Feykir - 06.09.2012, Blaðsíða 9

33/2012 Feykir 9

Heilir og sælir lesendur góðir.
Það er Hreiðar Eyjólfsson Geirdal sem er
höfundur að fyrstu vísunum að þessu sinni.
Er hann trúlega að lýsa ýmsu sem hann
hefur áttað sig á um langan æviveg.
Til að greina böl frá bót
brestur skilning taman.
Allir vita; gull og grjót
getur legið saman.
Mönnum títt á móti blæs,
margur hrekst á grunninn.
Fremur sjaldan flýgur gæs
feit og steikt í munninn.
Þjóðin öll – í orðum fám-
yfir sannleik breiðir.
Ekki sjást í ættarskrám
ýmsar krókaleiðir.
Guðmundur Gunnarsson á Tindum yrkir
kannski í svipuðum dúr.
Skulda ótta að mér slær
aldrei rótt má verða.
Vökunóttum valda þær
vinnuþróttinn skerða.
Þó á mér hvíli eins og blý
iðgjöld heimsku minnar.
Dauðahaldi held ég í
hálmstrá vonarinnar.
Oddgeir Guðjónsson er höfundur að næstu
vísu sem er ágæt hringhenda. Mun hún
ort einhverju sinni er rætt var um skaða af
tófum.
Margt er þref í amstri og önn
ýmsir hnefa miða.
Ekki hefir tímans tönn
tekist ref að siða.
Þar sem ekki verður undan því komist að
viðurkenna að blessað sumarið er liðið að
þessu sinni og göngur og réttir á næsta leiti
er þessi þáttur er í smíðum. Að því tilefni
langar mig næst að rifja upp nokkrar vísur
eftir okkar snjalla Rósberg G. Snædal. Eins
og ég hef getið um áður orti hann óhemju
mikið af hringhendum eins og reyndar
kemur vel fram í þessum vísum. Eru þær
ortar á gleðskaparstundum í Stafnsrétt og
lýsa vel mannlífinu eins og það var þar áður
fyrr.
Haustið bíður allra oss
úti er blíða og friður.
Safnið líður líkt og foss
lækjar hlíðar niður.
Bliknar margt og bleik er grund
blóma skart í valnum,
á þó hjartað óskastund
innst í Svartárdalnum.
Fótanettan fák má sjá
flýgur um þetta staka.
Sléttum réttareyrum á
ýmsir spretti taka.
Vísnaþáttur 577
Hér er líf og líka fjör
lagleg víf og jeppar.
Heyrast gífuryrði ör
óðir rífast seppar.
Léttist þungur þanki minn
því skal sungið vinurinn.
Verð ég ungur annað sinn
er ég Tungubræður finn.
Svona bras er siður forn
sumir hrasa og slaga,
taka í nasir tóbakskorn
tappa úr glasi draga.
Þar er sparkað kjaftað kýtt
karlar þjarka um hross og skjátur.
Þar er slarkað þjórað spítt
þá er Marka-Leifi kátur.
Senn að völdum svefninn fer
sveit í tjöldin skríður.
Svona er öldin önnur hér
er á kvöldið líður.
Kunnar voru hér áður fyrr gleðskaparferðir
þeirra félaga Rósbergs, Bjarna frá Gröf,
Hjartar Gíslasonar og fleiri hér vestur í
Svartárdalinn á Stafnsréttardögum. Í einni
slíkri ferð var smíðameistarinn Ari frá
Baugaseli með þeim félögum. Á leiðinni
hér vestur frá Akureyri þegar orðinn var
góður gleðskapur hjá þeim félögum orti
Rósberg.
Vestur haugast verstu bullur
vínsins laug er sopið á.
Nú er auga útúr fullur
Ari Baugaseli frá.
Þegar komið var á áfangastað færðist gleðin
heldur betur í aukana og gat þá stundum
verið misjafnt hvað menn héldu lengi út.
Aftur tekur Rósberg til við að lýsa ástandinu.
Vilja safnast vestur að Stafni
visku hrafnar ýmiskonar.
Er að kafna undir nafni
Ari jafni Þorgilssonar.
Á síðari réttardegi tóku gestir að tygja sig
til brottfarar og var þá oft lítið orðið eftir af
nestinu eins og Bjarni frá Gröf lýsir svo vel
í þessari kunnu vísu.
Þó ég bjarta þrái veig
þreyttur og hjarta kalinn.
Nú er hart um nýjan fleyg
niður Svartárdalinn.
Gott að enda þessa ágætu syrpu með góðri
vísu eftir Jón Tryggvason í Ártúnum sem
ort er í ferð með góðum félögum um
Eyvindarstaðaheiði 29. ágúst 1981.
Þó að húmi og hausti senn
hitna fornar glóðir.
Þegar gamlir gangnamenn
ganga um þessar slóðir.

