Ljósmæðrablaðið - 01.12.2011, Blaðsíða 4
4 Ljósmæðrablaðið - desember 2011
Oft hefur komið upp umræða um val
barnshafandi kvenna á fæðingarstað. Þær
ljósmæður sem kynntust Fæðingarheimilinu
fá blik í auga og ljóma allar þegar rætt er
um það. Má segja að konur hafi minna val
í dag en áður til að fæða börnin sín. Búið
er að loka Fæðingarheimilinu, leggja niður
MFS-eininguna og fækka fæðingastöðum á
landsbyggðinni.
Auðvitað hefur fólk val um að fara út á
land eins og til Keflavíkur, á Selfoss og til
Akraness, en ég held við getum samt sagt að
konur sem búa á höfuðborgarsvæðinu hafi
ekki mikið val í dag.
Tíðni heimafæðinga á Íslandi hefur aukist
hratt á síðustu árum í kjölfar sögulegrar
lægðar í lok síðustu aldar og er þar komin
raunverulegur valkostur fyrir konur sem
ekki vilja vera inn á spítölum. Ekki hefur
áður verið gerð fræðileg rannsókn á útkomu
heimafæðinga á Íslandi. Í blaðinu birtist
ritrýnd grein úr rannsókn á heimafæðingum
á Íslandi sem Berglind Hálfdánsdóttir gerði,
niðurstöður þessarar forrannsóknar leiddu í
ljós góða útkomu móður og barns.
Brjóstagjöf er okkur ljósmæðrum hugleikin
nú sem endranær. Ýmsir orsakaþættir hafa
verið nefndir fyrir því að konur hætta fyrr
með börn sín á brjósti en ráðlagt er. Nýlegar
heimildir hafa einblínt sérstaklega á þá þætti
eða þá sem mögulegt er að hafa áhrif á með
þjónustu við konur. Einn þessara þátta er
sjálfsöryggi mæðra við brjóstagjöf en um það
skrifar Hildur Sigurðardóttir ritrýnda grein í
blaðið
Núna göngum við í gengum mikla
samdráttartíma og verður barneignarþjónustan
fyrir niðurskurðarhnífnum. Þessi niðurskurður
hefur komið hart niður á mörgum fæðingar-
stöðum á landsbyggðinni. Fæðingarstaðir hafa
þurft að endurskoða sína starfsemi með tilliti
til fjármagns og hafa þeir stuðst við flokkun
Landlæknis varðandi leiðbeiningar um val
á fæðingarstað. Í blaðinu fáum við fréttir frá
nokkrum fæðingardeildum á landsbyggðinni
þar sem á sumum þeirra hafa orðið töluverðar
breytingar. Má segja að konur og fjölskyldur
þeirra hafi einnig lítið val á landsbyggðinni,
þær geta sumar ekki fætt í sinni heimabyggð
vegna breytinga hjá viðkomandi sjúkra-
húsi og þurfa því stundum að bíða á höfuð-
borgarsvæðinu eftir því að fæða barn sitt, oft
fjarri fjölskyldu. Þetta er kannski það sem
við þurfum að borga fyrir óráðsíu auðmanna
á góðæristímanum, ekki urðum við mikið
vör við góðærið inni á heilbrigðisstofnunum
landsins fyrir hrun.
Aðventan er gengin í garð og við förum að
lýsa upp skammdegið með jólaskreytingum.
Sumir kalla þá hátíð sem framundan er
„hátíð áts og kviðar“. Allavega gerum við
okkur dagamun í mat og drykk, dveljum
með fjölskyldunni og njótum.
Kæru ljósmæður nær og fjær, við óskum
ykkur og fjölskyldum ykkar gleðilegra
jólahátíðar og gleðilegs nýs árs, þökkum
það liðna.
Fyrir hönd ritnefndar
Hrafnhildur Ólafsdóttir
Hrafnhildur Ólafsdóttir
ritstjóri Ljósmæðrablaðsins
Ritstjórapistill
Ljósmæðrafélag Íslands óskar öllum ljósmæðrum og fjöskyldum
þeirra, gleðilegra jóla og farsældar á nýju ári. Þökkum þeim fjölmörgu
ljósmæðrum sem unnið hafa óeigingjarnt starf fyrir félagið.
Með kærri kveðju - Stjórn Ljósmæðrafélags Íslands