Feykir - 16.05.2012, Blaðsíða 5
19/2012 Feykir 5
ÍÞRÓTTAFRÉTTIR FEYKIS > www.feykir.is/ithrottir
Karlalið Tindastóls lék
sinn fyrsta leik í 1.
deildinni þetta árið sl.
laugardag er liðið
heimsótti Hauka á
Schenkervellinum að
Ásvöllum. Þrátt fyrir góða
baráttu Tindastóls,
marktækifæri og skot í
tréverkið náðu þeir ekki
að koma boltanum í netið
en Haukarnir hins vegar
tvisvar. Donni þjálfari var
ánægður með leik liðsins
þrátt fyrir tap og segir
hann vinnuframlag
leikmanna til fyrirmyndar.
-Menn gáfu allt í verkefnið
en við fengum á okkur ódýrt
mark beint úr horni rétt fyrir
lok fyrri hálfleiks. Ég hugsa
að leikurinn hefði þróast
öðruvísi ef við hefðum náð
að halda núllinu fram að
hálfleiknum því við vorum
sterkari í fyrri hálfleik.
Komum fínir til leiks í seinni
hálfleik og fengum óbeina
aukaspyrnu innan þeirra
teigs og Fannar Freyr skaut í
þverslána. Eftir það ná
Haukarnir smá yfirhönd án
þess þó að skapa sér nokkuð
færi á okkur, segir Donni en
honum fannst liðið jafn
líklegt til að jafna eins og
Haukarnir að bæta við enda
leikurinn í járnum. Það er
síðan vendipunktur að mati
Donna þegar Arnari Magn-
úsi markmanni Stólanna er
vikið af velli (fyrir að sýna
áhangendum Haukanna
nöglina á löngutöng eftir að
hafa þurft að þola háðsglósur
frá þeim) en eftir það var
leikurinn mjög erfiður.
Haukar skora svo mark í blá-
lokin eftir að þeir taka stutt
horn og spila sig inn í teig
Stólanna.
Sumarið leggst vel í Donna
og hann sáttur við hópinn.
-Allir þeir sem koma að þessu
hafa lagt mikla vinnu á sig og
eru tilbúnir í að takast á við
þessa gríðarsterku deild. Ég er
sannfærður um að við getum
staðið okkur mjög vel og hef
fulla trú á leikmönnunum.
Hópurinn er skipaður ungum
og metnaðarfullum leik-
mönnum í bland við nokkra
aðeins eldri. Það er mikil
samstaða í hópnum og ég tel
að það geti fleytt okkur langt.
Við höfum fengið til okkar sjö
nýja leikmenn og þeir hafa
allir komið vel inn í okkar
skemmtilega hóp.
Þrettán leikmenn af okkar
tuttugu manna hópi eru
heimamenn og við erum
mjög ánægðir með það. Þetta
er hópur leikmanna sem á að
geta staðið sig vel í öllum
leikjum í sumar.
Fyrsti heimaleikur Tinda-
stóls er nk. laugardag gegn
Víkingi frá Ólafsvík og vonar
Donni að sem flestir sjái sér
fært að mæta og styðja liðið
áfram. -Það voru flottir
aðilar sem studdu okkur á
móti Haukum og þar unnum
við stúkuna.
Arnar Magnús markvörð-
ur Stólanna baðst afsökunar
á hegðun sinni og spila-
mennsku í leiknum á Fés-
bókarsíðu sinni eftir leikinn
á laugardag. „Langt frá því
sem ég er og get, en liðið
spilaði vel og ef ég hefði verið
á sama leveli þá hefðum við
fengið a.m.k. stig út úr þessu
en fall er fararheill. Ég hef
ekki sagt mitt síðasta inná
vellinum í sumar. Áfram
Tindastóll“, skrifar þessi
efnilegi framtíðarmark-
maður Tindastóls. /PF
Knattspyrna :: Tindastóll
Donni ánægður
með hópinn
Önnur plata Joe Dubius
Rainy Day in the Park
Fyrir skömmu kom út platan Rainy Day in the Park með Joe Dubius (Andri
Már Sigurðsson). Rainy Day in the Park er önnur platan með Joe Dubius en
fyrsta plata hans Matartíminn kom út 2010. Báðar plöturnar voru teknar upp
í Stúdíó Benmen. Andri er einnig söngvari og gítarbanjóleikari í hljómsveitinni
Contalgen Funeral. Gísli Þór Ólafsson settist niður með Andra og kannaði málið.
Hvenær hófst áhugi á tónlist?
