Feykir - 29.03.2012, Blaðsíða 10
10 Feykir 13/2012
Landhelgisgæslan á Króknum
Skutla stýrimanninum heim
Ægir, varðskip Landhelgisgæslunnar,
lagði að bryggju á Sauðárkróki sl.
föstudag og héldu svo út á fjörðinn
síðar um kvöldið og héldu þar
björgunaræfingu á sjó, ásamt
þyrlu Landhelgisgæslunnar. Þegar
blaðamaður Feykis spurði skipsmenn
í hvaða erindagjörðum þeir væru þá
svöruðu þeir: „Við erum að skutla
stýrimanninum heim til konu sinnar
og barna,“ sögðu þeir og hlógu en sá
heitir Pálmi Jónsson og er fæddur og
uppalinn á Króknum.
Blaðamaður Feykis fékk að líta inn
í brúnna og hitti þar fyrir skipstjórann,
Einar H. Valsson og sagði hann
góðfúslega frá störfum gæslunnar og
hvað þeir hafa fyrir stafni um þessar
mundir. „Það er komið svo langt síðan
við komum hingað á Krókinn síðast að
það var kominn tími til að koma hér
við,“ segir Einar og bætir við að þeim
finnst nauðsynlegt að reyna að koma
sem oftast við í hinum ýmsu höfnum
landsins til að sýna sig og sjá aðra og
til að halda tengslum. Ægir kom síðast
á Sauðárkrók þegar skipið átti að flytja
ísbjörninn, sem hingað kom á land árið
2009, til Grænlands en ekkert varð þó úr
því. „Við erum í ýmsum verkum,“ segir
Einar og brosir. „Ég man þegar ég var
messadrengur á Tý og við vorum fengnir
til að flytja rostung til Grænlands.
Hann hafði flækst suður til Hollands og
einhverjir náttúruverndarsinnar tóku
sig saman og sendu hann með flugi til
Keflavíkur og þaðan sigldum við með
hann til Grænlands.“
Fjölbreyttar æfingar í Skagafirði
Á föstudagsmorgun voru kafarar land-
helgisgæslunnar, sem starfa um borð í
Ægi, við æfingar við Lundey. „Þeir voru
að reyna að hafa upp á skipsflaki sem
sökk við Lundey árið 1930 en það voru
miklir straumar og hafðist það því ekki
að þessu sinni,“ segir Einar.
Sem fyrr segir ætlaði skipið svo að
halda út aftur um kvöldið til að halda
björgunaræfingu á sjó, ásamt þyrlu
gæslunnar. Þá ætluðu þeir að stunda
sigæfingar með notkun nætursjónaauka
en að sögn Einars eru slíkar æfingar
haldnar reglulega, eða a.m.k. á 2-3
mánaða fresti, þar sem slík björgun
er vandasöm og nauðsynlegt að halda
kunnáttunni við. /BÞ
Leiksýning 10. bekkjar Árskóla í Bifröst
Sérlega vel
heppnuð
leiksýning
Leiksýning um Ronju Ræningjadóttur var til
sýningar í Bifröst í síðustu viku og þegar blaða-
maður Feykis fór á leiksýninguna var salurinn
fullsetinn af börnum sem nutu sýningarinnar til
hins ýtrasta. Krakkarnir ýmist hlógu eða iðuðu af
eftirvæntingu eftir því hvernig sögunni vatt fram.
Leiksýningin var í uppfærslu 10. bekkjar Árskóla,
undir leikstjórn Guðbrands Ægis Ásbjörnssonar
og var hún sérlega vel heppnuð. Leikarar stóðu sig
með prýði og voru afar sannfærandi, leikmynd og
búningar voru einnig mjög flottir og fagmannlega
unnir. Allt small vel saman og greinilegt að allir sem
að leikritinu komu skemmtu sér vel, ekki síður en
gestirnir. /BÞ