Feykir - 29.03.2012, Blaðsíða 6
6 Feykir 13/2012
VIÐTAL Berglind Þorsteinsdóttir
Með mörg
járn í eldinum
Stefán Gísli og Unnur reka Menningarhúsið Miðgarð
Stefán Gísli Haraldsson og
Unnur Gottsveinsdóttir tóku
nýverið við rekstrinum á
Menningarhúsinu Miðgarði
í Varmahlíð og gegna því
mikilvæga hlutverki að
halda utan um fjölbreytta
viðburði og tónleika í þessum
rótgróna menningar- og
skemmtistað Skagfirðinga.
Blaðamaður Feykis leit við
hjá parinu unga í nýreistu
húsi þeirra í Brautarholti
og fræddist lítið eitt um þau
sjálf, þau krefjandi verkefni
sem framundan eru og áform
þeirra í framtíðinni.
Stefán Gísli er Skagfirðingur
í húð og hár, sonur hjónanna
Haraldar Stefánssonar og
Ragnheiðar G. Kolbeins,
loðdýra og sauðfjárbænda í
Brautarholti. Brautarholt er
rétt fyrir utan Varmahlíð og
þar gekk Stefán Gísli í skóla
og síðar í Fjölbrautarskóla
Norðurlands vestra, þar sem
hann lauk nýverið námi af
tréiðnabraut. Hann hefur í
gegnum tíðina unnið við ýmis
störf, m.a. vörubílaakstur
og vélavinnu og mikið við
smíðar í seinni tíð. „Svo hef ég
verið að vinna við ýmiskonar
búskaparstörf. Ég hef verið að
vinna við minkinn frá því ég
var ungur, svo hef ég verið að
mjólka fyrir einn mann hér
í sveit, séð um kindur fyrir
annan, verið í fjárflutningum
og margt fleira – já, það er alltaf
nóg að gera,“ segir Stefán Gísli
og brosir. Unnur tekur undir:
„Ég held hann hafi verið með
átta vinnuveitendur í fyrra,“
segir hún og hlær.
Unnur er fædd og uppalin í
Mosfellsbæ en foreldrar hennar
eru Gottsveinn Gunnlaugsson
rafvirki og Jónína Guðný
Árnadóttir þroskaþjálfi. Sem
stelpa var hún í Varmárskóla
og svo í Menntaskólanum við
Sund.
Hvernig lágu leiðir þínar í
Skagafjörð? „Ég fór í skíðaferð
til Ítalíu ásamt foreldrum
mínum árið 2008 og hitti þar
Svanhildi Pálsdóttur, eiganda
Hótels Varmahlíðar. Það
barst í tal að ég væri á leið til
Austurríkis að vinna á hóteli
seinna um árið og þá bauð
Svana mér vinnu á hóteli
sínu um sumarið og ég þáði
það,“ svaraði Unnur. „Við
strákarnir í sveitinni kíkjum
stundum á hótelbarinn á
kvöldin yfir sumartímann og
þar hitti ég Unni,“ bætir Stefán
Gísli við kankvís á svip. Eftir
sumarið hélt Unnur svo út til
Austurríkis en snéri fljótlega
aftur til Varmahlíðar og settist
alfarið að vorið 2009. Um
haustið hóf hún svo nám í
ferðamálafræði við Háskólann
á Hólum og vinnur nú að
lokaritgerð sinni og stefnir á að
útskrifast í vor.
Vilja virka og
fjölbreytta starfsemi
Þegar Stefán Gísli og Unnur
sáu auglýst eftir rekstraraðilum
á Miðgarði langaði þau strax
að sækja um. „Það kom
einhvernvegin aldrei neitt
annað til greina, þetta hentaði
okkur svo rosalega vel og við
töldum okkur vel geta tekið
við þessu,“ segir Stefán Gísli og
bætir við að þetta falli einnig
vel að því sem Unnur hafi verið
að læra í ferðamálafræðinni,
t.d. hvað snýr að því að
finna sóknartækifæri í
tengslum við ferðamennsku
á svæðinu, markaðssetningu
og skipulagningu á litlum
eða stórum viðburðum. Þá sé
tvímælalaust kostur að búa
svo stutt frá Miðgarði og geta
skotist með stuttum fyrirvara
ef svo ber undir og ekki sé verra
að vera uppalinn á svæðinu og
þekkja vel til fyrirtækja og íbúa
svæðisins. „Okkur fannst þetta
mjög spennandi verkefni og
bjóða upp á mikla möguleika,“
segir Unnur.
Þrír aðilar sóttu um
reksturinn á Miðgarði auk
Stefáns Gísla og Unnar, en eftir
að ákvörðun hafði verið tekin
um að það félli í þeirra hlut,
hófst að þeirra sögn þónokkur
skipulags- og pappírsvinna
sem hefur gengið mjög vel.
„Það er búið að vera rosalega
mikið um að vera í Miðgarði frá
því við tókum við rekstrinum
og við erum að komast inn í
þetta,“ segir Stefán Gísli. „Hér
hafa verið haldnir allskonar
viðburðir, eins og leiksýningar,
tónleikar, þorrablót, árshátíðir
og ýmsir lokaðir viðburðir. Svo
styttist í Sæluviku en þá verður
mjög margt í boði,“ segir
Unnur og bætir við að einnig
sé verið að bóka húsið undir
menningarviðburði utan frá,
t.d. stefnir Karlakór Dalvíkur
á að halda þar spennandi
rokktónleika þann 19. maí og
Gospelkór Akureyrar tónleika