Feykir - 20.09.2012, Page 11
35/2012 Feykir 11
( ÁSKORENDAPENNINN ) berglindth@feykir.is
Ég ákvað þegar ég
tók þeirri áskorun
að vera á lista fyrir
síðustu sveitarstjórnar-
kosningar að miðla
því til hins almenna
kjósenda hvernig það
er að vera í pólitík
þegar kjörtímabilið væri
hálfnað. Þar sem ég er
alveg rennandi blaut á
bak við eyrun í þessum
bransa tel ég mig vera
í fínum sporum til þess
að segja frá. Ég er
ekki orðin samdauna
þessum nýja heimi sem
opnast þegar farið er í
pólitík. Og maður minn
nú hef ég frá mörgu að
segja.
Ég gekk inní þennan heim
harðákveðin og forvitinn.
Vinstri græn fengu
nokkuð góða kosningu
í framsóknarfriðlandinu
Skagafirði. Við sömdum
því að sjálfsögðu um
meirihlutasamstarf við
Framsókn og gengu þær
viðræður vel. Ég komst
mjög fljótlega að því
að þetta sem kallast
pólitík flækist bara fyrir
í þessari hópvinnu sem
sveitarstjórnarmálin
eru. Þrátt fyrir að jú
meirihlutinn eigi að ráða
höfum við frá upphafi
átt ágætis samstarf við
minnihlutann. Þess vegna
hefur komið á óvart
einstaka blaðagrein frá
minnihlutanum sem lýsir
óánægju með ástandið
eða reynir að slá ryki í
augu kjósenda. En það
er þeirra hlutverk, að
vera óánægð allavega
með eitthvað. Það er
hins vegar staðreynd
að nær allir sem koma
að þessum málum vilja
það sama, sama í hvaða
flokki þeir eru. Við viljum
öll gera allt sem í okkar
valdi stendur til þess að
gera Skagafjörð að enn
betri stað til að búa á. Þar
sem allir, sama á hvaða
aldri, búa við öryggi og
velferð....eða á íslensku:
að öllum líði vel, hafi í sig
og á, geti notið lífsins og
samvista við fólkið sitt!!
Við vissum hins vegar öll
að við stóðum frammi
fyrir miklu verkefni að
koma rekstrarmálum
sveitarfélagsins í
viðráðanlegt horf,
sérstaklega í ljósi
kreppunnar og mikinn
niðurskurð á fjármagni
frá hinu almáttuga ríki
sem hefur bara sína
hentisemi þegar kemur
að fjárútlátum, athugið
lagalegum fjárútlátum.
Og það hefur tekist
með glæsibrag þrátt
fyrir dyntótt ríki. Því
staðreyndin er sú að þrátt
fyrir að ríkið eigi að láta
okkur hafa t.d. ákveðna
upphæð í fræðslumál,
þá úbs fáum við bara
30 milljónum minna. Ég
skildi þetta bara alls ekki,
hvernig gekk þetta upp
en júbs, þá er þetta bara
svona. Og þetta var bara
byrjunin.
Að koma inní
sveitarstjórnarmál, full
af góðum og gildum
hugmyndum um að
gera þetta sveitarfélag
fjölskylduvænna, fallegra
og samheldnara var
meira en að segja
það. Þessar hugmyndir
flæktust töluvert fljótt í
heimi bókhaldsreglna,
málamiðlana og
fjárhagsáætlunarpressu.
Heyrðu já, svo er ég líka
í annarri vinnu, vinnu
sem krefst tíma og
orku, og er lifibrauðið
mitt, því minn kæri
kjósandi, maður verður
ekki milljónamæringur
á því að sinna
sveitarstjórnarmálum,
meira svona sérfræðingur
í þolinmæði.
Eftir 1 ár í þessum nýja
heimi fullorðna fólksins,
sem er eins langt frá
því að vera fullkomin
og sandkassinn á
leikskólanum, féllust mér
hendur. Ég sá að ég varð
að forgangsraða grimmt
til þess að komast yfir allt
sem ég þurfti að gera,
eða mér fannst ég verða
að gera. Þrátt fyrir góðar
fyriráætlanir hafði ég
ekki komið nema hluta
af málum mínum í gegn,
þetta var svona eitt skref
áfram og tvö aftur á bak.
En eftir þetta fyrsta ár
ákvað ég að taka öðruvísi
á þessu, verða svolítið
fagmannleg. Taka eitt mál
fyrir í einu og sætta mig
við það að allt færi ekki
eins og ég vildi. Ég varð
líka að sætta mig við það
að þrátt fyrir góðan vilja
þá get ég ekki verið inn í
öllum málum. Og einnig
að ekki koma allir fram af
heilindum sem hafa þarf
samskipti við, þó það sé
minnihluti.
Þetta allt hefur mér
reynst erfitt en er þó allt
að koma. Mér finnst að
það ætti að vera skylda
að allir tækju að minnsta
kosti einu sinni þátt í
því að koma saman
fjárhagsáætlun fyrir
sveitarfélag og um leið að
gera öllum til hæfis. Það
er holl og góð lexía.
