Ljósmæðrablaðið - 01.12.2011, Blaðsíða 40

40 Ljósmæðrablaðið - desember 2011
Norræn brjóstagjafaráðstefna
Fjórða norræna brjóstagjafaráðstefnan
var haldin í Reykjavík dagana 31. maí til 1.
júní fyrr á þessu ári. Ráðstefnan var vel sótt
og þátttakendur voru tæplega tvö hundruð.
Íslendingar mættu vel og mátti sjá einstaklinga
frá mörgum fagstéttum og víðs vegar að af
landinu. Flestir sem komu erlendis frá voru
frá Norðurlöndunum, en einnig frá öðrum
Evrópulöndum og Bandaríkjunum. Á þriðja
tug fræðimanna fluttu erindi eða voru með
kynningu í formi veggspjalda.
Þórður Þórkelsson barnalæknir reið á vaðið
og bauð fólk velkomið. Catherine Watson
Genna brjóstagjafaráðgjafi kom frá Banda-
ríkjunum og var með erindi báða dagana.
Fyrri daginn ræddi hún um ástæður fyrir
því að sum börn eiga í erfiðleikum með að
taka brjóstið og hvað þarf að hafa í huga.
Seinni daginn var umfjöllunarefni hennar um
mjólkurmyndun og ráðleggingar vegna lítillar
eða mikillar mjólkurmyndunar. Hún var einnig
með vinnusmiðju dagana fyrir ráðstefnuna.
Nokkrar kynningar voru á norskum rann-
sóknum sem fjölluðu meðal annars um stöðu
barnvænna sjúkrahúsa, stuðning við mæður
og breytingar á starfsháttum innan deilda á
síðustu áratugum. Rannsóknir á brjóstagjöf
eftir keisarafæðingu og brjóstagjöf of feitra
mæðra voru einnig kynntar.
Mikil gróska virðist vera í rannsóknum
á brjóstagjöf innan nýburagjörgæsludeilda,
nokkrar kynningar voru á þeim og voru þó
nokkrir starfsmenn Vökudeildar Barnaspítala
Hringsins meðal þátttakenda á ráðstefnunni.
Stöðu brjóstagjafar á Íslandi var einnig gerð
góð skil þar sem bæði var farið yfir brjóstagjöf
hérlendis í sögulegu samhengi og staðan
rædd í dag. Næringarfræðingar kynntu meðal
annars niðurstöður rannsókna á brjóstagjöf
sem næringu íslenskra barna og áhrif hennar á
járnbirgðir líkamans og vöxt barna.
Íslensku ljósmæðurnar Hildur Sigurðardóttir
og Helga Gottfreðsdóttir voru með erindi.
Hildur kynnti rannsókn á vandamálum
tengdum brjóstagjöf og sjálfsöryggi
kvenna við brjóstagjöf og Helga sagði frá
reynslu foreldra af fræðslu um brjóstagjöf á
meðgöngu. Sveinbjörg Brynjólfsdóttir ljós-
móðir var með veggspjaldskynningu á rann-
sókn sinni um reynslu og líðan kvenna sem
fá verki í geirvörtur við brjóstagjöf. Arnheiður
Sigurðardóttir hjúkrunarfræðingur og
brjóstagjafaráðgjafi kynnti heimasíðuna www.
brjostagjof.is sem innheldur mikinn fróðleik
bæði fyrir foreldra og fagfólk. Einnig kynntu
norsku brjóstagjafasamtökin nýja heimasíðu,
ammehjelpen.no, sem inniheldur upplýsingar
um brjóstagjöf fyrst og fremst á norsku. Þar er
einnig að finna myndbönd um brjóstagjöf sem
gætu nýst vel við fræðslu, myndböndin eru oft
á ensku auk norsku.
Í lok ráðstefnunnar voru Dr. Marga Thome
og Rannveig Sigurbjörnsdóttir heiðraðar,
en þær hafa báðar unnið ötullega að eflingu
brjóstagjafar á Íslandi. Ráðstefnan tókst vel í
alla stað og var jafnt fræðandi og skemmtileg.
Ásrún Ösp Jónsdóttir tók saman.
Undirbúningsnefndin
Rannveig Sigurbjörnsdóttir og Dr. Marga Thome