Feykir - 16.02.2012, Blaðsíða 8
8 Feykir 07/2012
Heilir og sælir lesendur góðir.
Það er Pétur Stefánsson sem á fyrstu vísuna
að þessu sinni.
Loks í svefn er sólin skriðin
sorti kvöldsins við mér gín.
Enn einn dagur er nú liðinn
alltaf styttist jarðvist mín.
Tvær vísur koma hér í viðbót eftir Pétur og er
hann þar að kunna fótum sínum forráð eins
og stundum er komist að orði. Hefur ekki af
veitt eins og illviðrin hafa geisað á þessum
vetri.
Á Elöntru ég eins og hetja
ek um götur laus við skrekk.
Undir hana ætla að setja
alveg glæný nagladekk.
Oft í hálku og illskubyl
ók ég huga þöglum.
Helst í dekkjum hafa vil
haug af góðum nöglum.
Hressileg umræða hefur verið nú undanfarið
um svokallað iðnaðarsalt. Ágúst Marinósson
víkur að því í næstu vísu.
Landanum sýnist mér sama um allt
sagan nú kallar fram tárin.
Fólk hefur notað hér sorasalt
síðustu þrettán árin.
Eins og margir vita var kjaftað frá því fyrir
margt löngu síðan að konan hefði verið búin
til úr einu rifi Adams. Miðað við umræðu
síðustu daga er hægt að notast við fleira til
að fullkomna það sköpunarverk í dag. Ágúst
yrkir.
Úr einu rifi er engin von
íturvaxið fljóð að panta.
Sjálfsagt þarf hér sílikon
og sitthvað fleira myndi vanta.
Karlakórinn Heimir í Skagafirði hélt
að vanda stórglæsilega janúartónleika
í Miðgarði. Morguninn eftir ennþá í
sæluvímu eftir kvöldið orti einn kórfélagi
Þorleifur Konráðsson frá Frostastöðum svo.
Æskusvipinn enn ég ber
engrar slæmsku kenni.
En Kolli bróðir orðinn er
eins og gamalmenni.
Eins og kunnugir vita eru þeir Þorleifur og
Kolbeinn tvíburar og svo líkir að erfitt hefur
verið mörgum að þekkja þá í sundur. Má
með ólíkindum vera ef annar hrörnar svo á
undan hinum.
Kristbjörg Bjarnadóttir áður bóndi í
Litlu-Brekku í Skagafirði orti næstu vísur
sem hún kallar Höfðstrendingavísur. Eru
þær gjarnan sungnar á þorrablótum í
Hofshreppi hinum forna.
Hressir syngja Höfðstrendingar
hittast enn á góðum stað.
Vísnaþáttur 564
Lyfta glasi, gleyma þrasi.
Gott ef allir kynnu það.
Eigum stundar endurfundi.
Eyðum trega, gleymum sorg.
Þegar mætumst þá við kætumst.
Þá er glatt í Höfðaborg.
Föstum höndum félagsböndin
finnum við og treystum nú.
Hvað sem gerum, öll við erum
alltaf vinir ég og þú.
Fyrir skömmu var hringt í mig úr Skagafirði
og ég spurður um vísu sem ég kannaðist við,
en mundi alls ekki neitt um. Bað um að fá
hana senda á prenti og hefur hún nú borist
mér. Fljótt er frá því að segja að eftir nokkra
umhugsun tel ég mig vita fyrir nokkuð víst
að höfundur hennar sé Gunnar Thoroddsen
fyrrverandi alþingismaður og ráðherra. Bið
lesendur að hafa samband ef þeir telja sig vita
betur. Er samt ekki til í að bakka með mína
fullyrðingu nema að vel athuguðu máli.
Að vera eða vera ekki
orti William Shakespeare forðum.
Að vera eða vera ekki
er vinstri stjórn í fáum orðum.
Játað skal að næsta vísa hressir undirritaðan
vel á þessum djöfuls vetri. Höfundur
er Kristján Runólfsson sem áður bjó á
Sauðárkróki, og gladdi þá oft vísnavini með
sínum yrkingum.
Nú skal taka upp nýjan sið
næring brúka þekka.
Flöskustútinn fitla við
fara svo að drekka.
Ekki þarf formála fyrir þessari vísu Kristjáns.
Ber á vanda, bensín hækkar
brátt er fjandinn laus.
Hér á landi fólki fækkar
flestir standa á haus.
Kristjáni grunar að bráðum fari í gang
umræða um skattframtal.
Ég mun gera sköttum skil
skulda forðast þrætur.
Þó mig dreymi og dæmast vil
í dráttavaxtabætur.
Einn af góðum sonum Skagafjarðar, Ólafur
R. Ingimarsson sem starfaði um áratug
sem læknir á Sauðárkróki og er mörgum
kunnur af eldri Skagfirðingum, mun afa ort
svo fallega er hann kvaddi Skagafjörðinn og
flutti suður.
Þótt firði Skaga frá ég aki
fegri aldrei lít ég sveit.
Allar góðar vættir vaki
vinir yfir þessum reit.
Leita til ykkar lesendur góðir eftir fleiri
vísum eftir þennan ágæta hagyrðing.
Verið þar með
sæl að sinni.
/ Guðmundur
Valtýsson
Eiríksstöðum,
541 Blönduósi
Sími 452 7154
( GUÐMUNDUR VALTÝSSON )
Umsjón: Krista Sól og Eyvör Pálsdóttir 4. bekk :: Viðtöl tekin 14. febrúar í Árskóla á Sauðárkróki
Krakka-hoornið
Hvað heitir þú?
Vilberg.
Hvað ertu gamall/gömul?
9 ára.
Ertu í íþróttum?
Já, ég er í skólasundi.
Hvað finnst þér skemmtilegast að gera?
Mér finnst skemmtilegast að spila fótbolta.
Hver er uppáhalds maturinn þinn?
Hamborgari er bestur.
Hver er uppáhalds sjónvarpsþátturinn þinn?
Ég veit það ekki.
Áttu gæludýr?
Já, kött sem heitir Prinsessa.
Hvað heitir þú?
Inga Vala.
Hvað ertu gömul?
9 ára.
Ertu í íþróttum?
Ég er í skólasundi.
Hvað finnst þér skemmtilegast að gera?
Leika mér.
Hver er uppáhalds maturinn þinn?
Humar.
Hver er uppáhalds sjónvarpsþátturinn þinn?
So Random á Disney-stöðinni.
Áttu gæludýr?
Já, tvo hunda sem heita Igor og Bella.
Hvað heitir þú?
Telma Björk.
Hvað ertu gömul?
14 ára.
Ertu í íþróttum?
Já, ég spila fótbolta.
Hvað finnst þér skemmtilegast að gera?
Skemmtilegast að spila fótbolta og syngja.
Hver er uppáhalds maturinn þinn?
Hakk og spagetti.
Hver er uppáhalds sjónvarpsþátturinn þinn?
Mike and Molly.
Áttu gæludýr?
Já, ég á fiska.
Hvað heitir þú?
Guðrún Emelía.
Hvað ertu gömul?
9 ára.
Ertu í íþróttum?
Já, ég er í skólasundi.
Hvað finnst þér skemmtilegast að gera?
Mér finnst skemmtilegast að teikna.
Hver er uppáhalds maturinn þinn?
Pizza.
Hver er uppáhalds sjónvarpsþátturinn þinn?
Söngvakeppnin er skemmtilegust.
Áttu gæludýr?
Já, ég á kanínu.