-Áhugi minn á tónlist byrjaði fyrir
alvöru þegar ég heyrði Ísbjarnar-
blús með Bubba Morthens. Ég
man þetta eins og það hefði gerst í
gær, ég lá á stofugólfinu og var
nýbúinn að fatta hvernig ætti að
meðhöndla plötuspilara án þess að
tortíma nálinni og þegar ég heyrði
lagið „Ísbjarnarblús“ þá breyttist
eitthvað í hausnum á mér, ég vildi
vera eins og Bubbi, hann varð mitt
átrúnaðargoð næstu árin sem gæti
útskýrt af hverju ég er óvirkur alki
í dag.
Og fórstu að semja tónlist upp
frá því? -Ég er ekki alveg viss
hvernig tónlistarsköpun mín
byrjaði. Oftast var það þannig að
maður var að spinna einhver lög
upp á staðnum í partýum og
svoleiðis. Svo einn daginn keypti
ég mér bók og byrjaði að skrifa
þetta allt niður og nokkrum
bókum seinna er ekki aftur snúið.
Hvernig koma lögin, hvaðan
spretta þau? -Lögin koma
einhvern veginn bara af sjálfu sér,
t.d. ef eitthvað hefur komið fyrir
mig eða vakið áhuga minn þá bara
koma þau. Stundum lendi ég þó í
því að textinn verður of langur
eins og þegar maður skrifar
kannski 12 blaðsíður og svo velur
maður það sem manni líst best á
eða það sem á við hverju sinni.
Ertu að segja eitthvað með
lögunum þínum/textum? -Já, ég
reyni alltaf að segja eitthvað með
textunum og finnst að þeir verði
að vera frekar auðskiljanlegir. Ég
er ekki mikið fyrir að tala undir
rós, annars er það mikið komið
undir hlustandanum hvernig
hann túlkar lagið og hvort hann
tengir textann við eitthvað sem
hefur drifið á daga hans.
Núna er komin út platan Rainy
Day in the Park, þín önnur plata,
en þú gafst út Matartímann árið
2010 - er eitthvað sem einkennir
þessa nýju plötu? -Matartíminn
var á íslensku, prentuð í hundrað
eintökum og aðeins seld hjá Bjarna
Har. Það er ekki hægt að fá Matar-
tímann í dag held ég, nema Bjarni
lumi á einhverjum eintökum.
Rainy Day in the Park er mun
vandaðari gripur, svona hálfgert
uppgjör við fortíðina, tók lengri
tíma í vinnslu og meira lagt í allt
ferlið. Það sem einkennir Rainy
Day in the Park er einlægni og að
koma til dyranna eins og maður er
klæddur, en svo verður fólk bara
að dæma sjálft þegar það er komið
með plötuna í hendurnar.
Hvernig var samstarfið við Fúsa?
-Ég verð bara að byrja á því að
segja hvað fólk í Skagafirði er
heppið að eiga mann eins og Fúsa
Ben og að án hans hefði þessi plata
ekki orðið eins góð eða hvort hún
hefði orðið til yfir höfuð. Fúsi er
ómissandi þáttur í Skagfirsku
tónlistarlífi eins og flestir ættu að
vita. Það er varla hægt að hugsa sér
betri mann til að vinna með, hann
gerir allt af heilum hug og ég á
klárlega eftir að taka upp fleiri
plötur hjá honum, þar sem hann
er búinn að koma sér vel fyrir í
gamla Tengils húsinu. Ef þú ert að
velta fyrir þér að taka eitthvað upp
er Studio Benmen klárlega málið.
Er einhver saga á bakvið nafnið
Joe Dubius? -Ég man ekki alveg
hvernig þetta nafn kom til, þetta
varð til á þeim árum sem ég bjó í
Reykjavík og einhvern veginn
hefur þetta alltaf fylgt mér, hvort
sem ég er kallaður Andri Dúbíus
eða Joe Dubius, það skiptir mig
voða litlu máli.
Hvað er framundan? -Það er
margt á döfinni, ég er á leiðinni til
Frakklands að hitta kærustuna
mína og spila nokkra tónleika, svo
verður maður að reyna að selja
plötuna og fylgja henni eftir. Svo er
líka að koma plata hjá Contalgen
Funeral og verður henni fylgt eftir
með tónleikahaldi og tilheyrandi.
Við erum komin inn á nokkrar
tónlistarhátíðir í sumar, t.d
Gæruna, Bræðsluna og einhverjar
fleiri þannig að það verður nóg að
gera í sumar. Svo getur verið að Joe
Dubius birtist hér og þar um
landið böskandi með diska til sölu,
hver veit. /GÞÓ
Donni þjálfari fagnar sæti í 1. deild síðasta sumar eftir sigur á Húsvíkingum á Króknum.
Joe Dubius. Mynd: A.L Le Pellec