Ljósmæðrablaðið - 01.06.2016, Blaðsíða 42
42 Ljósmæðrablaðið - júní 2016
Stjórnarfundir
Stjórnarfundir starfsársins hafa verið 12 og verið haldnir á 2‒3 vikna fresti
eftir því sem fyrir hefur legið hverju sinni.
Kjaramál
Mikill óróleiki var í kjaramálum og samþykktu félagsmenn verkfall á
LSH og SAk sem hófst hinn 7. apríl 2015 og lauk með dómi hinn 13. júní
sama ár. Í kjölfarið var settur gerðardómur sem dæmdi ákveðnar hækkanir.
Dómurinn stendur til 31.08.2017. Eftir dóminn hefur farið töluverð vinna
í að túlka menntunarákvæði dómsins og er sú vinna enn í gangi. Næsta
hækkun samkvæmt dómnum er 01.06.16. Einnig hefur talsverð vinna farið
í bókun 2 samkvæmt kjarasamningi 2014. Bókun 2 felur í sér möguleika á
tímabundinni umbun. Sú bókun er komin í gagnið á HH, HSU og HSS. Sjá
skýrslu formanns kjaranefndar í aðalfundargögnum.
Dómsmál
Í kjölfar verkfalla var ákveðið að höfða mál í félagsdómi vegna
vangoldinna launa fyrir unna vinnu. Málinu var vísað frá í fyrstu umferð
en ákveðið var að fara aftur með málið fyrir dóminn. Þar tapaðist málið
mjög naumlega með séráliti frá tveimur dómurum. Var því ákveðið að
fimm félagsmenn mundu sameiginlega höfða mál fyrir héraðsdómi vegna
vangoldinna launa. Saman eiga þessar fimm ljósmæður inni rúmlega 700
þús. kr. hjá ríkinu. Vinna við þetta mál er í fullum gangi. BHM mun standa
straum af málskostnaði. Reikna má með að málsmeðferð fyrir héraðsdómi
geti tekið eitt ár eða jafnvel lengur.
Skuldastaða
Kjarabarátta er dýr og kostnaðarsöm og ekki nóg með það, þá koma
lítil félagsgjöld inn þegar félagsmenn eru í verkfalli. BHM, FÍN og Fræða-
garður hlupu því undir bagga með félaginu og bæði lánuðu og styrktu
okkur. Miklar hagræðingar voru gerðar í rekstri og er gaman að segja frá
því að við höfum nú þegar getað endurgreitt Fræðagarði það lán sem þeir
veittu okkur. Nánar um lánin má sjá á ársreikningi félagsins.
Fagdeildir og stefnumótun
Frekar erfitt hefur reynst að koma fagdeildum af stað og má sjá skýr-
slu þeirra í aðalfundargögnum. Starfshópur hefur verið að störfum við að
endurskoða stefnu félagsins og er þeirri vinnu ekki lokið.
Erlent samstarf
Við höfum tekið þátt í starfi NJF (Nordisk Jordmor Forbund) nú sem
endranær. Við vorum gestgjafar á stjórnarfundi samtakanna í maí 2015.
Auk hefðbundinna fundarstarfa var þema fundarins meðferð klögumála
gegn ljósmæðrum og einnig vorum við með kynningu á heimaþjónustu
ljósmæðra. Til að vera með framsögu um þessi mál fengum við til okkar
góða gesti sem þekktu þessa málaflokka vel.
Ekkert hefur verið fundað hjá ICM (International Confederation of
Midwives) þetta árið en við höfum fylgst vel með starfi þeirra og sent
þeim ýmis gögn sem þeir hafa eftir þörfum falast eftir.
Ísland var orðið eitt tveggja landa í Evrópu sem ekki var aðili að EMA
(European Midwives Association). Að mati stjórnar félagsins hafði Ísland
margt að sækja í EMA og var því ákveðið að sækja um aðild að samtök-
unum.
Vefsíður félagsins
Ljosmodir.is var orðin barn síns tíma og var ráðist í endurgerð síðunnar.
Rekstur hennar er nú algjörlega á höndum skrifstofunnar og renna því
tekjur af síðunni beint til félagsins fyrir utan það sem fer í viðhald síðunnar
sjálfrar. Vel hefur gengið að selja auglýsingar. Sjá nánar í reikningum
félagsins.
