Feykir - 25.10.2012, Blaðsíða 4

4 Feykir 40/2012
Sunnudaginn 14. okt. bauð
Ríkissjónvarpið upp á nýja
tegund af sjónvarpsefni. Sýnd
var mynd (Fjallkonan hrópar
á vægð) þar sem markmiðið
var að vekja andstyggð
áhorfandans á sauðfjár-
bændum og sauðfé.
Að vísu var stöku sinnum
reynt að hafa einhverskonar
fræðilegan blæ á áróðrinum en
grímulaus var hann þess á milli.
Ósannindi, sem áhorfandanum
var ætlað að trúa, voru marg-
endurtekin eins og áróðurs-
meistara er siður. Þau helstu
voru þessi:
1. Allir sauðfjárbændur eru
landníðingar. (Líka þeir sem
stunda landgræðslu)
2. Öll landeyðing frá landnámi
er eingöngu að völdum
sauðkindarinnar. (Líka við
rætur jökla og eldfjalla sem og á
flæðiaurum stórfljóta)
3. Tvö þúsund sauðfjárbændur
Sunnudagur á RÚV
FRÁ LESENDUM KÁRI GUNNARSSON SKRIFAR
fá árlega í sinn vasa 4.000
milljónir af skattfé. (Þó þeir fái
2.000.000 kr. í vasann á mann
frá Ríkinu, þurfa flestir að
vinna með búskapnum til að
endar nái saman, þvílíkt
óráðsíufólk)
4. Bændur beita fé á lönd
annarra í óleyfi, fái þeir því við
komið. (Segir það sig ekki
sjálft? Þetta eru jú allt
drullusokkar)
5. Hvergi í heiminum eru land-
búnaðarvörur niðurgreiddar
nema á Íslandi. (Enda er verið
að rægja íslenska bændur, ekki
erlenda)
6. Sauðfé kann best við sig á
eyðismelum og lítt grónu landi.
(Svipað og aðrar skepnur,
hljóta kindur að sækja þangað
sem minnst er að éta, ef þær fá
að skemma fágæt blóm í
staðinn)
7. Skógrækt er ekki kostuð af
skattfé, plöntur né gróður-
setning. (Það eru bara sauð-
fjárbændur sem eru afætur á
samfélaginu)
8. Rollur grafa rofabörð í
algróið land. (Jafnvel þó öll
rofabörðin snúi mót ríkjandi
vindátt, þær bíta bara allar
sömu megin í þúfunum)
9. Stór hluti tekna bænda er
fyrir að smala eigin fé á annarra
landi. (Enda undirstrikar það
ágirnd og illmennsku þessa
þjóðfélagshóps)
10. Uppgræðsla bænda skiptir
ekki máli, því þeir stunda hana
eingöngu í gróðaskini á eigin
landi. (Þeir eiga hvort sem er
eftir að eyðileggja þetta land
aftur með ofbeit)
Fleiri atriði nenni ég ekki að
telja úr þessari einstöku mynd.
Upp í hvaða dans er Ríkis-
útvarpið að bjóða? Líklega
verður mynd um hunda á
næsta sunnudag. Þar verða
saman teknar allar fréttir um
hundsbit, frá því að sögur
hófust. Við hæfi væri að taka
viðtöl við öll blaðburðarbörn
og póstmenn sem orðið hafa
fyrir aðsúg hunda. Í lokin væri
viðeigandi að sýna allan þann
hundaskít sem finnst á strætum
og stígum höfuðborgarsvæð-
isins. Þessi efnistök væru álíka
hlutlaus eins og umrædd mynd
og gæfi jafn óhlutdræga mynd
af besta vini mannsins.
Það væri ekkert við því að
segja að sýna áróðursmynd
gegn sauðfé og bændum, eða
hverju sem er, í bíóhúsum og á
myndbandaleigum og auglýsa
hana sem slíka. En að senda
svona sora inn á heimili fólks, í
formi fræðsluþáttar á sunnu-
dagskvöldi, er að fara yfir
strikið.
Einn viðmælandi myndar-
innar stakk örlítið í stúf en það
var okkar ágæti umhverfisráð-
herra, frú Svandís Svavarsdóttir
(fyrir utan að sparka í Sjálf-
stæðisflokkinn eins og góðum
komma er eðlilegt). Í hennar
máli kom fram að fólk þyrfti að
styðja mál sitt með fræðilegum
rökum, eigi að taka á því mark.
En athygli vakti að ekki einn
einasti þeirra sem fram komu í
myndinni gat vitnað til gagna,
eða vísindalegar rannsókna,
máli sínu til stuðnings. Það var
því ákaflega viðeigandi að þeir
Þorvaldur Gylfason og Þórólfur
Matthíasson skyldu vera
fengnir til að leggja málinu lið.
Þar sem hráefnið í baksturinn
var af uppistöðu til; þröngsýni,
fáfræði og hræsni, var framlag
þeirra félaga eins og jarðarberið
ofan á rjómann.
