Feykir - 07.06.2012, Blaðsíða 9
22/2012 Feykir 9
( MATGÆÐINGAR VIKUNNAR ) berglindth@feykir.is
Sigurbjörg og Gunnar kokka
Smáréttir úr
Hólableikju í
garðveisluna
Sigurbjörg Bjarney Ólafsdóttir og Gunnar Óskarsson
eru starfsmenn Hólaskóla. Þau skora á Hrönn
Jónsdóttur og Einar Svavarsson, sem eru einnig búsett
á Hólum í Hjaltadal.
„Okkur finnst tilvalið nota hráefni úr héraði og bjóða upp
á þrjár uppskriftir af Hólableikju til að njóta nú þegar sumarið
er komið. Þessa bleikjurétti má nota sem forrétti eða smárétti
í garðveislunni. Hver réttur er fyrir 4-6.“
FORRÉTTUR
Grafin Hólableikja
borin fram með dillsinnepssósu,
grænum aspas og ristuðu brauði
Kryddblanda:
2 msk salt
5 msk sykur
2 msk dillfræ
1 msk fennil
½ msk hvítur pipar
5 msk grænt dill
2 flök bleikja
Sósa:
1 bolli majones
½ bolli Slotts original sinnep
1 msk grænt dill
½ msk brúnt dill (möluð
dillfræ)
½ msk hunang
½ msk síróp
AÐFERÐ Beinhreinsið flökin
og leggið á fat með roðið niður.
Hyljið vel með kryddblöndunni
og látið standa í kæli í einn
sólahring. Blandið hráefni í
sósu vel saman og látið standa
í nokkrar mínútur. Skerið
bleikjuna í þunnar sneiðar og
berið fram með sósunni og
niðursoðnum grænum aspas.
AÐALRÉTTUR 1
Appelsínubleikja
(úr veislubók Hagkaupa)
Appelsínublanda
(marinering):
1 ½ dl sítrónusafi
1 dl appelsínuþykkni
1 appelsína, rífið börkinn og
kreistið safann úr henni
½ dl ólívuolía
1 msk sykur
1 msk graslaukur
20 korn grænpipar
½ tsk salt
AÐFERÐ Þrjú bleikjuflök bein-
hreinsuð og roðflett, (einnig
er hægt að sneiða flökin niður
fyrir marineringu). Blandið
öllu hráefninu saman. Fersk
sítrónumelissa til skrauts.
Leggið flökin með roðið
upp í eldfast mót og hellið
blöndunni yfir þau og látið
standa í sólarhring eða setjið
niðursneiddu bleikjuna út
í blönduna og látið standa í
6-12 klst. í ísskáp. Borið fram
með káli, tómötum og ristuðu
brauði eða eitt og sér.
AÐALRÉTTUR 2
Bleikjutartar
1 bleikju flak, roðlaust
og beinlaust, saxað smátt.
1 lítill rauðlaukur, saxaður smátt
1 msk capers, kramið
og saxað smátt
1 msk ólífuolía
salt og pipar
AÐFERÐ Öllu blandað saman og
látið standa í 30 mínútur. Borið
fram á steiktu brauði, gott er að
hafa með þessu hráa eggjarauðu.
EFTIRRÉTTUR
Auðveldur
heimalagaður ís
með bragði að eigin vali
5 heil egg
200 gr sykur
½ l rjómi
vanilla
AÐFERÐ Hálfþeytið rjómann.
Stífþeytið saman egg og sykur og
bætið vanillu í. Blandið varlega
saman eggjahræru og rjóma með
sleif. Setjið í blönduna bragðefni
að eigin vali, t.d. jarðarber, súkku-
laðispæni, rommkúlur eða hvað-
eina sem ykkur dettur í hug. Blandið
varlega saman við með sleif. Hellið
blöndunni í form og frystið.
Verði ykkur að góðu!
Börnin vilja skemmtilegri Litlaskóg
Gott svæði
til útivistar
Það er af sem áður var þegar leikvellir voru víða
staðsettir fyrir börn á Sauðárkróki og leiktækin
mörg og mismunandi. Flest þeirra voru smíðuð á
heimavelli og dugðu vel meðan þeim var haldið við.
Nú eru aðrir tímar, tímar reglugerða og ofurgæslu,
og svo virðist sem nú megi ekki setja niður leiktæki
nema þau séu vottuð í bak og fyrir og kosta þau
sitt. Nemendur 6. bekkjar Árskóla fóru fyrir stuttu í
skólaferðalag í Kjarnaskóg við Akureyri og sáu þar
skemmtileg leiktæki og sáu fyrir sér að samskonar
tæki gætu risið í Litlaskógi á Sauðárkróki.
Settust þau niður er heim var komið, hönnuðu
og teiknuðu leiksvæði og -tæki og settu saman bréf
þar sem skorað er á sveitarstjórnarfólk að að ráðast
í að gera Litlaskóg enn skemmtilegri. Bréfið afhentu
þau staðgengli sveitarstjóra í síðustu viku og er það
eftirfarandi:
Kæru sveitarstjórnendur.
Við krakkarnir í 6. bekk Árskóla fórum í skólaferðalag til
Akureyrar og sáum skemmtileg leiktæki í Kjarnaskógi.
Okkur langar endilega að fá svoleiðis tæki í Litlaskóg.
Við unnum verkefni þar sem við fórum í Litlaskóg og
mældum fyrir leiktækjum þannig að þetta ætti ekki að
vera mjög erfitt.
Okkur finnst að Litliskógur sé nýttur allt of lítið og
viljum við nýta hann betur fyrir fólkið á svæðinu og
ferðamenn.
Þarna getur fólkið farið og grillað, leikið sér, vaðið og
margt fleira.
Á Sauðárkróki er lítið um leikvelli og við eigum oft
erfitt með að finna staði til að leika okkur á.
Þegar ferðafólk kemur á Sauðárkrók er svona svæði
mjög gott til útivistar.
Einnig getur skólinn nýtt svæðið fyrir okkur
nemendurna.
Við teljum að þetta kosti ekki mikla peninga.
Það er hægt að nota ódýrt efni.
Við erum tilbúin að vera með í ráðum og hjálpa til.
Og munið hreyfing skiptir máli fyrir krakka.
Með vinsemd og virðingu,
nemendur í 6. bekk Árskóla.