Vegna hagræðingar þurftum við að segja vefstjóra síðunnar
ljosmaedrafelag.is upp störfum a.m.k. tímabundið og er umsjón síðunnar
nú í höndum skrifstofu félagsins með dyggri aðstoð Signýjar Dóru Harðar-
dóttur. Unnið er að því að gera síðuna aðgengilegri, meðal annars er hún
nú skalanleg í snjalltækjum. Auk þess er unnið í því að hægt sé að finna
einstakar greinar Ljósmæðrablaðsins en ekki þurfi alltaf að skoða allt
blaðið í heild sinni.
Fylgja og Ljósmæðrablaðið
Að þessu sinni var í hagræðingarskyni ákveðið að gefa Fylgjuna út til
tveggja ára og sleppa fræðilega kaflanum sem í staðinn verður aðgengi-
legur á ljosmaedrafelag.is. Auk þess tókst að selja auglýsingu á baksíðuna.
Með þessu tókst að draga verulega úr kostnaði við útgáfuna. Skoðað var
hvort breyta ætti Ljósmæðrablaðinu yfir í rafrænt tímarit. Stjórnin mat það
svo að það væri ekki heppilegur kostur að svo stöddu ekki síst í ljósi þess
að blaðið hefur staðið undir sér undanfarið. Þetta er þó mál sem þarf að
endurmeta reglulega.
Ljósmæðradagar í maí
Alþjóðadagur ljósmæðra var haldinn hátíðlegur með ráðstefnu á Naut-
hól þar sem Alison McFadden kom frá Bretlandi og var gestur okkar. Auk
þess fengum við marga góða gesti frá Íslandi bæði ljósmæður og aðra.
Í ár bar 5. maí upp á uppstigningardag svo að ljósmæðradagar þessa árs
verða á þann veg að við höldum daginn hátíðlegan þann 4. maí með þingi
þar sem við fáum til okkar Söruh Wickham og Ank de Jonge auk annarra
gesta. Þann 5. maí verður svo vinnustofa með Söruh. Dagurinn í fyrra var
samvinnuverkefni félagsins, HH, námsbrautar og fagráðs ljósmæðra LSH
og nú í ár taka sömu aðilar höndum saman, auk Kristbjargar Magnúsdóttur
ljósmóður.
Skjalaflokkun
Við að undirbúa skráningu á sögu félagsins hefur Erla Doris Halldórs-
dóttir flokkað skjalasafn félagsins alveg niður og gengið frá því til varð-
veislu. Var það mjög gott að við skyldum fá þetta samhliða bókarskrif-
unum því frágangur á skjölum félagsins var mjög brýnt verkefni sem þoldi
ekki bið.
BHM
Félagið hefur venju samkvæmt tekið þátt í öllu samstarfi innan BHM
á árinu. Félagsmenn hafa verið duglegar að sækja í ýmsa sjóði BHM og
er það vel. Iðgjald til BHM mun á þessu ári hækka um 30% sirka þar sem
nú hefur innnheimtuaðferðum verið breytt yfir í hlutfall af heildarlaunum.
Námskeið
Auk ljósmæðradaga í maí sem fjallað var um hér að framan ráðgerir
félagið nálastungunámskeið í haust. Leiðbeinandi verður María Sigurðar-
dóttir ljósmóðir. Vinna hefur haldið áfram við undirbúning 100 ára afmælis
félagsins árið 2019 og NJF ráðstefnunnar sama ár. Skráning á sögu félags-
ins og undirbúningur ljósmæðratals gengur vel og einnig undirbúningur
ráðstefnu. Þema ráðstefnunnar verður að þessu sinni „Midwifery across
borders“ og mun fyrstu gögnum og auglýsingum verða dreift á ráðstefn-
unni í Gautaborg í maí.
Framundan
Frekari vinna við endurskoðun stefnumótunar félagsins. Frekari bæting
á vefsíðum félagsins. Áframhaldandi vinna við 100 ára afmæli félagsins
2019 og ráðstefnu sama ár.
Þakkir
Stjórn félagsins þakkar öllum þeim ljósmæðrum og öðrum sem starfað
hafa fyrir félagið á síðasta ári og einnig þeim sem hafa látið sig málefni
félagsins varða, haft samband og komið með ábendingar.
Fyrir hönd stjórnar LMFÍ
Áslaug Íris Valsdóttir, formaður
Skýrsla stjórnar LMFÍ 2015-2016
F R É T T I R A F F É L A G S S T A R F I