Feykir - 12.07.2012, Blaðsíða 6

6 Feykir 27/2012
Gærurnar - Nytjamarkaður á Hvammstanga
Gærurnar - Nytjamarkaður
var opnaður á Jónsmessunni
en þetta er fimmta sumarið
sem markaðurinn er
starfræktur. „Það er
alltaf góð stemmning á
markaðnum en aldrei eins
mikil og fyrsta opnunardag.
Þó að allir laugardagar
séu skemmtilegir þá ríkir
smá spenna og extra gleði
fyrsta daginn. Þá myndast
alltaf biðröð fyrir utan um
20 mínútum fyrir opnun
og svo flykkist fólkið inn,“
segir Helga Hinriksdóttir,
ein þeirra níu kvenna sem
standa að markaðnum.
Nytjamarkaðnum var fyrst
komið á fyrir fimm árum
þegar starfsfólk sjúkrahússins
var að fara í helgarferð til
Danmerkur og Svíþjóðar og var
markaðurinn liður í fjáröflun
fyrir ferðina. „Ákveðið var
að auglýsa eftir dóti frá fólki
og komu viðbrögðin á óvart.
Nokkrar af konunum ákváðu
því að halda áfram með markað
sumarið á eftir og gefa ágóðan
í góðgerðamál,“ segir Helga
um tilurð nytjamarkaðsins.
Markaðurinn var staðsettur í
gamla sláturhúsi KVH fyrstu
þrjú árin, nánar tiltekið í
gærukjallaranum og þaðan
segir Helga nafnið Gærurnar
komið. „Eftir hvert sumar var
öllum afganginum af dótinu
pakkað niður og geymt í
kjallaranum. En svo kom að
því að Selasetur Íslands keypti
gærukjallarann og því þurftum
við að flytja og fengum að vera
í iðnaðarhúsi gegnt Bardúsu í
eitt sumar,“ segir Helga en nú
er markaðurinn staðsettur í
gömlu sláturhúsi, í endanum
á Meleyarhúsinu, rétt við
Landsbankann. „Okkur líst
mjög vel á þetta húsnæði, það
er mjög bjart og stórt,“ segir
Helga.
„Það er alkyns góss sem við
fáum, enda eru einkennisorð
markaðarins „Eins mans rusl,
er annars gull“ og eru það orð að
sönnu. Oft sér maður líka fólk
verða að „kaupa minningar“, þá
sér það kannski einhvern hlut
sem hafði verið til á heimilinu
fyrir mörgum árum síðan,“
segir Helga.
Eins manns rusl
er annars gull
Helga segir það vera gott
hve margar þær eru sem
sjá um markaðinn því hver
þeirra hefur sitt sérsvið. „Ein
er t.d. alltaf beðin um að raða
barnadótinu, hún er sú sem á
yngstu börnin og finnst okkur
því hún hljóti að hafa þetta
í fingrunum! Önnur er best
af okkur í fötunum, ein best í
antíkinni og svo framvegis,“
útskýrir hún. „Við tökum
á móti öllu svo framarlega
sem það er heillegt. En við
grisjum svo t.d. í gegnum
fötin og aðeins þau sem við
teljum vera söluvænleg fara
upp, önnur fara strax í Rauða
Krossinn. Við erum t.d. með
búsáhaldadeild, rafeindadeild,
fatadeild, barnadeild, bóka-
deild, húsgagnadeild og
svo uppáhald okkar allra
„raritets-borðin“, þau eru með
verðmeiri hlutum svo sem
antík-munum,“ segir Helga og
bætir við: „Já, helmingurinn af
allri skemmtuninni er að raða
upp hlutum.“
Allur ágóðinn fer í góð-
gerðamál í sveitafélaginu og
hafa Gærurnar m.a. styrkt
Ungliðadeild Björgunarsveit-
arinnar Húna, Grunnskóla
Húnaþings vestra, leikskólann
Ásgarð, Tangahús á Borðeyri
Sambýlið ofl. Þá keyptu þær
m.a. vatnsvél og boccia sett
í Íþróttamiðstöðina og hafa
styrkt einstaklinga og smærri
verkefni, s.s. Eld í Húnaþingi.
Nytjamarkaðurinn er
opinn alla laugardaga frá
kl. 11 – 16 og verður fram
yfir verslunarmannahelgi.
„Við tökum á móti dóti alla
miðvikudaga milli kl. 17 og
19 og því er alltaf eitthvað nýtt
að sjá hvern laugardag,“ segir
Helga í lokin. /BÞ
Fiskisæluhópurinn úthlutar
afrakstri Fiskisælu
Höfðingleg
gjöf
Á dögunum barst
þjónustuþegum Iðju-
Hæfingar á Sauðárkróki
höfðingleg gjöf frá
Fiskisæluhópnum en
það voru iPad og Kindle
tölva ásamt sjö þúsund
krónum í peningum.
Þarna var um afrakstur
Fiskisælu sem sem haldið
var sl. vor. Að sögn
Jónínu G. Gunnarsdóttur,
forstöðumanns Iðju-
Hæfingar kemur gjöfin
sér vel. „Þjónustuþegar
Iðju-Hæfingar þakka
kærlega fyrir höfðinglega
gjöf, fiskisæluhópurinn
lengi lifi.“
Það var árið 2010 sem sú hug-
mynd varð til hjá tveimur
konum að bjóða upp á hlað-
borð með sjávarréttum í
Sæluviku og láta ágóðann
renna til Þuríðar Hörpu.
Fengu þær til liðs við sig
vinkonur sínar og hrintu
þessu í framkvæmd.
„Þetta tókst mjög vel
og var mjög gaman. Þá var
strax ákveðið að þetta væri
þess virði að endurtaka
að ári. Það var gert og
Tómstundahópur RKÍ naut
afrakstursins. Í ár var semsagt
þriðja árið sem boðið var
upp á Sjávarréttahlaðborð í
Ljósheimum í Sæluviku og
nú nutu góðs þjónustuþegar
Iðju-Hæfingar á Sauðárkróki.
Alltaf er verði stillt í hóf
og reynt að gera þetta
fjölskylduvænt og fjölbreytt.
Jón Hallur og Gunnar
Rögnvalds lögðu okkur lið
í ár með glensi og gaman,“
segir Fiskisælu-hópurinn
sem nú telja fjórar konur
og njóta aðstoðar vina og
vandamanna eftir því sem
þær þurfa.
Með aðföng, auglýsingar
og aðstöðu hefur verk-
efnið verið styrkt af: Skag-
firðingabúð, Fisk Seafood,
Dögum, Nýprent og fjölda
einstaklinga sem gerir þetta
kleift, eins sá fjöldi Skag-
firðinga og annarra gesta sem
alltaf verða fleiri og fleiri sem
koma og njóta.
„Við þökkum þessar
frábæru viðtökur og stuðning
en með þessu framtaki okkar
viljum við láta gott af okkur
leiða og gera gott samfélag
betra.“ /PF
Gjafirnar féllu í góðan jarðveg.
Mikið fjör var við opnun nytjamarkaðsins á Jónsmessunni.