Kári Gunnarsson,
höfundur er kennari
Menningarkvöld NFNV á Sauðárkróki
Stærsti viðburður
skólans frá upphafi
Menningarkvöld
Nemós, Nemendafélags
Fjölbrautaskóla Norðurlands
vestra, hefur verið mikið
tilhlökkunarefni hjá
mörgum en viðburðurinn fer
fram föstudaginn 26. október
nk. Feykir ræddi við Ísak
Atla Finnbogason, formann
nemendafélagsins og
Sigvalda Helga Gunnarsson,
skemmtanastjóra um
Menningarkvöldið, sem
þeir segja að verði stærsti
viðburður skólans
frá upphafi.
„Skipulagningin hefur gengið
vel, sérstaklega eftir að það
var nýverið staðfest að við
fengjum íþróttahúsið undir
viðburðinn,“ segir Ísak Atli
en fram að því viðurkenna
strákarnir að greina mátti
nokkurn taugatitring á meðal
skipuleggjenda. Fram til þessa
hefur Menningarkvöldið
verið haldið í húsakynnum
Fjölbrautaskólans og á síðasta
ári var salur bóknámshússins
afar þétt setinn. Þar sem
allt útlit er fyrir að enn
fleiri gestir láti sjá sig í ár
vildu skipuleggjendur gæta
alls öryggis, hvað varðar
brunavarnir og þess háttar, og
sóttu um að fá að halda hann
í íþróttahúsinu. „Við buðum
nemendum frá tveimur öðrum
framhaldsskólum á hátíðina,
þ.e. frá Menntaskólanum
á Egilsstöðum og Mennta-
skólanum á Ísafirði, en nú
þegar hefur mjög stór hópur
nemenda skráð sig í ferðina,
mun fleiri en við áttum von
á,“ segir Sigvaldi. Mun þetta
vera annað árið sem MÍ og
ME heimsækir Krókinn. „Nú
þegar hafa 127 nemendur af
270 nemendum ME skráð sig í
ferðina, sem við erum ótrúlega
ánægðir með,“ bætir Ísak Atli
við. Útlit er fyrir að um 50-60
nemendur komi frá MÍ.
Aðspurðir um af hverju
þessir tveir skólar hafi fengið
boð á Menningarkvöldið
svarar Ísak Atli: „Þetta er góð
leið til að sameina skólana
og kynnast fólki,“ segir hann
en hann sjálfur var eitt sinn
nemandi í MÍ áður en hann
hóf nám við FNV. „Svo
erum við mitt á milli,“ bætir
Sigvaldi við. Nemendur munu
svo njóta samvista hvort
við annað yfir helgina en á
laugardeginum verður haldið
íþróttamót þar sem nemendur
skólanna munu keppa sín á
milli og sá skóli sem stendur
uppi sem sigurvegari hreppir
farandsbikarinn.
Ekki hægt að sleppa
þessu kvöldi!
Dagskrá Menningarkvöldsins
verður ekki af verri endanum
en kynnar kvöldsins verða
þeir Arnar Freyr og Helgi
Sæmundur úr hljómsveitinni
Úlfur Úlfur. „Þeir munu að
sjálfsögðu taka nokkur af sínum
frægustu og bestu lögum,“
segir Sigvaldi. Funk That Shit!,
sem hafnaði í þriðja sæti á
Músíktilraunum 2012, og Rock
to the Moon ætla líka að taka
lagið á Menningarkvöldinu
en sú síðarnefnda er skipuð
þremur skagfirskum grunn-
skólastrákum. Svo munu
nemendur úr skólunum
þremur; FNV, MÍ og ME flytja
tónlistaratriði. „Beggi blindi
verður þarna með uppistand
en hann er að gera mjög góða
hluti á Íslandi,“ segir Ísak Atli.
Ómissandi þáttur af
Menningarkvöldinu segja
strákarnir náttúrulega vera
„Dragið“ og „Body Paintið“
en nemendur MÍ og ME
munu einnig taka þátt í Drag
keppninni og þá bregða
keppendur sér jafnan í klæðnað
af hinu kyninu, áhorfendum
til mikillar skemmtunnar. Þá
segja þeir nemendur FNV
eina keppa í Body Paint, eða
líkamsmálun, en slíkt krefst
mikils undirbúnings og oftast
fer allur dagurinn í að mála þá
sem stíga svo á svið um kvöldið.
„Við höfum einnig verið í góðu
samstarfi við Exton sem sjá
um ljós- og hljóðkerfið og
þeir lofa þrusu góðu showi,“
segir Sigvaldi. „Það er engan
veginn hægt að sleppa þessu
kvöldi!“ bætir Ísak Atli við og
beinir þeim tilmælum til allra
Skagfirðinga.
Menningarkvöldið hefst
kl. 20:30 en húsið opnar
kl. 19:30, fyrir þá sem vilja
tryggja sér sæti á fremsta
bekk. Verð er 2000 kr. en 1500
kr. fyrir félaga NFNV og 12
ára og yngri. Strákarnir vilja
koma því á framfæri að engin
áfengisneysla verður leyfð í
húsinu og búið sé að ráða góða
gæslu. Hægt verður að kaupa
gos og fleira í sjoppu sem
Ferðastúdentar verða með á
staðnum. /BÞ
Sigurvegarar Body Paint-keppninnar 2011.
Ísak Atli og Sigvaldi skipuleggja Menningarkvöld Nemó.