Feykir - 05.01.2012, Blaðsíða 4
4 Feykir 01/2012
Skeifnaframleiðsla á Hofsósi
Kynslóðir málm-
smiða á Hofsósi
Fjólmundur Karl Bergland Traustason
hóf nýverið framleiðslu á skeifum en
hann hefur verið sjálfstætt starfandi
málmsmiður á Hofsósi frá því haustið
2008. Blaðamaður Feykis leit við í
verkstæði hans og ræddi við hann um þær
nýjungar sem eiga sér þar stað.
Upphaflega ætlaði Fjólmundur, eða Fjóli eins
og hann er jafnan kallaður, að verða þekktur
fyrir smíði á sterkum og léttum kerrum úr
áli. Hann hefur smíðað nokkrar hestakerrur,
snjósleðakerrur, fjór- og sexhjólakerrur og
litlar fólksbílakerrur. ,,Fólksbílakerrurnar
eru svona frúarkerrur þar sem þær eru svo
léttar að konurnar geta nánast rölt með þær í
garðverkunum,“ sagði Fjóli og hló. Hann sagðist
leiðast níðþungar kerrur og hefur lagt mikinn
metnað í smíði á léttum kerrum. „Það eru t.d.
ekki margar konur sem ná að hengja kerrur
aftan í bíla. Mér finnst óþolandi hvernig skröltir
í sumum kerrum og margar þeirra eru óttalegt
drasl. Svo er rík tilhneiging hjá fólki að ofhlaða
kerrurnar og þá endast þær stutt,“ sagði Fjóli og
hélt áfram: „Mig langaði að smíða léttar kerrur
sem bera mikla þyngd en endast samt lengi.
Þegar ég smíðaði fyrstu fólksbílakerruna var
miklum sigri náð þegar guttinn minn, þá fimm
ára, náði að lyfta henni upp og draga hana.“
Kreppan setti samt strik í reikninginn hvað
kerruframleiðsluna varðaði og hefur Fjólmundur
að mestu verið að fást við ýmiskonar nýsmíði og
viðgerðir, bæði fyrir sjávarútveginn og bændur í
nánasta umhverfi Hofsóss þó eru enn reglulega
pantaðar hjá honum kerrur. ,,Ég hef helst verið að
gera við og smíða t.d. fiskikassa úr áli, rekkverk
á báta og handfærarúllufestingar. Einnig hef ég
verið að útbúa báta fyrir netaveiðar. Bændurnir
hafa verið að kaupa hjá mér gjafahringi fyrir
heyrúllurnar og vinsælast núna eru rúllugreipar
til að setja aftan á dráttarvélarnar. Mér fannst
eins og einhverja hlyti að vanta svona og vatt
mér í að smíða nokkrar greipar,“ sagði Fjóli og
brosti.
Að sögn Fjólmundar eru smíðarnar sem hann
hefur verið að fást við að mestu árstíðabundnar
og oftast lítið að gera frá október fram í febrúar.
„Fólk þarf að vera svolítið hugmyndaríkt
til að finna sér verkefni á smærri stöðum á
landsbyggðinni, þar sem kannski er ekki úr
auðugum garði að gresja í atvinnutækifærum,“
sagði hann og bætti við: „Ég var búinn að vera að
melta með mér ýmsar hugmyndir að verkefnum
sem ég gæti gripið í þegar það væri rólegt að gera
í öðru, þar á meðal skeifnasmíði,“ sagði Fjóli og
hélt frásögninni áfram: „Þá hringdi Hannes
Friðriksson í Hestinum í mig og bauð mér að
kaupa tæki til skeifnaframleiðslu. Þar sem ég
hafði haft áhuga fyrir því um tíma ákvað ég að
stökkva í djúpu laugina og þáði það.“ Tækin
bárust í október sl. en að sögn Fjólmundar eru
afköst tækjanna góð eða um 400 skeifur á dag.
„Við erum saman í þessu ég og konan, Linda
Rut Magnúsdóttir. Við erum aðeins byrjuð að
framleiða skeifur og er stefnan að framleiða
flestar stærðir af þeim. Ég er með í kollinum
hvernig ég get smíðað skeifur með uppslætti
og er það á framtíðarplaninu ef allt gengur eftir.
Einnig hef ég hug á að smíða skafla,“ sagði Fjóli.