Verið þar með sæl að sinni.
/ Guðmundur
Valtýsson
Eiríksstöðum,
541 Blönduósi
Sími 452 7154
( GUÐMUNDUR VALTÝSSON )
Breytingar á almenningssamgöngum
í Norðvesturkjördæmi
Fyrsta strætó-
ferðin norður
Jómfrúarferð Strætó milli
Reykjavíkur og Akureyrar
var farin sl. sunnudag en
nýtt fyrirkomulag um
fólksflutninga tók gildi
þann 1. september þar sem
sérleyfisakstur eins og verið
hefur til fjölda ára, heyrir
sögunni til. Breytingarnar hafa
m.a. í för með sér styttri stopp
og styttri aksturstíma, auk
nýrra leiða á völdum köflum.
Þar má helst til nefna að áætlun-
arakstur verður til Stykkishólms,
Búðardals, Hólmavíkur og Reyk-
hóla en einnig verður boðið
upp á ferðir til Grundarfjarðar,
Ólafsvíkur, Hellissands, Rifs,
Reykholts, Hvammstanga og
Skagastrandar en þær ferðir
verður að panta sérstaklega
a.m.k. tveimur tímum fyrir
brottför.
Þá verður sú meginbreyting
gerð á akstursleið frá fyrri tíð
að ekið er yfir Þverárfjall og þar
með er Sauðárkrókur orðinn
einn af viðkomustöðum fólks-
flutningavagna milli Akureyrar
og Reykjavíkur.
Meðal farþega Strætó í þessari
ferð voru Páll Brynjarsson
sveitarstjóri í Borgarbyggð,
Sveinn Kristinsson formaður
stjórnar SSV og Gísli Friðjónsson
forstjóri Hópbíla sem sjá um
aksturinn, en Bjarni Jónsson
formaður SSNV tók á móti þeim
í Staðarskála þar sem samningar
um aksturinn voru undirritaðir.
Að sögn Páls Brynjarssonar
gekk ferðin ljómandi vel og
er hann sannfærður um að
þetta fyrirkomulag eigi eftir að
breyta heilmiklu fyrir svæðið.
-Við sjáum það að í fyrsta lagi
er þetta stóraukin þjónusta við
íbúa á svæðinu og í öðru lagi
er mun hagstæðara að nota
almenningssamgöngur en áður
var. Fargjaldið er lægra heldur
en var áður og síðan gerist það að
núna liggja leiðir þeirra gegnum
tvo af stærstu þéttbýlisstöðunum
í Norðvestur kjördæmi, þ.e.
Akranes og Sauðárkrók. Ég held
að þetta eigi eftir að breyta miklu,
segir Páll.
Bjarni Jónsson tók í sama
streng en hann settist upp í
bílinn í Staðarskála og tók sér
far á Krókinn. –Ferðin var
ljómandi fín og gekk ljúflega
fyrir sig. Þessar breytingar á
almenningssamgöngur opna
margvíslega möguleika t.d. út frá
Sauðárkróki sem er orðinn einn
af viðkomustöðunum. Bjarni
segir að möguleikar séu á því að
tengja áfram út frá Sauðárkróki
t.d. með því að fjölga ferðum
á Skagaströnd og Blönduós og
þá sérstaklega morgunferðir
til að geta þjónustað skólafólk
en einnig fólk sem þarf að
sækja vinnu á milli staðanna
því töluverð ferð er á fólki milli
þessara staða. –Þetta getur orðið
ennþá öflugra sem eitt atvinnu
og skólasvæði og svo þurfum
við að hugsa til þess hvernig
við getum tengt Hóla og Hofsós
betur inn í þetta jafnvel Fljót og
þess vegna áfram á Siglufjörð,
segir Bjarni en hann vill samt
fara varlega í sakirnar þar sem
unnið er út frá þeim fjármunum
sem nú voru settar í verkefnið.
Í framtíðinni segir Bjarni
hugsanlega vera hægt að tengja
samgöngur enn frekar og er þá
að hugsa m.a. til skólaaksturs
og nýta þær ferðir betur fyrir
almenning. Segir hann að fyrst
umsjón með þessum ferðum sé
komin í hendur heimamanna
sé auðveldara að vinna að þeim
málum. /PF
Bjarni Jónsson formaður SSNV tekur á móti Páli Brynjarssyni sveitarstjóra Borgarbyggðar í Staðar-
skála í jómfrúarferð Strætó norður í land sl. sunnudag.
Bjarni Jónsson, Sveinn Kristinsson, Gísli Friðjónsson og Páll Brynjarsson við undirskriftir fyrir utan
Staðarskála.