Breiðfirðingur - 01.04.2002, Blaðsíða 27
VETRARDVÖL Á BLIKASTÖÐUM
25
var veturinn 1941, þann 30. mars. Fátt hafði breyst síðan ég
fór þaðan, meira að segja var þar strákur á svipuðu reki og
fyrrum félagi minn. Eitt var þó breytt, nú var komið setulið og
einmitt þegar ég kom í hlaðið var þar allt fullt af hermönnum,
sumir að fara, aðrir að koma og á hlaðinu lá fullt af hafurtaski
og hergögnum. Rétt í því sást koma flugvél sem flaug yfir
Reykjavík og Mosfellssveit í boga inn Kollafjörð, vestur með
Esju, yfir Kjalarnes og út Faxaflóa. Þessu fylgdi mikill hávaði,
því þetta var þýsk flugvél og skotið var á hana úr loftvarnar-
byssum á Reykjavíkursvæðinu. Sáust kúlur springa nálægt
flugvélinni og mynduðust þar hvítir litlir skýhnoðrar. Allt sást
það vel frá hlaðinu á Blikastöðum, enda veður gott og skaf-
heiðríkja. Þeir sem á hlaðinu voru hrukku aldeilis við, var eins
og öllum fyndist að flugvélin myndi einmitt lenda þar. Hlupu
því allir til vopna, en úr nógu var að velja, mér tókst að ná í
heljar mikla sveðju og hafði í hendi svona til vonar og vara
meðan ógnin stóð yfir. Fljótlega eftir að hættan var liðin hjá
fórum við, ég og strákurinn sem var á Blikastöðum að kíkja á
hermennina, þeir voru flestir unglingar. Við slógumst í för
með tveimur, sem voru að fara niður að sjó. Attu þeir að vera
á vakt og halda til í grjótbyrgi sem hlaðið var þar. Ekki var
mikið skjól inni í því. Stuttu eftir að þangað kom, dró annar
hermaðurinn úr pússi sínu glerkrukku sem okkur þótti áhuga-
verð. í henni sýndust vera niðursoðnir ávextir eða eitthvað því
líkt. Þeir buðu okkur bita sem við þáðum, en beiskur var hann.
Þetta mun hafa verið „pikkles", en það hafði ég hvorki séð né
smakkað fyrr. Eftir þessa reynslu fórum við heim að Blika-
stöðum og eftir stutta dvöl þar, lagði ég á stað aftur til Reykja-
víkur en þaðan hafði ég komið. Engin rúta var á ferð um þetta
leyti dags. Fór ég því gangandi af stað og vonaði að ég fengi
far með einhverjum. Sú von rættist þó ekki fyrr en ég var
kominn niður að Grafarholti, en þaðan fékk ég far með
vörubíl í Sogamýrina og gekk þaðan niður á Frakkastíg, þar
sem ég hélt til hjá móðursystur minni.
Skrifað í Kópavogi 2002 .