Núna held ég áfram,
ótrauð og eitilhörð,
ákveðin í að nýta næstu
2 ár til eins margs góðs
og ég get. Ég mun hefja
þetta ár á því að kynna
nýja jafnréttisáætlun
fyrir Skagafjörð sem
ég vann að hluta
af miklum eldmóð,
meðfram hlaupum
mínum á næturvöktum
á heilbrigðisstofnuninni,
og oft var ég ansi
sveitt í lok nætur.
Þessi jafnréttisáætlun
er nýstárleg þar sem
megináherslan er á
það að gera jafnrétti að
því sem því var ætlað
í upphafi, réttlætismáli
fyrir karla ekki síður en
konur. Það þarf að hrista
upp í þessari umræðu,
jafnréttið hefur ekki verið
að skila okkur því sem
því er ætlað, betra lífi fyrir
bæði kyn og börnin okkar.
Karlar og konur verða
að vinna í því saman.
Fræðsla innan skólanna
er því umfangsmikil í
þessari jafnréttisáætlun.
Síðan ætla ég mér
m.a. að vinna að
samfélagsstefnu fyrir
sveitarfélagið til að hrista
okkur saman og efla
samkennd Skagfirðinga.
Því í þessum fallega firði
býr afbragðsfólk sem
eyðir tíma sínum um of
í innbyrðis stríð, þegar
þeim tíma væri betur
komið í jákvæða umræðu
og samhjálp. Þetta veit
ég þrátt fyrir að ég sé
akp. (aðkomupakk), en
kannski einmitt þess
vegna. Nú er ég samt
hætt að þurfa túlk við það
að lesa Sjónhornið og tel
mig því orðna þónokkurn
Skagfirðing. Pólitík er list
hins mögulega sagði mér
spekingur, á það ætla ég
að trúa og gera mitt allra
besta næstu 2 árin að
minnsta kosti. Lifið heil.
Virðingarfyllst með þökk
fyrir traustið
Arnrún Halla Arnórsdóttir
3ja barna móðir
Hjúkrunarfræðingur BSc,
dipl.ed í kennslufræðum,
M.A í Siðfræði
Háskólakennari við H.A.
Formaður félags-og
tómstundanefndar
sveitarfélagsins
Skagafjarðar
Varamaður í sveitarstjórn
og byggðaráði
sveitarfélaginu Skagafirði
Formaður
heilbrigðisnefndar
Norðurlands vestra
- - - - -
Arnrún Halla skorar á
Guðnýju Jóhannesdóttur
að skrifa næsta pistil.
Arnrún Halla Arnórsdóttir skrifar frá Sauðárkróki
Að vera í pólitík
Farskólinn tvítugur
Athyglisverð
námskeið í boði
Farskólinn – miðstöð
símenntunar á Norðurlandi
vestra stendur á tímamótum
en þann 9. desember næst-
komandi verða 20 ár liðin frá
því að Farskólinn var gerður
að sjálfseignarstofnun með
sína eigin skipulagsskrá.
Í dag starfa ellefu símennt-
unarstöðvar vítt og breitt um
landið og er Farskólinn elst
þeirra. Á dögunum barst
nýr Námsvísir skólans inn á
hvert heimili á Norðurlandi
vestra og að venju stútfullur af
spennandi námskeiðum sem
nært getur bæði líkama og sál.
Að sögn Halldórs B. Gunn-
laugssonar verkefnastjóra
verður boðið upp á athyglisvert
námskeið sem hentar vel fyrir
þá sem hafa hætt í námi eða
ekki farið í framhaldsnám
eftir grunnskóla og treystir sér
ekki til að hefja skólagöngu í
framhaldsskóla. Nefnist það
„Nám og þjálfun í almennum
bóklegum greinum“ og eru
kenndir hinir átta grunn-
áfangar þ.e. tungumál,
stærðfræði o.fl. Mennta- og
menningamálaráðuneytið
hefur samþykkt að meta megi
námið til allt að 24 eininga
á framhaldsskólastigi. Þeir
sem eru að hugsa um frekari
menntun ætti að skoða þennan
möguleika vel.
Bryndís Þráinsdóttir
framkvæmdastjóri telur að
námskeiðið Menntastoðir
sé einnig mjög áhugavert.
Þar er boðið upp á grunn-
nám á framhaldsskólastigi
og möguleiki á að námið
sé metið sem fullnægjandi
undirbúningur undir frum-
greinadeildir Keilis, Bifrastar
og Háskólans í Reykjavík.
Símenntunarmiðstöðin á
Vesturlandi mun sjá um
framkvæmdina en Farskólinn
býður fólki sem hyggst feta
þessa leið að stunda námið í
námsverunum en notast er
við fjarfundarbúnað. Námið
er 600 kennslustundir eða tvær
annir.
Afmælisins minnst
Á slíkum tímamótum sem
þessum er ekki óalgengt að
gerður sé dagamunur fyrir
afmælisbarnið og segir Bryndís
að haldið verði upp á afmæli
skólans í Viku símenntunar
sem verður á næstunni. Þá
verður boðið upp á ókeypis
örnámskeið ásamt því að
haldið verður málþing. Einnig
er í bígerð að gefa út afmælisrit
sem væntanlega kemur út fyrir
jólin. /PF
Halldór B. Gunnlaugsson verkefnastjóri og Bryndís Þráinsdóttir framkvæmdastjóri Farskólans.