„Svo er sex ára guttinn minn í starfsþjálfun hjá
mér. Honum finnst öll þessi tæki og græjur voða
spennandi,“ sagði Fjóli og hló. Það má segja
að Fjólmundur hafi fengið smíðagenið í arf en
bæði faðir hans, Trausti Bergland Traustason
og afi, Fjólmundur Karlsson, voru málmsmiðir
en sá síðarnefndi stofnaði m.a. Stuðlaberg ehf. á
Hofsósi.
Um þessar mundir er Fjólmundur að þreifa
fyrir sér í skeifnamarkaðnum á Íslandi en áður
en Fjólmundur hóf framleiðslu var einungis eitt
annað fyrirtæki í þessum geira á landinu. /BÞ
Þorsteinsmót í bridge
Sveit Guðna Kristj-
ánssonar sigraði
Sveit Guðna Kristjánssonar
sigraði árlegt Þorsteinsmót
í bridge sem fór fram í
Félagsheimilinu á Blönduósi
þann 30. desember sl. Tíu sveitir tóku þátt í
mótinu sem hófst kl. 11 um
morguninn og lauk rúmum
átta klukkustundum síðar.
Samkvæmt vefmiðlinum huni.
is var keppnin spennuþrungin
frá upphafi til enda en sem fyrr
segir var það sveit Guðna
Kristjánssonar sem bar sigur
úr býtum með 142 stig og hlaut
farandbikarinn sem Knútur
Berndsen gaf hér árum áður.
Í öðru sæti varð sveit Jóns
Arnar Berndsen með 119 stig,
með sama sæti og stigafjölda
og í fyrra. Í þriðja sætir varð
sveit Gunnars Sveinssonar
einnig með 119 stig en Jón og
félagar unnu innbyrðis
viðureign þeirra. Í því fjórða
varð sveit Sigríðar Arnardóttur
með 117 stig og í því fimmta
sveit Suðurleiða með 115 stig.
Sem fyrr var það Stefán
Berndsen sem hafði veg og
vanda að mótinu. /BÞ
Hitaveita til Skagastrandar
Samningar við
Rarik undirritaðir
Sveitarfélagið Skagaströnd
og Rarik undirrituðu
samning um lagningu
hitaveitu til Skagastrandar
þann 30. desember sl.
Sveitarstjórn Skagastrandar
lítur á fyrirhugaða tengingu
við hitaveitu sem mikið
framfaraskref fyrir byggðina
og að með því opnist ýmsir
möguleikar fyrir fjölskyldur
og fyrirtæki auk
fyrirhugaðan sparnað í
orkukostnaði sem næst
með nýtingu jarðvarma til
húshitunar.
Samkvæmt heimasíðu
Sveitarfélagsins Skagastrandar
mun Rarik leggja stofnæð og
dreifiveitu um byggðina á
Skagaströnd og tengingu við
hitaveitu Blönduóss.
Sveitarfélagið greiðir fast gjald
til Rarik en með framlagi
sveitarfélags og sérstöku
framlagi á fjárlögum ríkisins
hefur arðsemi af veitunni verið
tryggð.
Þegar framkvæmdum lýkur
verður um eina veitu að ræða
með veitusvæði sem nái yfir
það svæði sem hitaveitan á
Blönduósi gerir nú ásamt því
sem við bætist með lagningu
hitaveitunnar til Skagastrandar.
Þar af leiðandi verður ein
gjaldskrá fyrir allt veitusvæðið.
Pípukerfi fyrir ljósleiðara
Gert er ráð fyrir að fyrstu hús
munu tengjast veitunni haustið
2013 og að öll hús hafi
möguleika á tengingu haustið
2014. Rarik hefur þegar boðið
út efni til veitunnar og mun í
framhaldi af gerð samningsins
staðfesta pöntun á efni.
Verklegar framkvæmdir verða
boðnar út á nýju ári og munu
skiptast í þrjá megin verkhluta:
Lagningu nýrrar stofnæðar
frá Reykjum að Blönduósi sem
verði unnin á árinu 2012,
lagningu stofnæðar frá
Blönduósi til Skagastrandar á
fyrri hluta árs 2013 og
lagningu dreifikerfis um
byggðina á Skagaströnd
sumarið og haustið 2013.
Sveitarstjórn Skagastrandar
hefur samið um að lagt verði
pípukerfi fyrir ljósleiðara
samhliða lagningu hitaveit-
unnar og opnar það nýja
möguleika í framtíðinni á
flutningi stafrænna gagna fyrir
heimili og fyrirtæki sem
tengjast veitunni. /BÞ
Sveit Guðna Kristjánssonar með farandbikarinn frá Knúti Berndsen. Mynd: huni.is