef ekki
á illa að fara.“ Enn er nóg eftir að
mótinu og ekki öll nótt úti fyrir
Grindvíkinga. Þeir ætla sér ennþá
sæti í deild þeirra bestu. „Við ætl-
um bara að gera hið ómögulega
og komast samt upp í úrvalsdeild.
Það er núna yfirlýst markmið. Við
þurfum að vona að mótið verði
jafnt og við fáum tækifæri til þess
að koma okkur inn í þetta aftur.“
Óskar segist ekki vita hvað hafi
breyst frá því í fyrra, þegar liðinu
gekk vel og var nærri því að komast
upp. Umgjörðin og stuðningurinn
við liðið sé ennþá til fyrirmyndar.
„Það eru allir í kringum klúbbinn
búnir að standa sig frábærlega og
umgjörðin er eins og best verður á
kosið á Íslandi. Maður hálfpartinn
skammast sín yfir því hvernig við
erum búnir að vera að spila. Þetta
er nánast vanvirðing við þá sem
eru búnir að standa með okkur. Við
erum þó öll saman í þessu, vinnum
saman og töpum saman,“ segir
Grindvíkingurinn að lokum.