Feykir - 16.02.2012, Blaðsíða 10

10 Feykir 07/2012
Ef þú hefur ekki efni á að kaupa það
þá smíðar þú það bara
Stærsta hjólhýsi
landsins
Í stórri skemmu í iðnaðarhverfinu á Sauðárkróki er verið að
smíða - að öllum líkindum - stærsta hjólhýsi landsins en við
það dunda þau sér, Helga Eyjólfsdóttir og Jóhann Þórðarson.
-Ég hafði ekki efni á að kaupa mér þetta, sagði Jói þegar
hann var spurður af hverju hann tók sig til við að smíða gripinn.
Hjólhýsið er engin smásmíði, 12 metra langt, sett saman úr
venjulegu hjólhýsi, sem hafði orðið fyrir tjóni og keypt af
tryggingafélagi, og viðbættum nokkrum heimasmíðuðum
metrum. Í framhlutanum sem er sá heimagerði verður pláss
fyrir 4-5 mótorhjól en fjölskyldan er mikið í mótorsporti. Hinn
hlutinn verður notaður á hefðbundinn hátt. Ef að líkum lætur
mun vagninn hljóta verðskuldaða athygli vegfarenda enda á
útlitið eftir að verða glæsilegt. Þar kemur Ýrr Baldursdóttir
helsti airbrush listamaður þjóðarinnar til sögunar en hún glæðir
vagninn ótrúlegu lífi með glæsilegum myndum sem hún málar
eða sprautar á vagninn. Ýrr hefur haldið námskeið víðs vegar
um heiminn og breitt út boðskapinn ef svo má segja og er vel
þekkt fyrir sína listsköpun. –Það er ekkert rosalega mikið að gera
í þessu á Íslandi, en þetta er stærsta verkefni sem ég hef fengið
hingað til og líklega það stærsta sem ég á eftir að fá, segir hún.
En af hverju hauskúpur? –Þær eru svo flottar, segja þau Jói og
Ýrr samtímis og ekki er annað hægt en að vera sammála því. /PF
Kvennakórinn Sóldís
Sungið á alþjóð-
legum nótum
Kvennakórinn Sóldís heldur fyrstu
tónleika sína á árinu í Miðgarði
á konudaginn, sunnudaginn 19.
febrúar nk. Kórinn hefur æft stíft
frá áramótum til að undirbúa sig
fyrir tónleikana og leit blaðamaður
Feykis inn á æfingu hjá kórnum
á dögunum og náði þar tali af
þremur stofnendum kórsins,
þeim Drífu Árnadóttur, Írisi Olgu
Lúðvíksdóttur og Sigurlaugu
Maronsdóttur.
Kórinn hefur verið starfandi í hálft
annað ár en hann var stofnaður af
þeim stöllum þann 2. júní 2010,
við eldhúsborðið á Uppsölum.
„Fljótlega vorum við komnar með
æfingarhúsnæði, undirleikara, hann
Rögnvald Valbergsson og söngstjóra,
hana Sólveigu S. Einarsdóttur. Þá
vantaði okkur bara konur í kórinn og
auglýstum,“ útskýra þær og bæta við
að viðtökurnar hafi aldeilis ekki staðið
á sér því kórinn samanstendur af um
40 konum. „Aðeins fimm æfingum
seinna héldum við okkar fyrstu tón-
leika hér í Miðgarði á Kvennafrídeg-
inum haustið 2010, þar sem við
sungum fimm lög,“ segir Sigurlaug.
Flestar konurnar koma úr Skagafirði
en einnig úr Austur-Húnavatnssýslu
en þaðan er einmitt söngstjórinn Sól-
veig og starfar sem kirkjuorganisti
Blönduóskirkju og kennari við tón-
listarskóla A-Hún. „Við erum rosalega
heppnar að hafa hana með okkur.
Hún er mikil fagmanneskja, jákvæð,
drífandi og óhemjudugleg,“ segja þær
í kór og bæta við að þær væru ekki
komnar svona langt á veg ef ekki væri
fyrir hana.
Æfingar hófust snemma í haust
en kórinn tekur sér frí frá æfingum í
desembermánuði. „Við höfum haft
þann háttinn á að við tökum tarnir og
svo frí á milli,“ segir Íris og bætir þá
Drífa við að þær séu ekki að blanda sér
í jólaösina.
Kórinn er með alþjóðlegt þema
í vetur, í bland við íslenska tónlist og
syngja á tíu tungumálum. „Í fyrra
sungum við á fimm tungumálum og
það var einskonar áskorun að bæta
nokkrum tungumálum við,“ segja þær
og hlægja, en lögin sem þær syngja
eru á frönsku, spænsku, finnsku,
rússnesku, hebresku, svahílí, latínu,
ensku, sænsku og íslensku. „Sum
lögin eru miklir tungubrjótar og hefur
verið krefjandi að læra þau en við
erum að fínpússa þetta núna,“ segir
Drífa. Erfiðast segja þær hafa verið
að ná tökum á rússnesku og finnsku
lögunum. Franskan og svahílí voru að
þeirra sögn ekkert mál og spænskan er
ljúf og mjúk á tungu.
Tónleikarnir hefjast kl. 15 í
Miðgarði á konudaginn og verður
einnig boðið upp á kaffihlaðborð.
„Þá verður tilvalið fyrir karla að bjóða
konum sínum á tónleika í tilefni
dagsins,“ segja þær en miðaverð verður
hið sama og í fyrra, kr. 2500. Þess má
geta að Menningarráð Norðurlands
vestra styrkir tónleikana. Í mars ætlar
kórinn að leggja land undir fót og
halda tónleika í Laugaborg í Eyjafirði
og Breiðumýri í Þingeyjarsveit. Einnig
stefnir kórinn á tónleika Blönduósi. Í
apríl ætlar hann svo sér að halda fleiri
tónleika í héraði. /BÞ