Feykir - 18.04.2012, Blaðsíða 5

15/2012 Feykir 5
Telma Magnúsdóttir varaþingmaður Norðvesturkjördæmis
Sérstakir dagar á Alþingi
Telma Magnúsdóttir frá
Steinnesi í Húnavatnssýslu tók
sæti á Alþingi þann 27. mars
sl. en hún var varamaður fyrir
Lilju Rafneyju Magnúsdóttur,
sem þá var stödd erlendis.
Telma er ferðamálafræðingur
og hefur starfað með Vinstri
grænum í nokkur ár. Telma
deildi reynslu sinni með
blaðamanni Feykis af veru
sinni á Alþingi Íslendinga
og upplifun sem hún segir
bæði hafa verið jákvæða og
neikvæða í senn.
„Ég tók aðeins sæti í fjóra
daga og það var svolítið sérstakt
að vera í svo stuttan tíma, kynna
sér málin eins vel og hægt var
en vita um leið að maður myndi
ekki fylgja þeim eftir í gegnum
þingið. Þetta var fyrst og
fremst mjög spennandi og góð
kynning á því hvernig Alþingi
gengur fyrir sig og hvernig starf
þingmannsins er. Ég myndi
segja að ég væri reynslunni
ríkari jafnvel þó að setan væri
stutt,“ segir Telma en henni
var boðið sætið með mjög
stuttum fyrirvara. „Ég fékk
símtal í byrjun vikunnar þar
sem að varaþingmann vantaði
fyrir Lilju Rafneyju. Halldóra
Lóa, sem er 1. varaþingmaður,
var að hugsa málið og ég var
beðin um að taka þetta að mér
ef hún kæmist ekki,“ útskýrir
Telma. „Ég var í fæðingarorlofi
og fyrirvarinn mjög stuttur svo
ég þurfti aðeins að hugsa málið.
Þegar ég svo sá fram á að hafa
pössun fyrir peyjann þá ákvað
ég að sjálfsögðu að taka þetta
að mér - enda kosin til þess.
Ákvörðunina tók ég snemma á
þriðjudagsmorgun og var mætt
á Alþingi um hádegi sama dag.“
Hélt jómfrúarræðu
um sín hjartans mál
Telmu hafði áður verið boðið
varaþingmannssæti en var
þá kominn á steypinn, eins
og hún lýsir því sjálf, og baðst
þá frá því. „Ég satt að segja
bjóst ekki við því að tækifærið
byðist aftur en ég er auðvitað
2. varaþingmaður svo það gat
alltaf komið til. Við eigum þrjá
menn inni úr þessu kjördæmi,
reyndar einn framsóknarmann
í dag, svo líkurnar eru frekar
miklar á að varaþingmenn þurfi
að hlaupa í skarðið af og til.“
Þó svo Telma hafi lítið
verið að vasast í stjórnmálum
síðasta árið, þar sem hún
var í fæðingarorlofi með
litla drenginn sinn, hafi hún
dottið í gírinn um leið og hún
tók sæti á þinginu og fékk
að koma skoðunum sínum
á framfæri. „Þetta gekk bara
nokkuð vel, ég hélt mína
jómfrúarræðu þar sem ég
fékk tækifæri á að tala um
mitt hjartans mál, náttúruna
og rétt hennar,“ segir hún
og bætir við að hún hafi þar
að auki fengið tækifæri á
að koma skoðunum sínum
á framfæri varðandi ýmis
mál og senda inn skriflegar
fyrirspurnir um mál sem varða
kjördæmið, ferðaþjónustu og
náttúruvernd. Þau mál sem
henni fannst nauðsynlegt að
vekja ráðherra til umhugsunar
um og að fá skýr svör við.
„Ég átti reyndar við smá
byrjunarörðuleika að etja. Ég
gat með engu móti hækkað
stólinn minn þegar ég tók
mér sæti í þingsalnum fyrsta
daginn, hann var fastur í lægstu
stöðu svo ég mátti leggja mig
alla fram um að teygja úr
búknum til að ég næði upp á
borðið til þess að skrifa undir
drengskaparheitið,“ segir Telma
og hlær. Að öðru leiti segir hún
þetta hafi í stórum dráttum
verið eins og hún hafði búist
við en þó kom stöðugt eitthvað
á óvart. „Ég fékk að upplifa ansi
sérstaka daga á Alþingi þar
sem tvö mikilvæg mál voru
í vinnslu, sjávarútvegurinn
og stjórnarskráin. Þingfundir
stóðu langt fram á nætur,
óvæntar atkvæðagreiðslur og
atkvæðagreiðslur sem aldrei
komu til en voru á dagskrá.
Það var skiljanlega mikill
hiti kominn í mannskapinn
eins og þjóðin fékk að sjá í
fjölmiðlum,“ segir Telma og
heldur áfram: „Eftir að hafa
verið þarna í nokkra daga leið
mér þó eins og ég væri búin að
vera þarna í mun lengri tíma, ég
fékk smjörþefinn af mörgum
frumvörpum og tillögum sem
verður síðan áhugavert að
sjá hvernig verða afgreidd að
lokum. Það er merkilegt að fá
loksins að kynnast eða hafa
skoðanir á vinnslu mála sem
maður hefur margoft lesið um
í fréttunum.“
Óskar eftir
gagnkvæmri virðingu
þingmanna
Telma segir upplifunina hafa
verið skemmtilega og að hún
sé reynslunni ríkari. „Það er
vissulega margt sem kom á
óvart, bæði jákvætt og neikvætt.
Ég held það sé hollt að setjast
þarna inn í svo stuttan tíma,
maður sér líklega hlutina í allt
öðru ljósi en þeir sem hafa
verið þarna í lengri tíma, þ.e.
maður tekur þátt af fullum
krafti en á sama tíma horfir á
úr fjarlægð,“ útskýrir hún. „Það
eru margir hlutir sem ég myndi
vilja sjá unna á allt annan hátt
en tíðkast nú en um leið átta ég
mig á að því verður ekki breytt
svo auðveldlega. Mér myndi til
dæmis þykja vænt um að sjá
þingmenn og -konur bera meiri
virðingu fyrir hvert öðru.“
Í lokin segir Telma það vera
óljóst hvort dagar hennar á
Alþingi Íslendinga séu taldir
- „hugsanlega fæ ég tækifæri
til að láta ljós mitt skína síðar
meir.“ /BÞ
Mikil vinátta og sterk tengsl mynduðust milli krakkanna sem áttu erfitt með að kveðja hvert annað við ferðalok. Hér eru þeir á góðri stund. Mynd: Magnús Hinriksson